बाल मन्दिरका निर्देशककै योजनामा बेचिए शिशु

बाल मन्दिरका निर्देशक बालकृष्ण डंगोल र स्टाफ नर्स निर्मला थापाको योजनामा बेलायती नागरिक डिना स्मिथलाई रकम लिएर शिशु दिएको खुलासा ।
जनकराज सापकोटा

काठमाडौँ — तराई मूलकी एक १४ वर्षीया किशोरीले जन्माएको शिशु बेलायती नागरिकलाई बेच्ने धन्दामा संलग्न भएको आरोपमा प्रहरी परिसर काठमाडौंले गर्भपतन केन्द्र चलाएर बसेकी स्टाफ नर्स निर्मला थापालाई पक्राउ गरेको छ ।

सोही आरोपमा होटल याक एन्ड यतीको स्टोर शाखामा कार्यरत महेन्द्र खत्री पनि समातिएका छन् । शिशुको अवैध कारोवारमा मुख्य भूमिका खेलेको आरोपमा प्रहरीले यसअघि नै बाल मन्दिरका निर्देशक बालकृष्ण डंगोललाई नियन्त्रणमा लिइसकेको छ ।

कलंकीमा सञ्जीवनी गर्भपतन केन्द्र चलाएर बसेकी थापाले आफूकहाँ गर्भपतन गर्न आएकी एक किशोरीलाई प्रसूति गराउन थापाथलीस्थित परोपकार प्रसूतिगृह पठाएकी थिइन् । त्यहाँ जन्मिएकी शिशु निर्मलाले बाल मन्दिरका निर्देशक बालकृष्णलाई दिएकी थिइन् । बालकृष्णले ४ लाख ५० हजार रुपैयाँ लिएर बेलायती नागरिक डिना स्मिथलाई शिशु दिएका थिए । बेलायत जान हिँडेकी स्मिथ त्रिभुवन अन्तर्राष्ट्रिय विमानस्थलबाट पक्राउ परेपछि शिशुको अवैध कारोबारमा बालकृष्णको संलग्नता खुलेको थियो ।

प्रहरीका अनुसार निर्मलाले शिशु दिएलगत्तै बालकृष्णबाट १ लाख ३५ हजार रुपैयाँको चेक बुझेको देखिन्छ । खातामा पर्याप्त मौज्दात नभएकै कारण निर्मलाले उक्त चेक साट्न सकेकी थिइनन् । उनले अनिच्छापूर्वक जन्मिएको शिशुलाई संरक्षणका निम्ति बाल मन्दिरमा बुझाउने क्रममा बालकृष्णसँग कुराकानी भएको र किशोरीलाई दिनका निम्ति चेक बुझेको दाबी गर्दै आएकी छन् । उनको गर्भपतन केन्द्रले बाल मन्दिरलाई शिशु बुझाउँदा कुनै कागजी प्रक्रिया गरेको प्रहरीले फेला पारेको छैन । बालकृष्णबाट चेक बुझेका कारण शिशुको अवैध कारोबारमा उनको संलग्नता हुन सक्ने प्रहरीको आशंका छ ।

याक एन्ड यतीमा कार्यरत खत्रीले विदेशी नागरिक र बालकृष्णबीच सहजीकरण गरेको प्रहरीको प्रारम्भिक अनुसन्धानले देखाएको छ । प्रहरी परिसर काठमाडौंका डीएसपी होबिन्द्र बोगटीले शिशुको अवैध कारोबारमा खत्रीको भूमिका देखिएको जनाउँदै भने, ‘अनुसन्धान दायरा फराकिलो बनाउँदै जाँदा उनको शंकास्पद भूमिका देखिएको छ ।’

प्रहरीले यसअघि बेलायती नागरिक स्मिथका देवरबाट निर्देशक बालकृष्णले ४ लाख रुपैयाँ नगद बुझ्दै गरेको सीसीटीभी फुटेज पनि प्राप्त गरेको छ । सोझै बैंक खातामा रकम हाल्दा वा चेक बुझ्दा प्रमाण रहने डरले बालकृष्णले स्मिथका देवरसँग नगदै बुझेका थिए । प्रहरीका अनुसार काठमाडौंको एक बैंकबाट रकम बुझेर स्मिथका देवरले बालकृष्णलाई दिएका थिए ।

नेपालबाट बच्चा लिएर सजिलै जान सकिने बताउँदै बालकृष्णले सबै चाँजोपाँजो मिलाएको प्रहरी अनुसन्धानले देखाएको छ । उनकै पहलमा स्मिथले ललितपुरको महालक्ष्मी नगरपालिकाबाट शिशुको जन्मदर्ता कागज बनाएकी थिइन् । सोही कागजका आधारमा काठमाडौंस्थित बेलायती दूतावासले स्मिथको शिशु भएको भन्दै राहदानी जारी गरेको थियो ।

