[अपडेट] झडपमा घाइते नख्खु जेलका कैदीको मृत्यु

कर्तव्य ज्यान मुद्दामा कैद भुक्तान गरिरहेका पूर्णबहादुर राजी र पवनकुमार महतोबीच शुक्रबार कुटाकुट भएको थियो ।राजी मानसिक रोगी थिए ।

......

नख्खु जेल भित्र कैद भुक्तान गरिरहेका दुई कैदीबीच झगडा हुँदा एकजना सख्त घाइते भएका छन् । नख्खु जेलका जेलर बेदप्रकाश अर्यालका अनुसार नयाँ ब्लकमा घाम तापिरहेका पवन कुमार महतो र पूर्णबहादुर राजीबीच झगडा भएको थियो ।

कर्तव्य ज्यान मुद्दामा कैद भुक्तान गरिरहेका र मानसिक रोगी समेत रहेका पूर्णबहादुर राजीलाई कर्तव्य ज्यान मुद्दामै कैद भुक्तान गरिरहेका पवन कुमार महतोले टाउकोमा प्रहार गरेका थिए ।

जेलर अर्यालका अनुसार एक अर्काको जुम्रा हेरिरहेका उनीहरुबीच एक्कासी झगडा भएको थियो । विवादबीच पवनले भुइँमा ओछ्याएको ब्लक निकालेर पूर्णको टाउकोमा प्रहार गरेका थिए । घाइते पूर्णलाई तत्कालै सुरक्षाकर्मीले उपचारका लागि वीर अस्पताल पुर्‍याएको जेलर अर्यालले बताए । उनको अवस्था चिन्ताजनक रहेपनि पछिल्लो अवस्थाबारे अस्पतालबाट आधिकारिक जानकारी नआइसकेको उनले बताए ।