भूउपयोग विधेयक राष्ट्रपतिद्वारा प्रमाणीकरण

कान्तिपुर संवाददाता

काठमाडौँ — राष्ट्रपति विद्यादेवी भण्डारीले संघीय संसदका दुवै सदनबाट पारित भूउपयोग सम्बन्धमा व्यवस्था गर्न बनेको विधेयकलाई शुक्रबार प्रमाणीकरण गरेकी छन् । उक्त विधेयक मंगलबार प्रतिनिधिसभाले पारित गरेको थियो । विधेयकको प्रावधानले जमिनलाई व्यक्तिको अनुमतिबिना वर्गीकरण गरेको र सरकारले निजी सम्पत्तिमाथि हस्तक्षेप गरेको आवाज उठिरहेको छ ।

विधेयकमा कृषि, औद्योगिक र व्यावसायिक क्षेत्रमा घडेरी विकास गर्न नपाइने र वर्गीकरणअनुसार जग्गाको छुट्टाछुट्टै स्रेस्ता र धनीपुर्जा राख्नुपर्ने प्रावधान छ । त्यस्तै १० वर्षदेखि एकै स्थानमा बसेका सुकुम्बासीलाई त्यही जमिनको धनीपुर्जा दिने व्यवस्था गरिएको छ ।

यस्तो प्रावधानले वनक्षेत्र विनाश हुने भन्दै विज्ञ एवं सरोकारवालाले असहमति राख्दै आएका थिए । विधेयकमा जमिनलाई भूबनोट र उपयोगका दृष्टिले १० भागमा विभाजन गर्ने प्रावधान राखिएको छ । राष्ट्रपति भण्डारीले प्रमाणीकरण गरेपछि यसले कानुनको रूप लिएको छ ।

प्रकाशित : भाद्र ७, २०७६ २१:०८
प्रतिक्रिया
पठाउनुहोस्

मादक पदार्थ सेवन गर्नेलाई हजार जरिवाना

कान्तिपुर संवाददाता

ताप्लेजुङ — मादक पदार्थ सेवन गरेर हो–हल्ला गर्दै हिँड्नेहरुलाई प्रहरीले पक्राउ गर्ने अभियान तीव्र बनाएको छ । सदरमुकाम फुङलिङमा दुई दिनमा २३ जना पक्राउ परेका छन् । प्रहरी नायब उपरीक्षक सञ्जयसिंह थापाका अनुसार यी सबै रातको समयमा पक्राउ परेका हुन् । प्रहरीले उनीहरुलाई आवश्यक कारबाहीका लागि जिल्ला प्रशासन कार्यालयमा बुझाउने गरेको छ । 

पक्राउ परेका सबै पुरुष रहेको जिल्ला प्रहरी कार्यालयले जनाएको छ । ‘रातको समयमा नगर क्षेत्रको सार्वजनिक स्थल र बाटोमा अश्लिल शब्द प्रयोग गर्ने, हो–हल्ला गर्ने र शान्ति सुरक्षामा खलल पुर्याउने कार्य गर्नेलाई पक्राउ गरिएको हो,’ प्रहरी निरीक्षक विष्णुबहादुर खड्काले भने, ‘नियन्त्रणमा लिएकालाई जिल्ला अस्पतालमा मादक पदार्थ सेवनको परीक्षण गरी कार्यालय समयमा प्रशासन कार्यालयमा बुझाउँछौँ ।’

प्रशासन कार्यालयले भने स्थानीय प्रशासन ऐन अन्तर्गत जनही एक हजार रुपैयाँ जरिवाना गरी सम्झाइ बुझाइ गरेर छोड्ने गरेको छ । रकम तिर्न नसक्नेले भने त्यति नै रकम असुल हुनेगरी कारागार बसेर भुक्तान गर्नुपर्छ । कानुन अनुसार मादक पदार्थ सेवन गर्नेहरु जतिपटक पक्राउ पर्छन् त्यत्तिनै पटक रकम तिर्नुपर्ने हुन्छ ।

अहिलेसम्म तिर्न नसकेर जेल बस्ने कोहिपनि नभएको प्रशासन कार्यालयले जनाएको छ । प्रमुख जिल्ला अधिकारी डोरेन्द्र निरौला सदरमुकाममा लाखेजात्रा पर्व चलिरहेकाले पनि कडाइ गरिएको बताउँछन । शान्ति सुरक्षामा असर पर्ने भएकाले यो वेला विशेष निगरानी बढाइएको निरौलाले बताए ।

प्रकाशित : भाद्र ७, २०७६ २०:३९
पूरा पढ्नुहोस्
प्रतिक्रिया
पठाउनुहोस्