रवि पत्नी निकिताको जाहेरी महानगरीय प्रहरी परिसर काठमाडौंले लिएन, आफ्नो क्षेत्राधिकार बाहिर रहेको स्पष्टोक्ति

जनकराज सापकोटा

काठमाडौँ — प्रहरी हिरासतमा रहेका टेलिभिजन कार्यक्रम प्रस्तोता रवि लामिछाने पत्नी निकिता पौडेलले चितवनका एसपी दानबहादुर मल्ल, प्रेस काउन्सिलका अध्यक्ष तथा जनआस्था साप्ताहिकका सम्पादक किशोर श्रेष्ठ र नेपाल आज अनलाइनका सम्पादक संकेत कोइराला विरुद्ध दिन खोजेको जाहेरी महानगरीय प्रहरी परिसर काठमाडौंले दर्ता गर्न अस्विकार गरेको छ ।

पत्रकार शालिकराम पुडासैनी आत्महत्या गर्नुपूर्व खिचेको भनिएको भिडियो किर्ते गरेको भन्दै उनी बुधबार दिउँसो करिव साढे १ बजे महानगरीय प्रहरी परिसर काठमाडौंमा जाहेरी दिन पुगेकी थिइन् ।


परिसरका प्रमुख एसएसपी उत्तम सुवेदीले आफ्नो क्षेत्राधिकारभन्दा बाहिरको विषय परेकोले जाहेरी दर्ता गर्न अस्विकार गरेको बताएका छन् ।


प्रहरी स्रोतका अनुसार उनलाई महानगरीय प्रहरी परिसर काठमाडौंले आफ्नो जाहेरी जिल्ला प्रहरी कार्यालय चितवन वा प्रदेश नम्बर ३ प्रहरी कार्यालयमा दर्ता गर्न सुझाव दिएका छन् ।


पौडेल विद्युतीय कारोबार ऐनअनुसार ३ जनालाई कारबाही गरी पाउँ भनेर उजुरी दर्ता गराउने तयारी साथ परिसर कार्यालय टेकु पुगेकी थिइन् । प्रहरीले लामो छलफल पश्चात जाहेरी दर्ता गर्न नमिल्ने भनी उनीहरुलाई फिर्ता पठाएको हो ।


पुडासैनी गएको साउन २० गते नारायणगढस्थित पोखरा बसपार्कको होटल कंगारुमा झुण्डिएको अवस्थामा मृत फेला परेका थिए । उनलाई आत्महत्या गर्न दुरुत्साहन गरेको अभियोगमा प्रहरीले गत बिहीबार रवि लामिछानेसहित पत्रकार युवराज कँडेल र अस्मिता कार्कीलाई पक्राउ गरेर अनुसन्धान गरिरहेको छ।

प्रकाशित : भाद्र ४, २०७६ १६:२६
प्रतिक्रिया
पठाउनुहोस्
ADVERTISEMENT
ADVERTISEMENT

भारतीय रुपैयाँसहित पाँच जना पक्राउ

दुर्गालाल केसी

दाङ — अवैध कारोबारबाट प्राप्त भारतीय रुपैयाँसहित ५ जनालाई प्रहरीले बुधबार पक्राउ गरेको छ । काठमाडौंमा किनेको पाँच किलोको पित्तलको बुद्धको मूर्तीमा सुनको जलप लगाई नेपाल भारत सीमा क्षेत्रको भैंसाही नाकामा भारतीय नागरिकलाई १५ लाख ८९ हजार ५ सय रुपयाँमा विक्री गरेर फर्कने क्रममा लमही नगरपालिका ९ जलकुण्डीबाट उनीहरुलाई पक्राउ गरिएको प्रहरीले बताएको छ ।

इलाका प्रहरी कार्यालय अमिलियाबाट खटिएको प्रहरी टोलीले खानतलासी गर्ने क्रममा भारतीय रुपैयाँसहित उनीहरुलाई पक्राउ गरेको हो ।

पक्राउ पर्नेमा बाँकेको कोहलपुर नगरपालिका २ प्रेमनगरका ४२ वर्षीय शशे बिक, ३३ वर्षीया मनकुमारी खत्री, रोल्पाको त्रिवेणी गाउँपालिका ९ डरुवाका ४३ वर्षीय प्रकाश केसी, जाजरकोटको बारेकोट गाउँपालिका ८ का २७ वर्षीय पूर्ण बिक र दाङको तुलसीपुर उपमहानगरपालिका ५ बरुवागाउँकी २७ वर्षीया हिरा बिक छन् ।

उनीहरुलाई थप अनुसन्धानका लागि राजश्व अनुसन्धान विभाग कोहलपुर पठाइएको प्रहरीले जनाएको छ ।

प्रकाशित : भाद्र ४, २०७६ १६:२३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×