यौन शोषणबाट जन्मेका बच्चाको जन्मदर्ता सिफारिस

कान्तिपुर संवाददाता

काठमाडौँ — राष्ट्रिय मानव अधिकार आयोगले वैदेशिक रोजगारमा रहँदा यौन शोषणबाट अनिच्छित गर्भधारण गरी जन्मेका बालबालिकाको जन्मदर्ताको व्यवस्था गर्न सरकारलाई सिफारिस गरेको छ ।

स्थलगत अध्ययनका क्रममा यौन शोषणबाट अनिच्छित गर्भधारण भई जन्मेका नेपाली कामदारका बालबालिकाहरूको जन्मदर्तामा समस्या देखिएको पाइएको उल्लेख गर्दै स्थानीय तहलाई निर्देशन दिन आवश्यक भन्दै त्यस्तो सिफारिस गरेको हो ।

आप्रवासी कामदारको स्थिति र अधिकारका बारेमा प्रतिवेदन सार्वजनिक गर्दै अनुसन्धानका क्रममा वैदेशिक रोजगारमा रहँदा महिला कामदार गर्भवती भई विदेशमै वा नेपालमा आएर जन्माएका बच्चाहरूको जन्मदर्ता नहुनेजस्ता थुप्रै समस्या भेटिएको आयोगले जनाएको छ ।

त्यसरी जन्मेका बच्चाहरूको नागरिक अधिकार हनन भइरहेको निष्कर्ष प्रतिवेदनमा छ । वैदेशिक रोजगारीका लागि महिलामाथि लगाइएको उमेरको हद तथा प्रतिबन्ध हटाउन पनि आयोगले सरकारलाई सिफारिस गरेको छ । ‘महिलामाथि लगाइएको उमेर हद र प्रतिबन्ध हटाई सुरक्षित र मर्यादित रूपमा वैदेशिक रोजगारीमा पठाउने कार्यलाई व्यवस्थापन गर्नुपर्छ’ प्रतिवेदनमा छ ।

प्रकाशित : श्रावण २, २०७६ १९:४४
प्रतिक्रिया
पठाउनुहोस्

विशेष अदालतको अध्यक्षमा अधिकारी नियुक्त

कान्तिपुर संवाददाता

काठमाडौँ — विशेष अदालतको अध्यक्षमा उच्च अदालत दिपायलका न्यायाधीश शिवराज अधिकारी नियुक्त भएका छन् । बिहीबारको न्यायपरिषदको बैठकले उनको अध्यक्षतामा ५ जना सदस्य तोकेको हो ।

अधिकारी हाल उच्च अदालत विराटनगरमा काजमा छन् ।

न्यायपरिषदले विशेष अदालतको सदस्यहरुमा न्यायाधीशहरु कृष्ण गिरी, बालेन्द्र रुपाखेती, शान्तिसिंह थापा, चन्द्रबहादुर सारु र डा. रवि शर्मा अर्याल नियुक्त गरेको हो ।

हालका विशेष अदालतका अध्यक्ष सहित दुई पदाधिकारी अन्य उच्च अदालतमा सरुवा भएका छन् ।

प्रकाशित : श्रावण २, २०७६ १९:३३
पूरा पढ्नुहोस्
प्रतिक्रिया
पठाउनुहोस्