शरीरमा गोली, मनमा पीडा

विनु तिम्सिना

विराटनगर — तेह्रथुमकी कल्पना घिमिरे (सञ्जु) माओवादी सशस्त्र युद्धकी घाइते योद्धा हुन् । उनी अहिले पनि शरीरभरि गोली र छर्रा लिएर बाँचिरहेकी छन् । सशस्त्र युद्धका समयमा तत्कालीन शाही सेनाले गोली बर्साएर मृत घोषणा गरी छाडिएकी कल्पना अझै ती गोली र छर्रा शरीरमा बोकेर हिँडिरहेकी छन् ।

‘पार्टीले सुम्पिएको जिम्मेवारीलाई बहन गर्दै अगाडि बढ्ने क्रममा हामी तेह्रथुमको श्रीजुङ पुगेका थियौं’, विगत सम्झँदै उनले भनिन्, ‘बेलुकाको समय, कम्पनी हेडक्वाटरबाट हामीलाई बाहिरी गतिविधि बुझ्न निर्देशन दिइयो । जेठको समय पहाडी क्षेत्र बाक्लो कुहिरोले ढपक्कै ढाकेको थियो । अकस्मात् शाही सेना मेरो अगाडि आइरहेको देखें, यत्तिकैमा ‘साथीहरूले दुस्मन’ मात्र के भन्न भ्याएथे, बन्दुकको आवाजसँगै म पनि ढलें ।’

‘शरीरभरि गोली बर्साइएको रहेछ,’ उनले भनिन्, ‘सेनाले त मृत घोषणा गरी त्यत्तिकै छाडेर गएको थियो तर म बाँचें ।’ आन्तरिक उपचारपछि विराटनगर, धरानको बीपी कोइराला स्वास्थ्य विज्ञान प्रतिष्ठान, सिलिगुडीलगायत थुप्रै ठाउँमा उनको उपचार भयो । तर आर्थिक अभावमा अझै पनि ६ वटा गोली शरीरमै छन् ।

‘हातमुख जोर्न नै धौधौ छ । अपरेसन खर्च कसरी पो जुटाउने ?’ उनले गुनासो गरिन्, ‘तत्कालीन समयमा पार्टीको सहयोगमा उपचार त भयो तर अहिले पनि ६ वटा गोली मेरो शरीरमै छन् ।’

टाउको र दुवै हातमा भएको गोलीले झन्झन् समस्या थपिरहेको उनले बताइन् । सरकारले सामान्य जीवन निर्वाह भत्ताको व्यवस्था गरे पनि उपचारमा भने ध्यान नदिएको उनको गुनासो छ । भेलामै आएका सुनसरीका श्यामकुमार बस्नेत पनि सशस्त्र युद्धका घाइते योद्धा हुन् । तत्कालीन राज्यसत्ताको विरुद्ध लड्दा उनलेआफ्नो दाहिने खुट्टा गुमाएका छन् ।

पार्टी संगठनमा आबद्ध भएको केही समयपछि सेक्सन कमान्डर र सेनाको प्लाटुनसम्म भएका उनको पार्टी अहिले सत्तामा छ । तर उनलाई भनेआफ्नी श्रीमतीको अपरेसन गर्दा लागेको ५० हजार ऋण कसरी तिरौं भन्ने पीर छ । त्यतिमात्रै कहाँ हो र कृत्रिम खुट्टा धेरै पुरानो भइसके पनि त्यो फेर्न सकेका छैनन् ।

‘त्यो बेला जोस थियो । युद्धमा लागियो । खुट्टा गुमाइयो तर पनि कुनै गुनासो छैन,’ उनले भने, ‘अहिले यही खुट्टा नहुँदा काम गरेर खान समस्या भएको छ ।’

आफ्नो ३ कट्ठा र अरू आफन्तको ६ कट्ठामा खेती गरेर उनीहरूले जीविकोपार्जन गर्दै आएका छन् । उनकी श्रीमती अम्बिकालाई पथरिया भएपछि अपरेसन गर्नुपर्‍यो । त्यही ऋण अझै तिर्न नसकेको उनी बताउँछन् ।

संखुवासभाका कुलबहादुर कार्की (आनन्द) पनि युद्धकै दौरान घाइते भए । पाँचथरको गोपेटार, सिन्धुलीको भिमान, भोजपुरलगायत धेरै लडाइँमा सहभागी भएका कार्की सिन्धुलीको भिमानमा भएको भिडन्तमा भने घाइते हुन पुगे ।

‘तत्कालीन शाही सेनाका तर्फबाट फ्याँकिएको ३६ ग्रिनेट मेरै अघिल्तिर पड्केका थिए,’ उनले विगत सम्झिए, ‘थर्टी सिक्स ग्रिनेडका छर्रा अनुहार र टाउकोमा जताततै गाडिए अनि आँखा तत्कालै बन्द भए ।’

ज्यानको बाजी लगाएर सशस्त्र युद्धमा होमिएका कार्कीलाई त्यो बेला लिइएको लक्ष्यअनुसार देश नबनेको देख्दा धेरै पीडा महसुस हुन्छ । ‘त्यो बेला त ज्यान दिनुपरे पनि दिइन्छ भनेर हिँडिएको थियो, त्यसैको उपलब्धि हो अहिलेको गणतन्त्र,’ उनले भने, ‘तर पार्टी र नेताहरूले युद्धमा रगत बगाउनेलाई सम्मान दिन सकेनन् ।’

गणतन्त्र स्थापनाको मूल लक्ष्य लिएर तत्कालीन नेकपा माओवादीले १० वर्षसम्म सशस्त्र युद्ध गर्‍यो । युद्धमा हजारौंको मृत्यु भयो, हजारौं घाइते भए, सयौं अहिले पनि बेपत्ताको सूचीमा छन् । सशस्त्र युद्धको नेतृत्व गर्ने पार्टीले नै अहिले दुई तिहाइ मतका साथ सरकार सञ्चालन गरिरहेको छ ।

प्रकाशित : श्रावण ३, २०७६ ०९:०२
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

(अपडेट) बल्खु र कालीमाटी तरकारी बजारका १९ व्यापारीलाई जरिवाना

राजु चाैधरी

काठमाडौँ — बल्खु र कालीमाटी तरकारी बजारमा शुक्रबार बिहान वाणिज्य आपूर्ति तथा उपभोक्ता हित संरक्षण विभागको टाेलीले अनुगमन गरेकाे छ । अनुगमनका क्रममा दुवै बजारका १९ व्यापारीलाई जरिवाना गरिएकाे छ ।

शुक्रबार बिहान अनुगमनमा गएको विभागको टोलीले बल्खु तरकारी र फलफूल बजारका११ व्यापारीलाई ५ देखि २० हजारसम्म जरिवाना गरेको हो।

एक व्यापारीले लिएको तरकारी भित्रकै अर्को पसलमा बेच्दा ४०–५० रुपैंया नाफा राखेर बेचेको पाइए पछि कारवाही गरिएको वाणिज्य आपूर्ति तथा उपभोक्ता संरक्षण विभागका निर्देशक शोभाकर रेग्मीले बताए।


यसैगरी कालीमाटीस्थित तरकारी बजारमा पनि अनुगमन भइरहेको छ। विभागका शाखा अधिकृत दिपक पोखरेलको संयोजकत्वमा रहेको टोलीले अहिलेसम्म८ वटा पसललाई कारवाही गरेको छ।

अनुगमनस्थलमै होलसेल व्यापारीलाई कारवाही गरेको यो पहिलो पटक हो।

प्रकाशित : श्रावण ३, २०७६ ०८:५०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×