दुई बसमा लुटपाट

कान्तिपुर संवाददाता

डोटी — स्थानीय युवाहरुले आइतबार राति डोटीमा दुई बसमा लुटपाट गरेका छन् । लुटपाटका क्रममा तीन जना घाइते भएका छन् । अछामबाट कैलालीको टीकापुरतर्फ गइरहेका ना ४ ख ७२६९ र ना ५ख ७१२१ नम्बरको बसबाट डोटीको शिखर नगरपालिका ६ तल्कोटमा नगद ९० हजार लुटिएको पीडित तेजबहादुर मल्लले बताए ।

उनको कान, टाउको र छातीमा चोट छ । सुरुमा मल्लकै गाडीमा उनीहरुले आक्रमण गरेका थिए ।


गाडी रोक्न लागेपछि अघि बढ्न खोज्दा पछाडिबाट ढुंगाले प्रहार गरेको मल्लले बताए । ‘पछि के भयो भनेर म गाडी रोकेर बाहिर निस्किएँ’, उनले भने, ‘गाडी रोक् भनेको सुन्दैनस् भनेर कानमा मुक्का हाने । र लगातार सबैले भकुरे । पैसा लगेपछि छाडे ।’


त्यसको करिब १० मिनेटपछि अछामबाटै मोहन मल्लको ना ५ख ७१२१ नम्बर बस पनि उनीहरुले रोके । ढुंगामुढा प्रहार गर्दै राति साढे ८ बजे बाटो छेकेर लुटेको घाइते यात्रु अर्जुन कुँवरले बताए । ‘एक्कासि १०/१२ जनाको समूह गाडी रोक्न आयो, चालक र सवारी धनीलाई सुरुमै नियन्त्रण लिएर हातपात गरे,’ घाइते अर्जुनले भने, ‘झ्यालबाट बाहिर हेर्ने यात्रुलाई पनि ढुंगाले आक्रमण गरे । त्यही क्रममा मलाई पनि चोट लाग्यो ।’


सवारीधनीको कपडा च्यातेर लुटेराहरु नगद पैसा लुटेर भागेको उनले बताए ।

प्रकाशित : भाद्र २, २०७६ २०:०५
प्रतिक्रिया
पठाउनुहोस्

मधेससँग 'लभ' परेको बताउँदै दाहालले मधेसवासीलाई आश्वासन बाँडे - 'समृद्धि र विकासको प्याकेजसहित प्रधानमन्त्री र म आउँदै छौं'

अजित तिवारी

जनकपुर — नेकपाका अध्यक्ष पुष्पकमल दाहालले समृद्धि र विकासको प्याकेजसहित प्रधानमन्त्री केपी शर्मा ओलीसँगै आफू छिट्टै तराई-मधेसमा आउने आश्वासन बाँडेका छन् । सोमबार धनुषाको बरमझियामा आयोजित सहिद रामवृक्ष यादवको स्मृति सभामा बोल्दै दाहालले तराई-मधेसको विकासमै पहाडको पनि समृद्धि जोडिएको बताए । 

