बुद्धमूर्ति चोरी आरोपमा गाउँपालिकाका उपाध्यक्ष र वडाध्यक्ष थुनामा

चाँदनी कठायत

(वीरेन्द्रनगर) — बुद्धमूर्ति चोरी आरोपमा डोल्पाको एक गाउँपालिकाका उपाध्यक्ष र वडाध्यक्ष डेढ महिनादेखि थुनामा छन् । जिल्ला अदालतबाट धरौटीमा छुटेका उनीहरू उच्च अदालतको आदेशमा थुनामा परेका हुन् ।डोल्पोबुद्ध गाउँपालिकाका उपाध्यक्ष मल्ल टसी गुरुङ र सोही गाउँपालिका–५ का वडाध्यक्ष कार्मा गुरुङ थुनामा परेका छन् ।

प्रतिकात्मक तस्बिर ।

करिब ७ वर्षअघि डोल्पाको शे–फोक्सुन्डो गाउँपालिका–४, राहापमा माटोमुनि लुकाएर राखेका बुद्धमूर्ति चोरी भएका थिए । प्रहरीले त्यसको सुइँको एक वर्षअघि कात्तिक १० मा मात्र पाएको थियो । जिल्ला प्रहरी कार्यालय डोल्पाका प्रहरी निरीक्षक शुभराज बमका अनुसार त्यहाँबाट ३७ थान मूर्ति र स्तुपा चोरी भएका थिए । सोही घटनाको अनुसन्धानको क्रममा दुईजना जनप्रतिधि थुनामा परेका उनले बताए ।

नेपाल प्रहरीको केन्द्रीय अनुसन्धान व्युरो (सीआईबी) को टोलीले घटना अनुसन्धानको क्रममा कात्तिक १९ मा स्थानीय उर्गेन पासाङ गुरुङ, जाम्पा छुल्डिम गुरुङ र छिरिङ गुरुङलाई काठमाडौंबाट पक्राउ गरेका थियो । कात्तिक २२ गते पासाङ लुन्डुप गुरुङ र त्यसको भोलिपल्ट वडाध्यक्ष कार्मा पक्राउ परेका थिए । चोरी घटनामा संलग्न भनिएका उपाध्यक्ष मल्ल टसी गुरुङ भने फरार थिए ।

प्रहरी निरीक्षक बमका अनुसार फरार उपाध्यक्ष गुरुङ पक्राउ परेका अन्य अभियुक्तसँगै एकैपटक जिल्ला अदालतमा हाजिर भएका थिए । अदालतले टसी गुरुङलाई सामान्य तारेखमा र वडाध्यक्ष कार्मा, छिरिङ तथा जाम्पालाई ५० हजार धरौटीमा रिहा गर्‍यो । अन्य तीनजना भने पुर्पक्षका लागि कारागार चलान भए ।

उच्च अदालत सुर्खेत (जुम्ला इजलास) ले असार १३ मा जिल्लाको आदेश उल्ट्याएपछि उपाध्यक्ष र वडाध्यक्ष पनि पुर्पक्षको लागि थुनामा परेका हुन् । प्रहरी निरीक्षक बमले उच्च अदालतको आदेशलगत्तै असार १८ चारैजनालाई पक्राउ गरी कारागा चलान गरिएको बताए ।

प्रहरीले भने ७ वर्षअघि चोरी भएका राहाप गुम्बाका बुद्धमूर्ति र स्तुपा अझैसम्म पनि फेला पार्न सकेको छैन । डोल्पाका बिभिन्न स्थानमा रहेका गुम्बाबाट मूर्ति चोरी हुँदै आएका छन् । धार्मिक तथा पुरातात्त्विक महत्त्वका मूर्ति तथा धर्मग्रन्थ चोरी हुनु प्रहरीको लागि चुनौती बनेको प्रहरी निरीक्षक बमले बताए । उपल्लो डोल्पाका शे गुम्बा, रे गुम्बा, मिखिम गुम्बा, गाँकर गुम्बा, बोन गुम्बालगायत गुम्बाबाट मूर्ति हराउने गरेका उनको भनाइ छ ।

