बालिका बेचबिखन आरोपमा बालमन्दिरकै निर्देशक पक्राउ

जनकराज सापकोटा

काठमाडौँ — बालिका बेचबिखनमा सहयोगी भूमिका खेलेको आरोपमा प्रहरी परिसर काठमाडौंले बाल मन्दिरका निर्देशक बालकृष्ण डंगोललाई पक्राउ गरेको छ ।

केही दिनअघि अर्काको सन्तानलाईआफ्नो छोरी बनाएर लैजाने प्रयास गरेकी बेलायती नागरिक डिना स्मिथलाई त्रिभुवन अन्तर्राष्ट्रिय विमानस्थल अध्यागमनले रोकेको थियो ।

स्मिथले ललितपुरको महालक्ष्मी नगरपालिकाले बनाइदिएको शिशु जन्मदर्ता कागजका आधारमा काठमाडौंस्थित बेलायती दूतावासबाट राहदानी निकालेर बच्चा लैजान खोजेकी थिइन् । प्रहरीसँग बयानमा स्मिथले बाल संगठनका निर्देशक बालकृष्ण डंगोलको सहयोगमा बच्चा हात पारेको र त्यसपछि आवश्यक कागजपत्र बनाएको बताएपछि प्रहरीले बालकृष्णलाई पक्राउ गरेको हो ।

बच्चा लिनकै निम्ति स्मिथ २६ जुलाईमा काठमाडौं आएकी थिइन् । प्रहरीका अनुसार स्मिथले लैजान खोजेकी बालिका २८ जुलाईमा गर्भपतन केन्द्रमा जन्मिएको देखिन्छ । उनको गतिविधि शंकास्पद देखिएको कागजात भेटिएपछि विमानस्थल अध्यागमनले बेलायत जान रोकेको थियो । त्यतिखेर स्मिथले बच्चा आफूले नै नेपालमा जन्माएको झूटो दाबी गरेकी थिइन् ।

अध्यागमन अधिकारीले थापाथलीको परोपकार प्रसूति गृहमा उनको स्वास्थ्य परीक्षण गरेपछि स्मिथ गर्भवती नरहेको र सन्तान नजन्माएको प्रमाणित भएको थियो । त्यसपछि बयान फेर्दै उनले काठमाडौंकै एक गर्भपतन केन्द्रमा जन्मिएको बच्चा आफूले लैजान लागेको बताएकी थिइन् । स्रोतका अनुसार राजधानीकै एक गर्भपतन केन्द्रले बाल मन्दिरमा राख्ने गरी उक्त बच्चा डंगोललाई जिम्मा लगाएको थियो ।

तर डंगोल ललितपुरको महालक्ष्मी नगरपालिका मूल घर भई बेलायत बस्ने राम श्रेष्ठमार्फत स्मिथसँग सम्पर्कमा पुगेका थिए । स्रोतका अनुसार राम र स्मिथ बेलायतमा लामो समयदेखि बस्दै आएका छन् । स्मिथले धर्मपुत्रीको चाहना गरेपछि रामले उनलाई डंगोलसँग सम्पर्क गराइदिएका थिए ।

प्रहरीका अनुसार डंगोलले काठमाडौं उपत्यकामा रहेका गर्भपतन केन्द्रहरूमा सम्पर्क राखेर अनिच्छापूर्वक वा करकापजन्य परिस्थितिमा जन्मिएका बच्चाको विवरण तयार पार्दै आएको अनुसन्धानले देखाएको छ । डंगोलले गर्भपतन केन्द्रमा बच्चा जन्मिने समय अगावै धर्मपुत्र वा धर्मपुत्री चाहिरहेका विदेशी खोज्थे । त्यस्ता विदेशीलाई नेपाल बोलाएर फर्जी कागजातका आधारमा विदेश पठाउने भूमिका खेल्थे । स्मिथलाई बच्चा लैजान डंगोलले नै ललितपुरको महालक्ष्मी नगरपालिकाका केही कर्मचारीलाई पनि उपयोग गरेका थिए । स्रोतले भन्यो, ‘स्मिथसँग मात्रै डंगोलले चार लाख रुपैयाँ लिएको खुलेको छ ।’

