टीकापुर थारुवान सम्मेलन : बर्दिया सीमामा सुरक्षा बल तैनाथ

कमल पन्थी

बर्दिया — टीकापुरमा सुरु भएको थारुवान राष्ट्रिय मोर्चाको सम्मेलनलाई मध्यनजर राख्दै कैलालीसँग जोडिएको बर्दिया सीमामा सुरक्षा बल तैनाथ गरिएको छ । 

ठूलो संख्यामा नेपाल प्रहरी र सशस्त्र प्रहरी बल राजापुर र आसपासका क्षेत्रमा परिचालन भएका छन्। ०७२ भदौ ७ गते टीकापुरमा भएको घटनालाई मध्यनजर राख्दै अप्रिय घटना नहुन दिन सुरक्षा बल तैनाथ राखिएको स्थानीय प्रशासनले जनाएको छ। उक्त घटनामा ७ प्रहरीसहित एक नाबालकको मृत्यु भएको थियो।

आयोजक पक्षले शान्तिपूर्ण रुपमा कार्यक्रम हुने भएकोले सम्मेलनप्रति आशंका नगर्न आग्रह गरेको छ। प्रमुख जिल्ला अधिकारी रामबहादुर कुरुम्बाङले संवेदनशीलतालाई मध्यनजर राख्दै सुरक्षा बल तैनाथ गरिएको बताए।

‘राजापुरलाई कमाण्ड बेश बनाएर सुरक्षा बल तैनाथ छन्,’ उनले भने, ‘नेपाल प्रहरी र सशस्त्र प्रहरीका २ सय ५० जना सुरक्षा बल तैनाथ गरिएको छ।’ कैलालीसँग जोडिएको जिल्लाको दौलतपुर, सनकट्टी र सत्तीघाटमा सुरक्षा व्यवस्था कडा पारिएको छ।

जिल्लाबाट शनिबार बिहानसम्म करिब ५ हजार थरुवान समर्थक कार्यक्रममा सहभागी भएको सुरक्षा स्रोतले बतायो। टीकापुर जाने क्रम जारी छ। सामाजिक सद्भाव तथा थरुहट एकता, संविधान संशोधनसहित थरुहट प्रदेशका लागि भन्दै टीकापुरमा सम्मेलन भइरहेको छ। प्रजिअ कुरुम्बाङले टीकापुर सम्मेलन सम्पन्न नभएसम्म सुरक्षा निकायका प्रमुखसहित राजापुरमा मुकाम बनाएर बस्ने जनाए।

प्रकाशित : भाद्र ७, २०७६ १२:४४
ADVERTISEMENT
प्रतिक्रिया
पठाउनुहोस्
ADVERTISEMENT

पासाङ ल्हामु मार्गको ढुंगे–बेत्रावती सडक फेरि अवरुद्ध

कृष्ण थापा

गेर्खुटार (नुवाकोट) — भारी वर्षाका कारण पासाङ ल्हामु मार्गको गेर्खुखोलामा आएको बाढीले अस्थायी डाइर्भसन बगाएपछि सडक फेरि अवरुद्ध भएको छ । 

शुक्रबार राति आएको बाढीले अस्थायी रुपमा बनाइएको डाईभर्सन बगाएपछि सडक अवरुद्ध भएको जिल्ला ट्राफिक कार्यालयका इन्चार्ज विकल भट्टराईले बताए ।

उक्त डाईभर्सन विदुरनगरपालिका १ र १० वडाको सिमाना हो । बुधबार राति खोलाले सडक बगाएपछि अस्थायी रुपमा दुई वटा हृयुमपाइप हालेर डाईभर्सन बनाएर यातायात सुचारु गरिएको थियो ।

शुक्रबार दिउँसो बनाएको डाइभर्सन बाढी आएर लगेपछि फेरि यातायात अवरुद्ध भएको हो । यो सडक रसुवागढी आउजाउ गर्ने मुख्य बाटो हो ।

प्रकाशित : भाद्र ७, २०७६ १२:१०
पूरा पढ्नुहोस्
प्रतिक्रिया
पठाउनुहोस्
ADVERTISEMENT