चितवनमा रवि समर्थकमाथि अश्रुग्यास प्रहार, १० जना गिरफ्तार

प्रदर्शनकारीको ढुंगा लागेर ४ प्रहरी घाइते
रमेशकुमार पौडेल

चितवन — आत्महत्या दुरुत्साहनका आरोपी रवि लामिछानेको रिहाइको माग गर्दै चितवन जिल्ला प्रहरी कार्यालय परिसरमा हुलदंगा मच्चाउनेमाथि अश्रुग्यास प्रहार गरिएको छ । प्रदर्शनकारीले कार्यालयमा ढुंगामुढा गर्न थालेपछि आइतबार साँझ प्रहरीले अश्रुग्यास प्रहार गरेको हो ।

ढुंगा प्रहारबाट चार प्रहरी घाइते भएका छन् भने १० प्रदर्शनकारीलाई प्रहरीले गिरफ्तार गरेको छ।

टेलिभिजन कार्यक्रम प्रस्तोतालामिछानेसहित तीन जनाविरुद्ध जिल्ला अदालत चिवतनमा आइतबार 'आत्महत्या दुरुत्साहन' मुद्दा दायर भएको छ। पत्रकार शालिकराम पुडासैनीलाई आत्महत्याका लागि दुरुत्साहन गरेको आरोपमा लामिछाने, युवराज कँडेल र अस्मिता कार्कीविरुद्ध जिल्ला सरकारी वकिलको कार्यालयले मुद्दा दायर गरेको हो।

उक्त मुद्दामा आइतबारबाटै अभियुक्तहरुमाथि बयान सुरु भएको छ। तीनमध्ये एक अभियुक्त अस्मिता कार्कीको बयान सकिएको छ भने लामिछाने र कँडेलको बयान सोमबारलाई सरेको अदालतले जनाएको छ। कार्कीको जिल्ला न्यायाधीश हेमन्त रावलको इजलासमा बयान भएको थियो।

बयान सकिएपछि थुनछेक बहस सुरु हुनेछ। लामिछानेसहित तीनै जनालाई प्रहरी हिरासतमा राखिएको छ।

जिल्ला प्रहरी कार्यालय चितवनले अनुसन्धान सकेर आफ्नो रायसहित फाइल जिल्ला सरकारी वकिलको कार्यालयमा आइतबार दिउँसो बुझाएपछिलामिछानेसहित तीनै जनाविरुद्ध मुद्दा दर्ता गरिएको हो। पुडासैनी चितवनको एक होटलमा दुई साताअघि मृत अवस्थामा भेटिएका थिए।

प्रकाशित : भाद्र ८, २०७६ २०:०३
प्रतिक्रिया
पठाउनुहोस्
ADVERTISEMENT

बाघले लियो दुईको ज्यान

कान्तिपुर संवाददाता

बर्दिया — यहाँ तीन दिनमा बाघ आक्रमणबाट दुई जनाको ज्यान गएको छ । निकुञ्ज नजिकैका बस्तीमा बाघ आक्रमणबाट सर्वसाधारणले ज्यान गुमाएका हुन् । आइतबार बिहान ठाकुरबाबा नगरपालिका १, डुम्रेनीमा बाघले आक्रमण गर्दा एक वृद्धको ज्यान गएको हो ।

बंगुरलाई आहारा दिने क्रममा ७० वर्षीय पहडिया थारूमाथि बाघले आक्रमण गरेको थियो । नगरपालिका कार्यालयबाट करिब पाँच सय मिटर दूरीमा रहेको घरको आँगनमा रहेको बंगुर खोर नजिक वृद्धालाई आक्रमण गरी मारेको प्रहरी उपरीक्षक राजेशनाथ बास्तोलाले बताए ।

तीन दिनअघि मात्र गेरुवा गाउँपालिका ४, दंहामा बाघकै आक्रमणबाट ५६ वर्षीया रामकली शाहीको मृत्यु भएको थियो । नजिकै सामुदायिक वनमा घाँस काटिरहेको अवस्थामा उनी बाघ आक्रमणमा परेकी थिइन् । उनीसँगै गएका चारपाँच जना महिलाले भागेर ज्यान जोगाएका थिए ।

बाघले दिनदहाडै ज्यान लिन थालेपछि निकुन्ज आसपास त्रास छ । गत वर्ष माघ २२ गते बढैयाताल गाउँपालिका २, सीतापुरमा घाँस काटिरहेको समयमा बाघले आक्रमण गर्दा सोही ठाउँका ७१ वर्षीय चन्द्रबहादुर शाहीको मृत्यु भएको थियो ।

नरभक्षी बाघको खोजीमा ६ वटा हात्ती परिचालन गरिएको बर्दिया राष्ट्रिय निकुञ्जका सहायक संरक्षण अधिकृत अशोककुमार भण्डारीले बताए । ‘दुई हात्ती भुरीगाउँ हुँदै निकुन्ज क्षेत्रमा परिचालन गरिएको छ,’ उनले भने, ‘चारवटा हात्ती गेरुवामा परिचालित छन् ।’ बाघको खोजीमा निकुन्ज सुरक्षाका लागि तैनाथ नेपाली सेना पनि परिचालित छन् ।

प्रकाशित : भाद्र ८, २०७६ १९:५२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×