उनले स्मिथका देवरबाट ४ लाख रुपैयाँ नगद बुझेको सीसीटीभी फुटेज पनि प्रहरीले प्राप्त गरेको छ । सोझै बैंक खातामा रकम हाल्दा वा चेक बुझदा प्रमाण रहने डरले डंगोलले स्मिथका देवरसँग नगद रकम बुझेका थिए । काठमाडौंको एक बैंकबाट रकम बुझेर देवरले डंगोलको हातैमा रकम थमाइदिएका थिए । प्रहरी स्रोतले भन्यो, ‘डंगोलको अस्वाभाविक सम्पत्तिबारे पनि छानबिन आकर्षित हुन सक्ने देखिन्छ ।’ प्रहरीका अनुसार डंगोलले बच्चा लैजानका निम्ति सबै कागजात सजिलै मिलाइदिने भन्दै स्मिथलाई आश्वस्त तुल्याएको देखिन्छ ।

प्रहरी परिसर काठमाडौंका अनुसार स्मिथविरुद्ध मानव बेचबिखनको मुद्दा चलाउने प्रक्रिया अघि बढेको छ । डंगोलका हकमा बुधबारै जिल्ला अदालत काठमाडौंबाट ५ दिन थुनामा राखी अनुसन्धान गर्ने अनुमति लिएको छ । परिसरका डीएसपी होबिन्द्र बोगटीले डंगोलविरुद्ध मानव बेचबिखन कसुरमा मुद्दा चलाइने बताए । अध्यागमन विभागका महानिर्देशक ईश्वर पौडेलले विदेशी नागरिकले फर्जी कागजातका आधारमा धर्मपुत्री भन्दै बच्चा लिएर जाने घटना गम्भीर भएको बताए ।

उनले यस्ता घटनामाथि गम्भीर निगरानी गरिरहेको बताए । केही महिनाअघि मात्रै काठमाडौंस्थित दक्षिण कोरियाली दूतावासबाट फर्जी पत्रका आधारमा आवश्यक कागजात बनाएर एक कोरियाली महिलाले नेपाली बच्चा लैजान खोजेकी थिइन् । त्यतिबेला पनि अध्यागमनका अधिकारीले ती कोरियालीलाई विमानस्थलबाटै फर्काइदिएका थिए ।

प्रहरीले स्मिथले कसरी वडा कार्यालयबाट जन्मदर्ताको कागजात बनाइन्, त्यसका निम्ति क–कसले कसरी सहयोगी भूमिका खेल्यो भन्नेबारे पनि अनुसन्धान अगाडि बढाएको छ । प्रहरी परिसर काठमाडौंका एक अधिकारीले काठमाडौंस्थित बेलायती दूतावासले कसरी बच्चाको राहदानी बनाइदियो भन्नेबारे पनि बुझ्ने काम थालिएको बताए ।

काठमाडौंस्थित बेलायती दूतावासले अन्ना बेला लक्ष्मी स्मिथ श्रेष्ठको नाममा बालिकाको राहदानी बनाएको जनाएको छ । अध्यागमन विभाग स्रोतका अनुसार काठमाडौंस्थित बेलायती दूतावासले स्मिथको प्रकरणमा शंकास्पद चासो देखाएको बतायो । स्रोत भन्छ, ‘स्मिथलाई बच्चा लिएर नेपालबाट जाने काममा सहजीकरण गरिदिनका लागि दूतावासले अध्यागमनलाई पत्र नै लेखेको छ ।’ बालिकालाई अहिले कान्ति बाल अस्पतालमा राखिएको छ ।

प्रकाशित : श्रावण ३०, २०७६ ०८:३९
प्रतिक्रिया
पठाउनुहोस्

जम्मु–कश्मीर विवाद : नेपालीबारे दूतावासको सुरक्षा चासो

सुरेशराज न्यौपाने

नयाँदिल्ली — जम्मु–कश्मीरमा रहेका नेपालीहरूको पछिल्लो अवस्थाका सम्बन्धमा दिल्लीस्थित नेपाली दूतावासले यहाँका प्रवासी नेपालीहरूका संगठनका प्रतिनिधिहरूसँग छलफल गरेको छ ।

नरेन्द्र मोदी सरकारले गत साता जम्मु–कश्मीरको विशेषाधिकार खारेजलगायतका निर्णयले भारत र पाकिस्तानबीचको सम्बन्ध तनावपूर्ण बन्दै गइरहेका बेला त्यहाँ विभिन्न पेसाव्यवसाय गर्दै आएका करिब ८० हजारको संख्यामा रहेका नेपालीको सुरक्षाबारे छलफल केन्द्रित थियो ।