मधेसको समस्याबारे प्रधानमन्त्रीसँग छलफल भएको बताउँदै दाहालले बाढीको क्षति न्यूनिकरण, सुक्दै गएको जलाधार, आगलागी, डुबानको समस्या हटाउन 'मास्टर प्लान' आवश्यक रहेको बताए । ‘यी सबै समस्याको दीर्घकालीन समाधान हुनुपर्छ । चुरेको संरक्षणको मास्टर प्लान नगरेसम्म तराईलाई जोगाउन सकिन्न,’ दाहालले भने, ‘जनता आवास, जनताको तटबन्ध, रेलमार्ग, हुलाकी मार्ग, फास्ट ट्र्याक, निजगढ अन्तर्राष्ट्रिय विमानस्थललगायतको परियोजनाले मधेस-तराईले विकासमा फड्को मार्छ । हामी दुवै अध्यक्ष विशेष प्याकेज लिएर तराई-मधेसमा आउँदैछौं । तराई-मधेसको समग्र विकासको खाका लिएर हामी छिट्टै आउँदैछौं ।’
जनयुद्धको पहिलो तालिम धनुषामै लिएको दाबी गर्दै दाहालले तराई-मधेससँग आफ्नो 'लभ' परेको प्रसंग कोट्याउँदै भने, ‘दोस्रो संविधानसभामा सिरहाबाट चुनाव जितेँ । प्रधानमन्त्री पनि बनेँ । त्यसैले मधेसको विकास र समृद्धि हाम्रो प्राथमिकतामा छ ।’ उनले तराई-मधेसको जनताले त्याग र बलिदानअनुसार प्रतिफल पाएका छन् कि छैनन्, त्यो महत्वपूर्ण विषय भएको बताउँदै प्रदेश २ सरकारको आलोचना पनि गरे । ‘प्रदेश २ मा भ्रष्टाचार बढ्यो, सुशासन छैन । जनताले झन दुःख पायो भनेर मैले सुनेको छु,’ दाहालले भने ।

को हुन रामवृक्ष ?
स्मृतिसभामा बर्सेनि शीर्ष नेता सहभागी हुने सहिद रामवृक्ष यादव तत्कालीन नेकपा (एकताकेन्द्र) का पोलिटब्यूरो सदस्य थिए । २०५१ भदौ २ गते धनुषाको बरमझियामा उनको हत्या भयो । नेपाल-भारतका पेशेवरबाट उनको हत्या भएको भनिएपनि पार्टीले यादवको हत्यामा कांग्रेसीहरु संलग्न रहेको आरोप लगाएको थियो ।

माओवादी जनयुद्ध २०५२ फागुनदेखि सुरु भएपनि बरमझियामा यादवकै सक्रियतामा सशस्त्र संघर्ष त्यसअघि नै थालियो । जनयुद्धको तयारी थालेका यादव सर्वहारा वर्गको नेतृत्व गर्थे । ०५१ साल भदौ १ गते संयुक्त जनमोर्चा नेपालले आह्वान गरेको बन्द कार्यक्रमबाट फर्किँदै गर्दा भदौ २ गते उनको गाउँ नजिककै कमला नहरमा हत्या गरियो ।

माओवादी जनयुद्धको क्रममा यादवको परिवारका चार सदस्यको मृत्यु भएको हो । उनका छोरा शेखर, ज्वाइँ डम्बरनारायण र अर्को नातामै पर्ने भाईसहित चारजना जनयुद्धकै लडाइँमा मारिए । यादवकी पत्नी रामकुमारीको संविधानसभाको समानुपातिक सदस्य रहेकै बेला काठमाण्डौंमा ग्यासको चुल्हो लिक भएर आगलागी हुँदा मृत्यु भएको थियो । रामवृक्षलाई मास्टरसाहेब भनेर पनि चिनिन्छ ।
रामवृक्षलाई सम्झिँदै नेकपाका अध्यक्ष दाहालले भने, ‘भजनकिर्तनबाट जनतासँग जोडिएको मास्टरसाहेब सरल, इमान्दार र लक्ष्यप्रति निष्ठावान थिए । उनको क्रान्तिकारी गीत र भाषणले तरंग ल्याउँथ्यो । उहाँलाई हामी मास्टरसाहेब भन्थ्यौं । उनी क्रान्तिकारी नेता थिए ।’ रामवृक्षको अघिल्लो स्मृतिसभामा प्रधानमन्त्री केपी ओली र नेकपा अध्यक्ष दाहाल बरमझिया पुगेका थिए । यसवर्ष, दाहालसँगै नेता नेपाल, मन्त्री मातृका यादव र रघुवीर महासेठ पनि सहभागी भए ।

प्रकाशित : भाद्र २, २०७६ १९:४१
पूरा पढ्नुहोस्
प्रतिक्रिया
पठाउनुहोस्
×