सिंगो गाउँपालिकामा एक जना सचिव

दुर्गम भएकैले भोटखोला गाविसमा कर्मचारी जान मान्दैनन् । गए पनि काज वा सरुवा मिलाएर हिँडिहाल्छन् ।
कान्तिपुर संवाददाता

(संखुवासभा) — भोटखोला गाउँपालिकामा पाँचवटा वडा छन् । एउटा वडाबाट अर्कोमा पुग्न दुई दिनसम्म लाग्छ । तर, यी सबै वडा हेर्न जम्मा एक जना सचिव छन् । पर्याप्त वडा सचिव नहुँदा स्थानीय तहले प्रदान गर्ने सेवा प्रभावकारी हुन सकेको छैन ।

ZenTravel



Meroghar

‘सिंगो गाउँपालिकामा एक जना मात्रै वडा सचिव हुँदा हैरानी छ,’ हटियाका थुदोक भोटेले भने, ‘काम लिन समस्या भयो, एक जना वडा सचिवले सबैतिरको काम गर्न भ्याउँदैनन्। मार हामीले खेपिरहेका छौं।’

वडा सचिव दाबा लामा एक्लैले सबै वडा हेर्नुपर्दा समयमा काम नभएर सेवाग्राही मर्कामा परिरहेको स्विकार्छन्। भोटखोला जिल्लाको दुर्गम मानिन्छ। गाउँपालिका केन्द्र पुग्न २ दिन हिँड्नुपर्छ। ‘दरबन्दीअनुसारका कर्मचारी नहुँदा समस्या छ,’ दावाले भने, ‘कर्मचारी कोही भोटखोला आउन मान्दैनन्। यो गाउँपालिकामा कुल दरबन्दी २७ जना छ तर पाँच जना अस्थायी कर्मचारीबाट काम चलाइरहनुपरेको छ।’

गाउँपालिकाका अध्यक्ष तेम्बा भोटे पटकपटक केन्द्रसम्म धाउँदा पनि कर्मचारी नआएको बताउँछन्। ‘भोटखोला गाउँपालिका दुर्गम भएको कारणले नै कर्मचारी आउन मान्दैनन्,’ उनले भने, ‘मन्त्रालयले सरुवा गरेर पठाए पनि बाध्यतामा एक/दुई महिना बस्छन् अनि तत्काल सरुवा वा काज मिलाएर गइहाल्छन्।’ भएका कर्मचारी टिकाउन गाउँपालिकाले थप चार हजार दुर्गम भत्ता दिने निर्णय गरेको छ।

सडक सञ्जालले नछोएको भोटखोलाका ५ वटै वडा हिँडेर पुग्नुपर्छ। सबै वडा कार्यालय पुगेर सेवा दिन ज्यादै कठिन हुने सचिव लामाले बताए। ‘हरेक वडामा महिनामा तीन/चार दिनमा एकपटक सेवा दिन पुग्छु,’ उनले भने, ‘दैनिक सबै वडा पुग्न सकिँदैन।’

भोटखोलाको थुदामबाट वडा नम्बर २ को कार्यालय च्याम्ताङ आउन करिब तीन दिन लाग्छ। वडा कार्यालय पुगे पनि दैनिक रूपमा सेवा दिन नसक्दा स्थानीयले हैरानी खेप्नुपरेको छ। भोटखोलामा करिब ६ हजार ५ सय ७६ जनसंख्या छ। सडक, विद्युत् र सञ्चारसमेत छैन। दक्ष जनशक्ति र सञ्चारसमेत नहुँदा सेवा प्रभावकारी हुन नसकेको कर्मचारी बताउँछन्।

भोटखोलामा अहिले प्रमुख प्रशासकीय अधिकृत, सहलेखापाल, नायब सुब्बा (वडा सचिव र कृषि शाखा प्रमुख), खरिदार, खानेपानी सरसफाइ प्राविधिक छन्। कर्मचारी समायोजनपछि पनि दरबन्दीअनुसार खटिएकाहरू आएका छैनन्। ‘स्थायी दरबन्दीका ३ जना कर्मचारीबाट सेवा दिनुपरेको छ,’ अध्यक्ष भोटेले भने, ‘केही कर्मचारी करारमा नियुक्त गरेर चलाइरहेका छौं।’

प्रकाशित : श्रावण १७, २०७६ १९:४१
ADVERTISEMENT
प्रतिक्रिया
पठाउनुहोस्

‘मिस इंग्ल्यान्ड–२०१९’ को सेकेन्ड रनरअप बनिन् प्रतिष्ठा

कान्तिपुर संवाददाता

लन्डन — बेलायतको प्रतिष्ठित सौन्दर्य प्रतियोगिता ‘मिस इंग्ल्यान्ड–२०१९’ मा नेपाली चेली प्रतिष्ठा ‘तृष’ राउत सेकेन्ड रनरअप बन्न सफल भएकी छन् । २२ हजार आवेदकमध्येबाट छानिएर फाइनल पुगेकी प्रतिष्ठाले बिहीबार साँझको ग्रान्ड फिनालेमा सेकेन्ड रनरअपको उपाधि जितेकी हुन् । न्यू क्यासल अपन टाइनमा ५४ प्रतिस्पर्धीबीच भएको फाइनलमा उनले ‘च्यारिटी क्वीन’ को उपाधि पनि पाइन् । 

मानसिक स्वास्थ क्षेत्रमा काम गर्ने च्यारिटी संस्थाका लागि उनले १० हजार ६ सय ३९ पाउन्ड संकलन गरेकी थिइन् । जुन रकम प्रतियोगीमध्ये सबैभन्दा उच्च हो । उनको सहयोगार्थ बेलायतको नेपाली समुदाय पनि जुटेको थियो ।

प्रतिष्ठाले खुसी ब्यक्त गर्दै जितले आफ्नो आत्मविश्वास अभिवृद्धि साथै महिला सशक्तिकरणमा लाग्न उत्प्रेरित गरेको बताइन् । उनले अहिले मानसिक स्वास्थ जटिल विषय भएको उल्लेख गर्दै भविष्यमा यही क्षेत्रमा काम गर्ने जनाइन् ।
अल्डरसट निवासी २६ वर्षीया प्रतिष्ठा भूपू गोर्खा प्रकाश राउतकी छोरी हुन् ।

हङकङमा जन्मिएकी प्रतिष्ठा ५ वर्षको उमेरदेखि बेलायतमा छिन् । उनले १६ वर्षमै मोडलिङ थालेकी हुन् ।

युनिभर्सिटी अफ ब्राइटनबाट इन्टेरियर आर्किटेक्चरमा ब्याचलर उत्तीर्ण प्रतिष्ठा पेसाले प्लोर प्लान आर्किटेक्ट हुन् । उनले गत वर्ष बेलायतको चर्चित फार्नबोरो एयर शोको फ्लोर प्लान पनि गरेकी थिइन् । छिट्टै रेजिडेन्सियल हाउजिङ आर्किटेक्ट फर्म खोल्ने र मोडलिङ पनि एकसाथ अघि बढाउने उनले बताइन् ।

प्रकाशित : श्रावण १७, २०७६ १९:२७
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×