छलफलमा भारतका लागि नेपाली राजदूत नीलाम्बर आचार्यले प्रवासी संगठनका प्रतिनिधिहरूसँग जम्मु–कश्मीरमा रहेका नेपालीको सुरक्षालगायतका विषयमा के–कसरी अगाडि बढ्न सकिन्छ भन्ने जिज्ञासा राखेका थिए । राजदूत आचार्यसँगको छलफलमा नेपाल कम्युनिस्ट पार्टी, नेपाली कंग्रेस, राष्ट्रिय जनमोर्चालगायता राजनीतिक दलनिकट प्रवासी संगठनका प्रतिनिधि र दूतावासका अन्य अधिकारीको समेत उपस्थिति थियो ।

साथै, प्रवासी संगठनका प्रतिनिधिहरूले जम्मु–कश्मीरमा देखिएका पछिल्लो तनावका कारण त्यहाँ स्थायी र अस्थायी रूपमा बस्दै आएका नेपालीहरूले भोग्नुपरेका समस्याको जानकारी गराएका थिए । विशेषगरी कश्मीर उपत्यकामा नेपालीहरूको जीवनयापन दिन प्रतिदिन कष्टकर बन्दै गएको र नेपाल सरकारले भारत सरकारसँगको समन्वयमा आवश्यक पहल थाल्नुपर्ने सुझाव पनि उनीहरूले दिएका थिए ।

‘जम्मु–कश्मीरका नेपालीले भोग्नुपरेको समस्याका बारेमा थाहा पाएसम्मका जानकारी राख्यौं,’ छलफलमा सहभागी पूर्व एकीकृत नेकपा माओवादीनिकट पूर्वअखिल भारत नेपाली एकता मञ्चका केन्द्रीय सचिव आरबी खड्काले भने । प्रवासी नेपाली संगठनहरूका अनुसार जम्मु–कश्मीरका कठुवा, साम्बा, जम्मु सहर, उद्यमपुर, कश्मीरको श्रीनगर, पहलगाम, कार्गिल, लेह–लद्दाक, बारामुला, पुलवामा, गुलमोहर लगायत स्थानमा नेपालीको बाक्लो उपस्थिति छ । तिनीहरूमध्ये धेरैजसो मजदुरी, चौकीदारी, कुक, भरिया र साना व्यापारलगायतका काममा संलग्न रहेको बताइन्छ ।

मोदी सरकारले गत सोमबार जम्मु–कश्मीरले उपभोग गर्दै आएको संविधानको धारा ३७० र धारा ३५ (क) खारेज गरे पछि त्यहाँको परिस्थिति तनावपूर्ण बनेको हो जम्मु र लेह–लद्दाक क्षेत्रमा परिस्थिति केही सहज भए पनि कश्मीर उपत्यकाभित्र त्यसमा पनि श्रीनगरको स्थिति भने अझै असहज रहेको छ । ईदका लागि आइतबार सुरक्षा व्यवस्था केही खुकुलो बनाइएको भए पनि बुधबार स्वतन्त्रता दिवसलाई ध्यानमा राख्दै पुनः कडाइ गरिएको छ ।

जसका कारण विशेषगरी श्रीनगर र आसपासका जिल्लामा रहेका नेपालीलाई दैनिक उपभोग्य सामान किन्न पनि कडाइ भएको धारणा दूतावासमा भएको छलफलमा सहभागी प्रवासी नेपाली संगठनका प्रतिनिधिहरूले राखेका थिए । साथै, जम्मु–कश्मीरमा देखिएको तनावपूर्ण स्थितिले त्यहाँको पर्यटन क्षेत्रमा ठप्प भएको हुँदा त्यस क्षेत्रमा काम गर्ने नेपालीको रोजगारी नै संकट परेको समेत उनीहरूले बताएका थिए ।

साथै आफूहरूले जम्मु–कश्मीरमा रहेका नेपालीको अवस्था बुझ्न दूतावास र प्रवासी संगठनहरूको प्रतिनिधिहरू सम्मिलित संयुक्त टोली पठाउनका पहल गर्नसमेत दूतावासलाई आग्रह गरेको समेत उनलेजानकारी दिए ।

प्रकाशित : श्रावण ३०, २०७६ ०८:३६
पूरा पढ्नुहोस्
प्रतिक्रिया
पठाउनुहोस्