४० वर्षदेखि जंगलको बास

पत्नी र छोराको निधनले विरक्त
आश गुरुङ

लमजुङ — त्रिपालको छाप्रोभित्र तीनवटा ससाना ढुंगा राखेर बनाइएको अँगेनो । कालोमैलो सानो डेक्ची र ताप्केछेउ सेतै फुलेका कपाल र दारीले ढपक्क वृद्ध बसेका छन् । 

लमजुङको दोर्दी–४, बाँसकोटमा बसेका ७३ वर्षीय शमशेर तामाङ ।तस्बिर : कान्तिपुर



यी ७३ वर्षीय शमशेर तामाङ हुन् । कालोमैलो हाफपेन्ट, धर्के गन्जी, घाँटीमा लामाको माला र कम्मरमा पछ्यौरी बेरेका उनी एक्लै जंगलमा बस्छन् । ओढ्ने–ओछ्याउने बोरा छ । ३० वर्षको छँदा पत्नी बिलुको मृत्यु भयो । डेढ वर्षका छोरा पनि बिते । पारिवारिक पीडा खेप्न नसकेर गाउँघर छाडेका उनी पछिल्लो एक दशकयता गाउँ वरपर देखिएको स्थानीय बताउँछन् । उनलाई गाउँले मेमे लामा भनेर चिन्छन् ।

दोर्दी गाउँपालिका–४ बाँसकोट गाउँनजिकै बजिनीपाखामा उनको बसाइँ छ । उनी आफ्नो बासस्थान फेरिहन्छन् तर जता गए पनि जंगलमै बस्छन् । उनको गाउँ बाँसकोट नै हो । आफ्नै गाउँ र छिमेकी गाउँलेसँग मागेर गुजारा चलाउने उनी एकैपटक अलि धेरै खानेकुरा बोकेर जंगल पसे भने धेरै दिनपछिमात्रै बाहिर निस्कन्छन् ।

स्थानीय तुलमाया तामाङका अनुसार शमशेर ३० वर्षको छँदा हराएका थिए । धेरै दिन गाउँमा देखिएका थिएनन् । ९/१० वर्षयता उनी पुनः गाउँ वरपर देखिन थालेका हुन् । जंगल, ओडार, पाखोबारी, खोला किनारमा शमशेरको बास हुन्छ । उनले ४० वर्ष बढी समय जंगल, खोलानाला किनार, ओडारलगायतमा बितेको बताए । ‘म यतै कतै थिएँ । जंगल, खोलानाला किनार, ओडारमा थिएँ । मलाई मान्छेले देख्ने ठाउँमा बस्न मन लाग्दैन । एक्लै बस्न मन छ,’ गुरुङ र तामाङ भाषा बोल्ने उनले भने, ‘पीरले घर छाडेको हुँ ।’

विगत सम्झन मन नभएको उनले बताए । ‘मलाई यहीँ ठीक छ । कसैलाई केही भन्नु छैन,’ उनले भने । वडाध्यक्ष सुकबहादुर गुरुङका अनुसार पत्नी र छोराको निधन भएपछि विरक्तिएर तामाङले घर–समाज छाडेका हुन् । गाउँ नजिकै पाखो बारीमा देखिएका उनी कहिले मर्स्याङदी, कहिले दोर्दीकिनार, ओडार तथा जंगलमा बस्दै आएका छन् ।

‘हामी बसोबासको व्यवस्था मिलाउँछौं, आउनोस्, जंगलमा नबस्नोस् भन्दा पनि उहाँ मान्नुहुन्न । आफ्नै सुरको, हुनुहुन्छ । सम्झाउनै सकिन्न,’ वडाअध्यक्ष गुरुङले भने । उनका अनुसार शमशेरको ७३ वर्षको उमेरमा नागरिकता बनेको छ । ‘नागरिकता बनाउनुस् । पैसा (भत्ता) पाइन्छ भन्दा पनि कहाँ मान्ने र ? फकाएर ल्याएर नागरिकता बनाइदियौं,’ उनले भने । वडा कार्यालय, प्रहरीको समन्वयमा कानुनी प्रक्रिया पूरा गरेर गत साउन २० मा उनलाई नागरिकता दिलाइएको हो ।

प्रकाशित : भाद्र १०, २०७६ ०९:४१
प्रतिक्रिया
पठाउनुहोस्

अमेरिकामा नेपालीका हत्या अभियुक्तलाई ६० वर्ष जेल

कान्तिपुर संवाददाता

न्युयोर्क — नेपाली आप्रवासीको हत्याका एक अभियुक्तलाई अमेरिकामा ६० वर्षको जेल सजाय तोकिएको छ । चालीस वर्षीय रेशम बजगाईको हत्या गरिएको अभियोगमा भर्जिनिया राज्यको फेयरफ्याक्स काउन्टी सर्किट कोर्टले सोमबार अभियुक्त २० बर्षीय मोहम्मद ए अबदुल्लाहलाई ६० वर्षको जेल सजाय र पच्चीस हजार डलर जरिवानाको फैसला सुनाएको छ । 

रमेश बजगाई

गोरखाको केराबारी पुर्ख्यौली घर भएका बजगाईलाई सन् २०१८ को जुलाई ४ मा ग्यास स्टेसनमा काम गरिरहेको बेला लुटेराको आक्रमणमा मृत्यु भएको थियो। भर्जिनियाको हर्नडन शहरको फ्रयाङकलिन फर्ममा अवस्थित ‘सुनाको ग्यास’ स्टेसनमा, अमेरिकी स्वतन्त्रताकै दिन बिहानै बजगाई माथि आक्रमण भएको थियो।

बजगाई, श्रीमती र पाँच वर्षीया छोरीसहित अमेरिका आएको नौं महिनामै उक्त घटना भएको थियो। प्रहरीले घटना लगत्तै संदिग्ध अब्दुल्लाहलाई नजिकैको गाडी पार्किङ लटबाट पक्राउ गरेको थियो।

जेलजसाय ताेकिएका२० बर्षीय मोहम्मद ए अबदुल्लाह ।
केही साता देखिको लामो सुनुवाईपछि जुरीहरुको सिफारिसमा न्यायाधीशले सोमबार फैसला सुनाएका थिए। मृतकको पक्षका वकिलले हत्याका अभियुक्तलाई जन्मकैदको माग गर्दै बहस गरेका थिए भने अभियुक्त पक्षधर वकिलको भने २० वर्षको जेल सजायको मागसहितको बहस थियो।

पहिलो बहसमा अभियुक्तलाई २० वर्षको सजाय तोकिए पनि अन्तिम बहसमा घटनाको भिडियो रेकर्डपछि, सजाय ६० वर्षका पुर्‍याइएको हो। ‘फस्ट मर्डर’ अर्न्तगत सो सजाय किटानी भएको हो।

पछिल्लो समयमा अमेरिकामा नेपाली आप्रवासीहरुको संख्या बढ्दै गएको पृष्ठभूमिमा, लुटेरा एवं अपराधीको निशानामा नेपालीहरुले ज्यान गुमाउँदै आएका छन्।

प्रकाशित : भाद्र १०, २०७६ ०९:२६
पूरा पढ्नुहोस्
प्रतिक्रिया
पठाउनुहोस्