लापरबाहीले बढी क्षति

विनु तिम्सिना

विराटनगर — लगातारको वर्षाले खोलाखोल्सी र पैनीमा पानीपानी थिए । झापा दमककी ६ वर्षीया एलिजा न्यौपाने घर नजिकै भालु खोलाको कल्भर्टमा जमेको पानीमा खेलिरहेकी थिइन् । पानीमा खसेकी उनको डुबेर मृत्यु भयो ।

वर्षाले बढेको लोहन्द्रा खोलामा पौडी खेल्न पसेका मोरङको जहदाका १६ वर्षीय आदर्श पोद्धारलाई भेलले बगायो ।
उर्लेको खोलालाई बेवास्ता गर्दै माछा मार्न गएका सुनसरीका सागर थापालाई पनि खोलाले बगायो ।

आफ्नो कुकुर बचाउन खोलाभित्र छिरेका उदयपुरका ३५ वर्षीय मनकुमार तामाङ न आफू बाँचे न त उनको कुकुर नै । बूढी खोलामा बाढीसँगै बगेर आएको दाउरा झिक्न पसेका सुनसरीका खालिद मियाँलाई तत्काल स्थानीय र प्रहरीले उद्धार गरेपछि बाँचे । दाउराका लागि उनको ज्यान जोखिममा परेको थियो । उनी अहिले विराटनगरमा उपचाररत छन् ।

अविरल वर्षासँगै आएको बाढीपहिरोका कारण प्रदेश १ का विभिन्न जिल्लामा २६ जनाको मृत्यु भएको छ । मारिएकामध्ये अधिकांश सावधानी नअपनाउँदा घटना भएको पाइएको प्रदेश प्रहरी कार्यालयले जनाएको छ ।

बाढीपहिरोमा परेर भोजपुरमा ५, ओखलढुंगा र उदयपुरमा ४/४, खोटाङ, झापा र मोरङमा ३/३, इलाम, सुनसरी, संखुवासभा र पाँचथरमा १/१ जनाको मृत्यु भएको छ । मृत्यु हुनेमा ११ जना बालबालिका र ६ जना महिला छन् । प्रहरीको तथ्यांकअनुसार सबैभन्दा बढी खोलाले बगाएका कारण मृत्यु भएको छ । १४ को खोलाले बगाएर र १२ जनाको पहिरोमा पुरिएर मृत्यु भएको हो ।

वर्षाले खोलामा बहाव बढेको, पोखरीमा पानीको सतह बढेको अवस्थामा पौडी खेल्ने, माछा मार्ने, जबर्जस्ती खोला तर्ने र बगेर आएका दाउरा समाउन जाने लगायतका आफ्नै असावधानीका मृत्युको घटना भएको पाइएको प्रदेश प्रहरी प्रमुख प्रहरी नायब महानिरीक्षक ठाकुरप्रसाद ज्ञवालीले बताए ।

‘खोलामा बाढी आएका बेला दाउरा बटुल्ने, पौडी खेल्न जाने र भेल तर्ने गर्नु दुस्साहस हो,’ उनले भने, ‘मृत्यु भएका घटनाहरू केलाउँदा धेरैमा असावधानी नै प्रमुख कारण देखिएको छ ।’ खोलाले बगाएका सुनसरीका १० वर्षीय अर्पण राई अझै बेपत्ता नै छन् । ‘माछा मार्न भनेर गएका उनको अझै खोजी भइरहेको छ,’ ज्ञवालीले भने, ‘बाढी आएका बेला खोलाको माछा खानु स्वस्थकर पनि मानिँदैन । चेतनाको अभावले पनि यस्ता घटना भइरहेको देखिएको छ ।’

बाढीपहिरोका विभिन्न घटनामा २० जना घाइते भएका छन् । खोलाले बगाएर झापा, मोरङ, सुनसरी र इलाममा गरी अझै ९ जना बेपत्ता नै छन् । मोरङका विभिन्न ठाउँमा बाढीमा परी बेपत्ता ५० वर्षीया शोभा सोरेन, १६ वर्षीय आदर्श पोद्धार, १८ वर्षीय सचिन मुर्मु र ११ वर्षीया सिर्जना तामाङ अझै फेला परेका छैनन् ।

यस्तै सुनसरीका १० वर्षीय अर्पण राई र झापाका ४५ वर्षीय सुफल हास्दा सतारलाई पनि खोलाले बगाएको छ । इलामकी १५ वर्षीया सुनिता साउदेन, १५ वर्षीया निशा सुनुवार र आकृति लिम्बू पनि खोलाले बगाएर बेपत्ताको सूचीमा छन् । उनीहरूमध्ये अधिकांश माछा मार्न र पौडी खेल्न गएका कारण खोलाले बगाएको देखिन्छ भने केही खोला तर्दा बगेको प्रहरी प्रमुख ज्ञवालीले बताए ।

भोजपुरको आमचोक गाउँपालिका–२ थामडाँडामा पोखरीमा पौडी खेल्न गएका दुई जनाको मंगलबार डुबेर मृत्यु भयो । आमचोक–१ का २५ वर्षीय निमा शेर्पा र २० वर्षीय गेल्बु शेर्पाको मृत्यु भएको प्रहरीले जनाएको छ । यस्तै सुनसरीको दुहबी–२ बस्ने सलिब मियाँका ४ वर्षीय छोरा जुगेरको गत सोमबार पोखरीमा डुबेर मृत्यु भयो ।