बौद्ध धर्मालम्बीको बाक्लो बस्ती भएको उपल्लो डोल्पामा पछिल्लो चार बर्षयता थुप्रै बहुमूल्य मूर्ति चोरी भएका छन् । प्रहरीका अनुसार २०७२ चैत २८ गते डोल्पो बुद्ध गाउँपालिका ३ मा पर्ने गाँकर गुम्बा र मेखिम गुम्बाबाट ४ थान बुद्धका मूर्ति, बौद्ध धर्मसम्बन्धी पुस्तक चोरी भएका थिए । हराएका ४ थान मूर्तिमध्ये ३ थान मूर्ति र एक थान बौद्ध धर्मसम्बन्धी पुस्तक स्थानीयको सक्रियतामा चोरी भएकै दिन बरामद गरिएको थियो । मूर्ति तस्करले पुरातात्त्विक मूर्तिमात्र नभई सुन र चाँदीका धातुद्वारा लिखित बौद्ध धर्मग्रन्थ पनि आफ्नो निसानामा पारेका प्रहरीको भनाइ छ । त्यस्तै शे–फोक्सुन्डो गााउँपालिकाको रिग्मो गाउँमा रहेको ६ सय वर्ष पुरानो थासोङ छोलिङ गुम्बाबाट गत बर्ष हराएका ७ थान मूर्तिहरू अझै पत्ता लाग्न सकेका छैनन् ।

प्रकाशित : भाद्र ७, २०७६ २०:२१
प्रतिक्रिया
पठाउनुहोस्

मार्च अन्तिममा ‘सगरमाथा डायलग’

‘विश्वभरका २ सय विज्ञ अतिथि बोलाइने’
कान्तिपुर संवाददाता

काठमाडौँ — नेपालले आफ्नो सरोकार र अन्तर्राष्ट्रिय सामयिक चासोका मुद्दामा बहस गर्ने/गराउने गरी ‘सगरमाथा डाइलग’ सुरु गर्ने भएको छ । आगामी मार्चमा गरिने यो संवाद कार्यक्रमका लागि जलवायु परिवर्तन, पर्वतीय वातावरण र अर्थतन्त्र विषयक शीर्षक निर्धारण गरिएको छ ।

परराष्ट्रमन्त्री प्रदीप ज्ञवालीको अध्यक्षतामा शुक्रबार सिंहदरबारमा बसेको निर्देशक समितिको बैठकले डाइलगको सम्पर्क कार्यालय त्रिपुरेश्वरस्थित परराष्ट्र मामिला अध्ययन प्रतिष्ठानमा राख्ने निर्णय गरेको छ ।

‘नेपाललाई प्रत्यक्ष सरोकार राख्ने विषय, क्षेत्रीय र अन्तर्राष्ट्रिय मुद्दामा विशिष्ट विज्ञहरूको राय लिने र बहस मञ्चको रूपमा यो डाइलगलाई विस्तार गर्ने सोच राखिएको छ,’ मन्त्री ज्ञवालीले कान्तिपुरसँग भने, ‘यसमा वातावरण, मौसम परिवर्तन, ऊर्जा, पर्वतीय अर्थतन्त्र, मौलिक परम्परा, राजनीतिक उपलब्धि वा शान्ति स्थापना आदिजस्ता राष्ट्रिय–अन्तर्राष्ट्रिय विषय सरोकारमा आउनेछन् ।’

परराष्ट्रको नीति योजना विकास कूटनीति महाशाखाका अनुसार राष्ट्रसंघीय निकायका विषयविद्, विभिन्न मुलुकबाट सरकार प्रमुख र विज्ञहरू गरेर झन्डै २ सय जनालाई पहिलो बैठकमा आमन्त्रण गरिने भएको छ । स्थायी मञ्चका रूपमा रहने डाइलगले हरेक २ वर्षमा विषयगत रूपमा छलफल चलाउनेछ । शुक्रबारको बैठकमा परराष्ट्र सचिव शंकर बैरागीसहित विभागीय प्रमुखको उपस्थिति थियो ।

भारतमा पनि विदेश मन्त्रालयको संयोजकत्वमा राइसिना डाइलग भनेर सन् २०१६ यता बर्सेनि यस्तै बहुआयामिक विषयको संवाद कार्यक्रम चलाइने गरिन्छ । सिंगापुरमा पनि सांग्रिला डाइलगका नाममा बहुपक्षीय संवाद सञ्चालनमा छ ।

प्रकाशित : भाद्र ७, २०७६ २०:१२
पूरा पढ्नुहोस्
प्रतिक्रिया
पठाउनुहोस्