त्रिशूली दुर्घटना : मृतकको संख्या ९ पुग्यो, २० भन्दा बढी बेपत्ता

हरिहरसिंह राठौर

धादिङ — बेनीघाट रोराङ–३, सलाङघाटमा भएको बस दुर्घटनामा परी मृत्यु हुनेको संख्या ९ पुगेको छ । २० भन्दा बढी यात्रु हराइरहेका छन् । फेला परेका शवमध्ये ८ जनाको सनाखत भएको छ । 

भारतीय नागरिक अजय दास, विजय कुर्मी तथा बेपत्ता कन्डक्टर गोविन्द भनिने ऋषि उप्रेतीको शव शुक्रबारै पहिचान भएको थियो । कृष्णभीरनेर फेला परेका दुई शव मलंगवा–१ का ४० वर्षीय सुनिलकुमार श्रीवास्तव र उनकी ३५ वर्षीया श्रीमती निमाको भएको आफन्तले पहिचान गरेका छन् ।

उप्रेतीको शव गोरखातर्फको किनारमा भेटिएपछि प्रहरीले दिएको तस्बिरका आधारमा आफन्तले पहिचान गरेका थिए । शुक्रबार देवघाट–जुगेडीमा फेला परेका ६ शवमध्ये ५ को सनाखत भइसकेको छ । एकको सनाखत हुन नसकेको प्रहरी उपरीक्षक राजकुमार बैदवारले बताए । दुर्घटनामा बेपत्ता परिवारका आफन्त शुक्रबारबाटै आउने क्रम जारी छ । सनाखत भएका ८ वटा शव शनिबार आफन्तको जिम्मा लगाइएको छ ।

सर्लाहीको मलंगवाबाट काठमाडौं हिँडेको सृष्टि डिलक्स ना६ख ७४६९ को बस शुक्रबार बिहान त्रिशूली नदीमा खसेको थियो । प्रहरी उपरीक्षक बैदवारका अनुसार दुर्घटनामा तीन जनाको शव घटनास्थलमा र अन्य ६ को चितवन, नारायणगढ, देवघाट, मुग्लिनलगायत नदी किनारमा भेटिएका थिए ।

केही यात्रु पौडी खेलेर र केही भीरमा अडिएर बाँचेका थिए । घाइते १६ जनाको ट्रमा सेन्टर काठमाडौंमा र बाँकीको अन्य अस्पतालमा उपचार भइरहेको छ । बसमा ४२ यात्रु, चालक, परिचालक र कन्डक्टर सवार थिए । दुर्घटनामा २० भन्दा बढी यात्रु अझै हराइरहेको र प्रहरीले खोजी गरिरहेको प्रहरी उपरीक्षक बैदवारले बताए ।

प्रकाशित : श्रावण २५, २०७६ २०:३७
प्रतिक्रिया
पठाउनुहोस्

साताका उत्कृष्ट ७ तस्बिर

कान्तिपुर संवाददाता

काठमाडौँ — साउनको अन्त्यतिर मनसुन केही सुस्ताएको छ । काठमाडौं उपत्यकाका सडकमा परेका खाल्डैखाल्डाले सवारी दुर्घटनाको जोखिम बढाइरहेको छ भने अर्कोतिर चालक-सहचालकले हैरानी ब्यहोर्दै आएका छन् । यस साता ईकान्तिपुर डटकममा वाग्मती करिडोरअन्तर्गत पशुपतिस्थित गुहेश्वरी सडक खण्डको खाल्डोमा फसेको माइक्रोको तस्बिरले प्राथमिकता पायो । त्यस्तै पर्यटकीय क्षेत्र स्वयम्भू, चोभारको गुम्बा क्षेत्र र चन्द्रागिरीबाट देखिएको काठमाडौं उपत्यकाको तस्बिरहरु पनि छापिए । यस्तै विश्व आदिवासी दिवसमा सहभागी र पाटन दरबार क्षेत्रमा पर्यटक रमिरहेका पर्यटक लगायतका तस्बिर पनि यस साता कान्तिपुरमा प्राथमिकताका साथ प्रकाशित भएका छन् ।

२५ औं विश्व आदिवासी दिवसको अवसरमा काठमाडौं भृकुटीमण्डपबाट निकालिएको र्‍यालीमा सांस्कृतिक भेषभुषामा सहभागी बालिका । तस्बिर : केशव थापा

चन्द्रागिरिडाँडाबाट देखिएको काठमाडौं उपत्यका । तस्बिर : कविन अधिकारी

लोक सेवा आयोगको विरुद्धमा निकालिएको मौन जुलुसमा उपस्थित महिला । तस्बिर : सन्जोग मानन्धर

स्वयम्भू स्तुपामा रंग भर्दै । तस्बिर : केशव थापा

काठमाडौंको चोभारमा रहेको गुम्बा माथि देखिएको बादल । तस्बिर : प्रकाशचन्द्र तिमिल्सेना

ललितपुरको पाटन दरबार स्क्वायरमा बिहीबार फोटो खिच्दै पर्यटक । सरकारले आउँदो सन् २०२० मा २० लाख पर्यटक भित्र्याउने लक्ष्यसहित नेपाल भ्रमण वर्ष मनाउँदैछ । तस्बिर : हेमन्त श्रेष्ठ

प्रकाशित : श्रावण २५, २०७६ २०:२३
पूरा पढ्नुहोस्
प्रतिक्रिया
पठाउनुहोस्