नवनियुक्त पर्यटनमन्त्रीले भने, 'कसैलाई काम लगाउन होइन सिक्न आएको हुँ'

अधिकारीको उत्तराधिकारी भएर आएको छु
रासस

काठमाडौँ — नवनियुक्त संस्कृति, पर्यटन तथा नागरिक उड्डयनमन्त्री योगेश भट्टराईले मुलुकको इज्जत र जनताको अपेक्षा पूरा गर्नेतर्फ आफूले ध्यान केन्द्रित गर्ने बताएका छन् ।

बुधबार मन्त्रालयमा पदभार ग्रहणपछि आयोजित स्वागत समारोहमा मन्त्री भट्टराईले भने, “तपाईहरुले मलाई काम लगाउनुहुनेछ, कस्तो काम गर्दा मुलुकको इज्जत बढ्छ, प्रधानमन्त्रीले र जनताले सोचेको अपेक्षा पूरा हुन्छ, के गर्दा चुनौतीमाथि सफलता हासिल हुन्छ, भोलिका दिनमा विषयगत हिसाबले छलफल गरेर जानेछु ।”

केही दिनभित्रैमा प्रधानमन्त्रीसमक्ष मन्त्रीको हिसाबले कामको करार सम्झौता गर्ने उल्लेख गर्दै मन्त्री भट्टराईले भने, “हामी जे गर्न सक्छौँ, त्यो कुरा भन्छौँ, जे हुन सक्दैन, त्यो के कारणले भएन भनेर पारदर्शी ढङ्गले बताउने छौँ ।” निर्देशन कम हुने र सामूहिक निर्णयबाट अघि बढ्ने बताउँदै उनले प्रधानमन्त्रीले राखेको आशा र अपेक्षा पूरा गर्ने उल्लेख गरे ।

कुनै पूर्वघोषित कार्यक्रम नभई परिस्थितिले आफू मन्त्री हुन आइपुगेको प्रष्ट्याउँदै उनले कसैलाई काम लगाउन होइन काम सिक्न आएको बताउनुभयो । राष्ट्रिय गौरवका आयोजनालाई समयमै सक्ने तथा सन् २०२० को नेपाल भ्रमण वर्ष साकार पार्ने मन्त्री भट्टराईले प्रतिबद्धता जनाए ।

मुलुकलाई समृद्ध बनाउने राष्ट्रिय आकाङ्क्षा पूरा गर्न कुनै कसर बाँकी नराख्ने मन्त्री भट्टराईको भनाइ थियो । नेपाल वायुसेवा निगमको विश्वसनियता कायम गर्नेसमेत उनले प्रतिबद्धता जनाए । सञ्चारमाध्यमलाई कुनै पनि बधाई नछाप्न अनुरोध गर्दै उनले मन्त्रीका रुपमा नियुक्तिका लागि सहयोग गर्ने पार्टीका नेतृत्वप्रति आभार प्रकट गरे ।

अधिकारीको उत्तराधिकारी भएर आएको छु

मन्त्री भट्टराईले विसं २०७५ फागुन १५ गते तत्कालिन मन्त्री रवीन्द्र अधिकारीको दुःखद् निधनले असल युवा राजनीतिकर्मी र घनिष्ट मित्र गुमाएको स्मरण गरे । उनले परिस्थिति र घटनाक्रमले अधिकारीको कुर्सीमा आफू आइपुगेको बताए । “यो मन्त्रालयलाई उहाँकै नेतृत्व आवश्यक थियो, प्रधानमन्त्रीले सही चयन गर्नुभएको थियो, अफसोच प्रकृतिसँग हामीले जित्न सकेनौँ र उहाँलाई अल्पआयुमै गुमाउन पुग्यौँ, उहाँको एउटा उत्तराधिकारी जस्तो भएर म आएको छु, यसोभन्दा मलाई कुनै हिनताबोध छैन, गर्व छ”, मन्त्री भट्टराईले भने ।

अधिकारीले यो मन्त्रालयमा जे कदम उठाउनुभएको थियो, त्यो कामलाई आगामी दिनमा अझै माथि बढाउने विश्वास व्यक्त गर्दै उनले यसअघि जिम्मेवारी सम्हालिसकेको सल्लाह लिएर अघि बढ्ने प्रतिबद्धता व्यक्त गरे ।

प्रकाशित : श्रावण १५, २०७६ २०:२७
प्रतिक्रिया
पठाउनुहोस्

मेक्सिकोमा पत्रकारको हत्या 

एएफपी

मेक्सिको सिटी — मेक्सिकोमा एक जना पत्रकारको हत्या भएको छ । मोरालेस राज्यमा हत्या गरिएका ती पत्रकारको शब एउटा बेवारिसे कारमा फेला छ । सञ्चार सम्बद्ध संघसंस्थाले यो घटनाको तत्कालै अनुसन्धान गर्न सरकारसँग माग गरेका छन् ।

प्रहरीका अनुसार गुरेरो इन्स्टान्टे पोर्टलका निर्देशक रोजेलियो बारागानको शव कारभित्र फेला परेको हो । प्रहरीले भन्यो, ‘उनको अनुहारसहित शरीरका विभिन्न भागमा गम्भीर चोटपटक छ ।’

रिपोर्टस् विदाउट बोर्डर्सले सञ्चारमाध्यमका लागि मेक्सिको, सिरिया र अफगानिस्तानलाई विश्वमै सबैभन्दा खतरनाक मानेको छ । हत्या गरिएका पत्रकार रोजेलियो उक्त पोर्टलमा दस वर्षदेखि कार्यरत थिए । मेक्सिकोमा यसै वर्ष रोजेलियो समेत सात जना पत्रकारको हत्या भइसकेको छ ।

१९ वर्षयता मेक्सिकोमा सय भन्दाबढी पत्रकारको हत्या भइसकेको आरएसएफले जनाएको छ । धेरै हत्या लागूऔषध तस्करी र राजनीतिक भ्रष्टाचारसँग जोडिएका छन् ।मेक्सिकोमा हत्याको स्वतन्त्र र बलियो अनुसन्धान तथा दोषीमाथि कुनै कारबाही हुने गरेको छैन ।

अघिल्लो महिना मात्र पत्रकार नोर्मा साराबियाको टाबास्कोमा गोली हानी हत्या गरिएको थियो । मे महिनामै मेक्सिकोको क्यारेबियन तटीय सहरमा संवाददाता फ्रान्सिस्को रोमेरोको हत्या भएको थियो ।

प्रकाशित : श्रावण १५, २०७६ २०:१०
पूरा पढ्नुहोस्
प्रतिक्रिया
पठाउनुहोस्