साँझको समयमा विवाहमा जान भनी हिँडेका जुगेर घर नजिकै रहेको पोखरीमा डुबेर सिकिस्त भएका थिए । उपचारका लागि सामुदायिक अस्पताल दुहबी हुँदै विराटनगर ल्याइएका उनको उपचारका क्रममा विराट टिचिङ अस्पतालमा मृत्यु भएको इलाका प्रहरी कार्यालय दुहबीले जनाएको छ ।

प्रकाशित : श्रावण २, २०७६ ०८:२१
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

हेलचेक्र्याइँले मृत्युका घटना बढे

विनु तिम्सिना

विराटनगर — मोरङको जहदा गाउँपालिकाका १६ वर्षीय आदर्श पोद्धार लोहन्द्रा खोलामा पौडी खेल्न गएका थिए । लगातारको वर्षाका कारण लोहन्द्रा खोलामा पानीको बहाव बढेको थियो । तर लापरबाही गर्दै पौडी खेल्न गएका पोद्धारलाई खोलाले बगायो । केही दिनदेखि भइरहेको वर्षातलाई पनि बेवास्ता गर्दै माछा मार्न गएका सुनसरीका सागर थापालाई पनि खोलाले बगायो ।

आफ्नो कुकुरलाई बचाउन खोलाभित्र छिरेका उदयपुरका ३५ वर्षीय मनकुमार तामाङ न आफू बाँचे न त उनको कुकुर नै ।

झापा दमककी ६ वर्षीया एलिजा न्यौपाने स्थानीय भालु खोलाको कल्भर्टमा जमेको पानीमा खेलिरहेकी थिइन् । एक्कासी पानीमा खसेकी उनको डुबेर मृत्यु भयो । बुढी खोलामा बाढीसँगै बगेर आएको दाउरा झिक्न खोलामा पसेका सुनसरीका खालिद मियालाई तत्काल स्थानीय र प्रहरीले उद्धार गर्न सफल भयो । नत्र दाउराका लागि उनले आफ्नो ज्यान नै दिनुपर्ने हुन सक्थ्यो । अहिले उनको विराटनगरस्थित विराटनगर टिचिङ अस्पतालमा उपचार भइरहेको प्रदेश प्रहरी कार्यालयले जनाएको छ ।

अविरल वर्षासँगै आएको बाढीपहिरोका कारण प्रदेश १ मा २६ जनाको मृत्यु भएको छ । यसमध्ये अधिकांश आफ्नै लापरबाहीका कारण र सावधानी नअपनाउँदा खोलाले बगाएर मृत्यु भएको प्रदेश प्रहरी कार्यालयले जनाएको छ ।

बाढी पहिरोमा परी खोटाङमा ३, झापामा ३, ओखलढुंगामा ४, भोजपुरमा ५, इलाममा १, सुनसरीमा १, उदयपुरमा ४, संखुवासभामा १, पाँचथरमा १ र मोरङमा ३ जनाको मृत्यु भएको छ । यी मध्ये मृत्युहुनेमा ११ जना बालबालिका र ६ जना महिला रहेका छन् । कार्यालयले दिएको तथ्याङ्क अनुसार सबैभन्दा बढी खोलाले बगाएका कारण मृत्यु भएको छ । १४ जनाको खोलाले बगाएर मृत्यु भएको छ भने १२ जनाको पहिरोमा पुरिएर मृत्यु भएको छ ।

लगातारको वर्षाका कारण खोलामा बहाव बढेको, पोखरीमा पानीको सतह बढेको अवस्थामा पौडी खेल्ने, माछा मार्ने, जबरजस्ती खोला तर्ने, खोलामा बगेर आएका दाउरा समाउन जाने लगायतका आफ्नै लापरबाहीका कारण मृत्युको घटना बढेको प्रदेश एकका प्रहरी प्रमुख प्रहरी.नायव महानिरीक्षक ठाकुरप्रसाद ज्ञवालीले बताए ।

‘प्रदेश १ मा आएको बाढीपहिरोमा अधिकांश मृत्यु खोलाले बगाएर भएको देखिन्छ,’ उनले भने, ‘खोलामा बाढी आइरहेको छ पौडी खेल्न जाने, माछा मार्न जाने अनि खोलामा आएका दाउरा बटुल्न जाने यस्ता आफ्नै लापरबाहीले गर्दा धेरैले ज्यान गुमाएका छन् ।’ सुनसरीका १० वर्षे बालक अर्पण राईलाई खोलाले बगाएको अझै बेपत्ता नै छन् । ‘माछा मार्न भनेर गएर उनलाई खोलाले बगायो,’ प्रदेश प्रहरी प्रमुख ज्ञवालीले भने,‘त्यसै पनि बाढी आएको बेला खोलामा बगाएर आएका माछा खान हुँदैन एउटा माछाको लोभले ज्यान गुमाइरहेका छन् ।’

तराईका जिल्लाहरूमा घर छेउमा पोखरी हुने गरेको र वर्षातको मौसममा पोखरीमा पानी धेरै जम्मा हुने गरेको छ । अभिभावकहरुले राम्रो ध्यान पुर्‍याउन नसक्दा बालबालिकाहरु यस्ता पोखरीमा डुब्ने गरेको प्रदेश प्रहरी प्रमुख ज्ञवालीले बताए ।

प्रकाशित : श्रावण १, २०७६ १५:५८
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
×