गंगटो हैन कमिलोजस्तै बनौँ : लालबाबू

रासस

काठमाडौँ — संघीय मामिला तथा सामान्य प्रशासनमन्त्री लालबाबु पण्डितले कम्युनिष्टहरुलाई गंगटोजस्तो नभई कमिलोजस्तो बन्नुपर्ने बताएका छन् । नेकपा बागलुङले शनिबार आयोजना गरेको कार्यकर्ता भेटघाट तथा छलफल कार्यक्रमलाई सम्बोधन गर्दै उनले गंगटो र कमिलाको उदाहरण दिँदै कार्यकर्तालाई एकताबद्ध हुन आग्रह गरेका छन् । 

“गंगटोले आफ्नै अभिभावकलाई देख्न सहँदैन, सिध्याउँछ, कमिलोले एकताबद्ध भएर आफूभन्दा ठूलो काम गर्छ”, उनले भने,“अब कार्यकर्ता गंगटो हैन कमिलो बन्न सिकौँ ।”

सङ्घीयताको कार्यान्वयन सफलरुपमा हुनु भनेको नेपाल समृद्धतर्फ लम्कनु हो भन्दै मन्त्री पण्डितले सबै कार्यकर्तालाई सकारात्मक सोचका साथ सरकारलाई सहयोग गर्न आग्रह गरे । उनले स्थानीय तहमा कर्मचारीको अभाव छिट्टै हटेर जाने जिकिर गरे ।

सरकार व्यावहारिक परिवर्तनका काम गर्दै आएको भन्दै मन्त्री पण्डितले परिणाम आउन केही समय लाग्ने बताए । उनले सरकार विरोधी तत्वहरु आफैँ निरुत्साहित भएर जानेसमेत दाबी गरे ।

अहिलेको सुखी नेपाली समृद्ध नेपाल भन्ने नारा सरकारको मात्र नभएर सबै कम्युनिष्टको भएको बताँउदै मन्त्री पण्डितले सानातिना कार्यमा नअल्झिन कार्यकर्तालाई आग्रह समेत गरे ।

प्रकाशित : श्रावण ३२, २०७६ १३:३३
प्रतिक्रिया
पठाउनुहोस्

अझै उठेनन् नेपाल-भारत सीमा स्तम्भ

मनोज पौडेल

कपिलवस्तु — एक महिनाअघि लढेका सीमास्तम्भ अझै उठन सकेका छैनन् । कपिलवस्तुको सुदुर पश्चिमको सीमा छुट्याउँदै बगेको दुई खोलामा ५ सीमा स्तम्भ लडेका छन् । एउटाको टुप्पो भच्चिएकोछ । असार २८ गते खोलामा आएको बाढीले सीमा स्तम्भ क्षतिग्रस्त बनेका थिए । महिना बढी भइसक्दा पनि सीमा स्तम्भ मर्मतसम्भार हुन सकेको छैन ।

विजयनगर गाउँपालिका-५ ठकुरापुर र भारतको बलरामपुर जिल्ला प्रतापपुरको सीमामा रहेका पिलर नं. ५७८/७ र ५७८/१० ढलेका छन् । त्यस्तै ७ नम्बर वडाको गेडुवाजोत र प्रतापपुरको सीमा रहेको पिलर नं. ५७७/७ र ५७७/९ ढलेका छन् ।

उक्त पिलर जहाँ गाडिएका थिए त्यही लडेको ठकुरापुर प्रहरी चौकीका प्रहरी जवान परशुराम यादवले बताए । पिलर नं. ५७८/७ र र ५७८/१० पानी बाहिर देखिएको छ । ५७७/९ पिलरको टुप्पो मात्र देखिन्छ ।

बालुवाले पुरिएको छ । पिलर नं. ५७७/७ लाई पानीले डुबाएकोछ । त्यस्तै विजयनगर गाउँपालिका-१ चमरका जंगलमा २ वटा सीमा स्तम्भ क्षति भएकोछ । उनीहरुको नम्बर भने थाह हुन सकेको छैन् ।

वनको सव डिभिजन कार्यालय गुगौलीको गस्ती टोलीले साता अघि क्षति भएको सीमा स्तम्भ फेला पारेको थियो । अर्रा खोलामा आएको बाढीले एउटा सीमा स्तम्भ पुरेको छ । अर्कोको टुप्पो भाच्चिएकोछ । ‘पानी वहाव र बाढीका कारण सीमा स्तम्भहरु सर्दैछन्,' ठकुरापुरका रामबहादुर थापाले भने, ‘सक्दो छिटो बनाउनु पर्छ ।’ नभए यही समस्याले सीमा विवाद हुन सक्ने उनले बताए ।

सीमा स्तम्भ रेखदेख गर्ने जिम्मा पाएको सशस्त्र प्रहरीका प्रमुख उपरिक्षक जनक पुरीले भने आफू नयाँ आएकाले बुझ्ने क्रममा रहेको बताए । बुझेर थप जानकारी दिने उनले बताए । 'गृहमा जानकारी गराइसकेका छौं,' प्रजिअ गजेन्द्रबहादुर श्रेष्ठले भने, 'बर्खापछि मर्मत होला जस्तो छ ।'

प्रकाशित : श्रावण ३२, २०७६ १३:३२
पूरा पढ्नुहोस्
प्रतिक्रिया
पठाउनुहोस्