कान्तिपुर वेबसाईट
AdvertisementAdvertisement
१६.१२°C काठमाडौं
काठमाडौंमा वायुको गुणस्तर: १६०

तिब्बत हुँदै हुम्लामा खाद्यान्न : प्रतिकेजी सिमकोटमा २८ र यालबाङमा ११४ रुपैयाँसम्म सस्तो

छपाल लामा

हुम्ला — हुम्लाका लागि पठाइने खाद्यान्नको मूल्य सस्तो पर्ने भएकाले काठमाडौंबाट पहिलोपल्ट केरुङ नाका र तिब्बती भूमि हुँदै ढुवानी सुरु गरिएको छ ।

तिब्बत हुँदै हुम्लामा खाद्यान्न : प्रतिकेजी सिमकोटमा २८ र यालबाङमा ११४ रुपैयाँसम्म सस्तो

यो मार्गबाट ल्याएको चामल जिल्लाको यालबाङसम्म आइपुग्दा प्रतिकेजी ४२ रुपैयाँ र त्यहाँबाट सदरमुकाम सिमकोटसम्म ल्याउन गाडी र खच्चड ढुवानी खर्च ४३ रुपैयाँ गरी प्रतिकेजी ८५ रुपैयाँ मात्र पर्ने भएको छ । यो मूल्य विगतमा नेपालगन्ज हुँदै सिमकोट ल्याइपुर्‍याउँदाको भन्दा २८ रुपैयाँ कम हो ।


नेपाल खाद्य संस्थान हुम्ला शाखाका कर्मचारी सुरेन्द्र पोख्रेलका अनुसार यसअघि सुर्खेत हुँदै ल्याउँदा प्रतिकेजी १ सय ५ रुपैयाँ र नेपालगन्ज हुँदै ल्याउँदा १ सय १३ रुपैयाँ पर्ने गरेको थियो । काठमाडौंबाट पठाइएको खाद्यान्न अहिले केरुङ नाका आइपुगेको छ । केरुङबाट तिब्बती भूमि हुँदै दुई दिनमा हुम्ला आइपुग्ने नेपाल खाद्य संस्थानले जनाएको छ । काठमाडौंबाट केरुङ नाका र तिब्बत भएर हुम्लासम्म खाद्यान्न आइपुग्न करिब ६ दिन लाग्छ । तिब्बती भूमिमा मात्र दुई दिन समय लाग्नेछ ।


अघिल्लो वर्ष संस्थानले हुम्लाका लागि ५ हजार ५ सय ५० क्विन्टल चामलको कोटा थपेको थियो । सोही चामल हुम्ला पुर्‍याउन तिब्बतको स्थलमार्ग प्रयोग गरिएको संस्थानका सिमकोट शाखा प्रमुख रामबहादुर विष्टले बताए । ‘चामल केरुङ आइपुगेको छ, अब दुई/तीन दिनमै हुम्ला पुर्‍याइनेछ,’ उनले टेलिफोनमा भने, ‘तिब्बती बाटोबाट ढुवानी गर्न प्रक्रियागत जटिलता भए पनि आर्थिक रूपमा सस्तो हुने भएकाले यो मार्ग प्रयोग गरिएको हो ।’ तिब्बती मार्ग भएर आएको खाद्यान्न हिल्सा पुर्‍याइएपछि त्यहाँबाट सदरमुकाम सिमकोट र नाम्खा गाउँपालिकाको यालबाङ वितरण केन्द्रमा पठाइनेछ । ४ हजार क्विन्टल सिमकोट र बाँकी यालबाङमा वितरण गरिने संस्थानका शाखा प्रमुख विष्टले बताए ।


ढिलोमा बिहीबारसम्म खाद्यान्न हिल्सामा पुगिसक्ने उनले जानकारी दिए । हिल्साबाट यालबाङ र सिमकोट पुग्न थप एक/दुई दिन लाग्नेछ । यालबाङका लागि भने तिब्बती मार्गबाट ढुवानी गरिएको चामल निकै सस्तो अर्थात् ४२ रुपैयाँ प्रतिकेजी मात्र पर्नेछ । विगतमा नेपालगन्जबाट ल्याएको चामल सिमकोटमै ११३ रुपैयाँ र त्यहाँबाट यालबाङसम्म उकाल्दा थप ४३ रुपैयाँ प्रतिकेजी मूल्य बढ्थ्यो । त्यस हिसाबले १५६ रुपैयाँ प्रतिकेजी पर्ने चामल यालबाङवासीले योपल्ट ११४ रुपैयाँ सस्तोमा पाउने छन् ।


असारमै स्वीकृति पाए पनि प्रक्रिया मिलाउँदा ढिलाइ भएको ढुवानी जिम्मा लिएको चंखेली–देउतीबज्यै जेभीका प्रतिनिधि ध्रुव शाहीले बताए । खाद्य संस्थानले गाउँपालिकाको सिफारिसमा सदरमुकाममा एक जनालाई मासिक पाँच केजी र सदरमुकाम बाहिर तीन केजी चामल दिने गरेको छ । ‘जमिन मार्गबाट चामल आइपुगेपछि सहज हुनेछ’ खाद्य संस्थान हिल्साका नायब सुब्बा सुरेन्द्र पोखरेलले भने ।


गत आर्थिक वर्षमा संस्थानको सुर्खेत कार्यालयबाट ६ हजार ८ सय क्विन्टल र नेपालगन्ज कार्यालयबाट ६ हजार ४ सय २४ क्विन्टल खाद्यान्न हुम्ला पुर्‍याइएको थियो । यसका साथै स्थलमार्ग भएर सुर्खेत शाखाबाट ५ सय केजी र नेपालगन्ज शाखाबाट ५ सय २० क्विन्टल खाद्यान्न पनि हुम्ला ल्याइएको थियो ।


संस्थानका नेपालगन्जस्थित कार्यालय प्रमुख भरत खनियाँले आर्थिक रूपमा तिब्बतबाट सस्तो पर्ने भए पनि सजिलोका हिसाबले विगतमा हवाईमार्ग प्रयोग गर्दै आएको बताए । ‘काठमाडौंस्थित प्रधान कार्यालयबाट ल्याइने खाद्यान्नमात्र तिब्बत भएर पठाउन मिल्नेछ’ उनले भने ।

प्रकाशित : भाद्र ११, २०७६ ०७:१८
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?