गए राति कोटेश्वरमा ट्राफिकको गाडीले ठक्कर दिएको एक व्यक्तिको मृत्यु

कान्तिपुर संवाददाता

काठमाडौँ — मंगलबार राति महानगरीय ट्राफिक प्रहरी महशाखाको बा१झ ७८६६ नम्बरको सीआरबी भ्यानले कोटेश्वरमा एक अपरिचित व्यक्तिलाई ठक्कर दिएको छ । गाडीको ठक्कर लागि गम्भिर घाइते भएका उनको उपचारको क्रममा ट्रमा सेन्टरमा मृत्यु भएको छ । उनको नाम भने खुलेको छैन ।

महानगरीय प्रहरी परिसर काठमाडौंका डीएसपी होबिन्द्र बोगटीका अनुसार बालकुमारीबाट कोटेश्वरतर्फ आइरहेको उक्त गाडीले कोटेश्वरमा रहेको आकाशे पुल मुनी ती व्यक्तिलाई ठक्कर दिएको हो।

घटनाको समयमा गाडी चलाइरहेका प्रहरी जवान विनोदकुमार गिरीलाई हाल बानेश्वर वृत्तमा नियन्त्रणमा राखिएको छ। डीएसपी बोगटीका अनुसार राति अचानक पुलमुनीबाट बाटो काट्दा दुर्घटना भएको देखिएको छ।

प्रकाशित : श्रावण २९, २०७६ ०८:४५
प्रतिक्रिया
पठाउनुहोस्

लामो दूरीमा २ चालक नराखे कारबाही

कान्तिपुर संवाददाता

काठमाडौँ — यातायात व्यवस्था विभागले लामो दूरीमा चल्ने सार्वजनिक यातायातमा अनिवार्य २ चालक राखेर नचलाए व्यवसायी (गाडी मालिक या कम्पनी) लाई कारबाही गर्ने चेतावनी दिएको छ ।

लामो दूरीमा एक जनामात्र चालक हुँदा बस त्रिशूली नदीमा खसेर दुर्घटनामा परेपछि विभागले मंगलबार सूचना जारी गरी २ चालक हुनुपर्ने कानुनी व्यवस्थालाई कडाइका साथ कार्यान्वयन गर्ने जनाएको हो । लामो दूरीमा चल्ने गाडीमा दुई जना चालक भए/नभएको मुलुकभर अनुगमन गरिने विभागले जनाएको छ ।

विभागले प्रस्थानबिन्दुबाट २५० किमि वा त्योभन्दा बढी दूरीमा चल्ने गाडीले अनिवार्य २ चालक नराखेको पाइए सवारीधनी या कम्पनीलाई नियन्त्रणमा लिई कारबाही गर्ने बताएको छ । सवारी तथा यातायात व्यवस्था ऐन, २०४९ को दफा १०४ मा लामो दूरीमा चल्ने गाडीमा कम्तीमा २ चालक अनिवार्य राखी प्रत्येक ६/६ घण्टामा पालैपालो चलाउनुपर्ने प्रावधान छ ।

एउटै चालकले लामो दूरीमा गाडी चलाउँदा थकानका कारण दुर्घटना बढेपछि यस्तो कानुनी व्यवस्था गरिएको थियो । विभागले मध्यम दूरीमा गाडीका चालकलाई प्रत्येक ४ घण्टामा आधा घण्टा विश्राम दिने व्यवस्थालाई समेत कडाइका साथ पालना गर्न आग्रह गरेको छ । सवारी तथा यातायात व्यवस्था ऐनमा ४ घण्टाभन्दा बढीको दूरीमा चल्ने यात्रुवाहक गाडीका चालकले प्रत्येक ४ घण्टामा आधा घण्टा विश्राम लिनुपर्ने व्यवस्था छ ।

लामो दूरी तथा रात्रिसेवाका चालक निदाउने, थकान र तोकिएको समयमै गन्तव्यमा पुग्नुपर्ने मानसिक दबाबका कारण दुर्घटना हुने गरेको छ । विभागले सार्वजनिक यातायातलाई सुरक्षित र व्यवस्थित बनाउन दिइएको निर्देशन कार्यान्वयन नगरे सम्बन्धित यातायात व्यवसायीलाई कारबाही गरिने जनाएको छ ।

प्रकाशित : श्रावण २९, २०७६ ०८:३७
पूरा पढ्नुहोस्
प्रतिक्रिया
पठाउनुहोस्