अनुसन्धानमा संलग्न प्रहरीका अनुसार बेलायती नागरिक विमानस्थलबाट पक्राउ परेपछि बालकृष्णले नेपाल छोडने तयारी गरेको सूचना प्रहरीले पाएको थियो । बालकृष्णले यसअघि पनि विदेशी नागरिकलाई बालबालिका बेचेको हुन सक्ने आशंकासहित प्रहरीले उनको विगतबारे समेत अनुसन्धान थालेको छ ।

उपनिर्देशकका रूपमा बाल मन्दिर छिरेका उनी यसअघि पनि विभिन्न विवादमा तानिएका थिए । ०७२ माघमा उनी बाल मन्दिरको सिफलस्थित संरक्षण गृहमा रहेका चार बालबालिका निजी संस्थालाई बुझाएको विवादमा परेका थिए । संरक्षण गृहका चार बालबालिका फिर्ता नआएपछि केन्द्रीय बाल कल्याण समितिका तत्कालीन कार्यक्रम व्यवस्थापक नमुना भुसालले सिफल शाखाका प्रमुखलाई पत्र काटेकी थिइन् । सिफल केन्द्रका प्रमुख सुरज खनालले आफू दसैं बिदामा रहेका बेला उपनिर्देशकले आवश्यक प्रक्रिया पूरा नगरी बालबालिका लगेको जवाफ दिएका थिए । बाबुआमा जेल परेपछि बाल मन्दिरको संरक्षणमा रहेका चार बालबालिकालाई डंगोलले नीतिगत निर्णयबेगर निजी गैरसरकारी संस्थालाई दिएको तथ्य अनुसन्धानबाट खुलेको थियो ।

प्रकाशित : श्रावण ३२, २०७६ २१:२०
प्रतिक्रिया
पठाउनुहोस्

दाहाल भन्छन्, 'एकता नगरेको भए विकल्प रहन्थे कि ?'

कान्तिपुर संवाददाता

काठमाडौँ — पूर्वप्रधानमन्त्री एवं सत्तारूढ नेकपा अध्यक्ष पुष्पकमल दाहालले आफू नेतृत्वको तत्कालीन माओवादी केन्द्रले सबै विकल्प समाप्त पारेर तत्कालीन एमालेसित पार्टी एकता गरेको बताएका छन् ।

राष्ट्रिय चिकित्सक संघ र नेपाल प्रगतिशील चिकित्सक संघले शनिबार राजधानीमा आयोजना गरेको कार्यक्रममा उनले सबै विकल्प सकिएकाले एकतालाई सुदृढ गर्नुको विकल्प नरहेको धारणा राखे ।

पार्टी एकता सुदृढ नभए मुलुक सफल नहुने र कम्युनिस्ट आन्दोलनसमेत असफल नहुने उनको भनाइ छ । ‘कहिलेकाहीँ यसो (पार्टी एकता) नगरेको भए बरु कहीँ न कहीँ विकल्प रहिराख्थे कि भन्ने पनि लाग्छ,’ उनले भने, ‘सबै विकल्प सकेर पार्टी एकता गर्दा पनि हामीले सफलता प्राप्त गर्न सकेनौं भने कम्युनिस्ट आन्दोलन र राष्ट्रकै भविष्य बर्बाद हुने हो कि भन्ने चिन्ता छ ।’

यही चिन्ताका कारण अप्ठ्यारोभन्दा अप्ठ्यारो समस्या पनि हल गर्दै पार्टी प्रक्रियालाई टुंग्याउन लागिपरेको उनले बताए । शुक्रबार बसेको सचिवालय बैठकले पनि त्यस्तै अप्ठ्यारो समाधान गरेको उनको भनाइ छ ।

विगतमा कतिपयले आफूहरूलाई सशस्त्र द्वन्द्वबाट गणतन्त्र ल्याउन सक्दैनन् भनेको उल्लेख गर्दै उनले अहिले पनि पार्टी एकता टिक्न सक्तैन कि भन्ने टिप्पणी भइरहेको बताए । ‘कतिले पार्टी एकता सम्भव हुन्न भन्थे, तर हामीले गर्‍यौं,’ उनले भने, ‘तर हेर्दै जानुहोला अब सुदृढ एकतासहित नेकपा राष्ट्र हाँक्ने सशक्त पार्टी बन्नेछ ।’

प्रकाशित : श्रावण ३२, २०७६ २१:१६
पूरा पढ्नुहोस्
प्रतिक्रिया
पठाउनुहोस्