शिक्षा सम्मेलन सुरु

कान्तिपुर संवाददाता

काठमाडौँ — सार्वजनिक शिक्षाको गुणस्तर सुधारका लागि शनिबारबाट ललितपुरमा विज्ञ र मुलुकभरका शिक्षकको अन्तर्राष्ट्रिय सम्मेलन सुरु भएको छ । शिक्षा, विज्ञान तथा प्रविधि मन्त्रालयले रातो बंगला फाउन्डेसनको सहकार्यमा ३ दिने सम्मेलन आयोजना गरेको हो ।

शिक्षामन्त्री गिरिराजमणि पोखरेलले उद्घाटन गरेको सम्मेलनमा नेपालसहित भारत, चीन, सिंगापुर, अमेरिका र बंगलादेशका शिक्षाविदको सहभागिता छ । ५० भन्दा बढी जिल्लाका प्रधानाध्यापक र शिक्षकले सार्वजनिक शिक्षा सुधारका लागि विज्ञसँग अनुभव आदानप्रदानसहित छलफल गर्नेछन् ।

सरकारले ०७८ सम्मलाई सार्वजनिक शिक्षा सबलीकरणको दशक घोषणा गरेको छ । त्यसैअनुरूप सम्मेलन आयोजना गरिएको शिक्षा तथा मानवस्रोत विकास केन्द्रका महानिर्देशक बाबुराम पौडेलले जनाए ।

सार्वजनिक विद्यालय सुधारका लागि विज्ञहरूको ६० वटा कार्यपत्रमा छलफल गर्ने कार्यक्रम छ । मन्त्रालय र फाउन्डेसनबीच सार्वजनिक शिक्षाको सबलीकरणका लागि सहकार्य गर्दै जाने सम्झौता भएको थियो । यसअघि पनि ०६९ मा यस्तै सम्मेलन आयोजना गरिएको थियो ।

प्रकाशित : भाद्र ७, २०७६ १९:५५
प्रतिक्रिया
पठाउनुहोस्

पाकिस्तानको ‘लबिङ’ जारी

कान्तिपुर संवाददाता

काठमाडौँ — पाकिस्तानका विदेशमन्त्री मकधुम शाह महमुद कुरेसीले जम्मु–कश्मीर मामलामा स्पष्ट दृष्टिकोण अपेक्षा गर्दै क्षेत्रीय शान्ति र स्थिरताका निम्ति सार्क अध्यक्ष राष्ट्रका रूपमा नेपालले खेल्नुपर्ने भूमिकाबारे ध्यानाकर्षण गराएका छन् । 

परराष्ट्रमन्त्री प्रदीप ज्ञवालीलाई बिहीबार अपराहन फोन गर्दै मन्त्री कुरेसीले अन्तर्राष्ट्रिय कानून र राष्ट्रसंघीय सुरक्षा परिषदको प्रस्तावनाअनुसार पनि जम्मु–कश्मीरमा भारतले चालेको हस्तक्षेपकारी कदम गलत भएको बताएका थिए ।

पाकिस्तानको विदेश मन्त्रालयको वेबसाइटमा दिइएको सूचनाअनुसार कुरेसीले नेपालसहित स्वीट्जरल्यान्ड, डेनमार्क, माल्दिभ्स, स्विडेन, नर्वे, फ्रान्स, क्यानडा, स्पेन, नेदरल्यान्ड तथा राष्ट्रसंघीय मानव अधिकार उच्चायुक्तसमेतलाई फोन गरेर जम्मु–कश्मीर मामिलामा भारतले असहिष्णु व्यवहार देखाएको उल्लेख गरेका छन् ।

प्रकाशित : भाद्र ७, २०७६ १९:४७
पूरा पढ्नुहोस्
प्रतिक्रिया
पठाउनुहोस्