दरखास्त दिएका ६ जनाको योग्यता नपुगेको भन्दै चिकित्सा शिक्षा आयोगको उपाध्यक्षका लागि पुन: दरखास्त माग

सुदीप कैनी

काठमाडौँ — चिकित्सा शिक्षा आयोगको उपाध्यक्ष खुला प्रतिस्पर्धा छान्न मंगलबार पुन: दरखास्त आह्वान गरिएको छ । पहिलोपटकको आह्वानमा आवेदन दिएका ६ जनाको दरखास्त रद्द गर्दै आयोग उपाध्यक्ष छनोट सिफारिस समितिले पुन: सूचना निकालेको हो । 

लोकसेवा आयोगका अध्यक्ष उमेश मैनाली संयोजक रहेको सिफारिस समितिले १५ दिनभित्र आयोग उपाध्यक्ष भएपछि नेतृत्वदायी भूमिका निर्वाह गर्ने सोचपत्र र व्यावसायिक कार्ययोजनासहित दरखास्त दिन भनेको छ । यसअघि आवेदन दिने उम्मेदवार आयोगको ‘नेतृत्व हाँक्न सक्षम र विज्ञ नभएको’ भन्दै चिकित्सा वृत्तमा आलोचना भएको थियो । सोही आधारमा समितिले उनीहरूको निवेदन रद्द गरेको हो ।

यसपटक आवेदन दिनेहरूका लागि दायरासमेत फराकिलो पार्दै विशिष्टीकरण गरिएको छ । दरखास्त दिने अन्तिम दिनसम्म ४५ वर्ष पूरा भई ६५ वर्ष ननाघेको चिकित्सा शिक्षामा ख्याति प्राप्त व्यक्तिले आवेदन दिन सक्नेछन् । यसअघि उमेर हद ६४ वर्ष तोकिएको थियो ।

मान्यता प्राप्त शिक्षण संस्थाबाट चिकित्साशास्त्रसम्बन्धी विषयमा कम्तीमा स्नातकोत्तर गरी २० वर्षको कार्य अनुभव र चिकित्सा शिक्षासम्बन्धी क्षेत्रमा १० वर्ष काम गरेको व्यक्तिले आवेदन दिन सक्ने समितिले जानकारी दिएको छ ।

शिक्षण संस्थाका बहालवाला वा अवकाश प्राप्त उपकुलपति, प्राध्यापक वा विशिष्ट श्रेणीका चिकित्सक वा विज्ञका रूपमा ख्याति कमाएको पुस्ट्याइँ पनि माग गरिएको छ । ‘चिकित्सा शिक्षा वा सेवासम्बन्धी कुनै पनि संस्थाको नेतृत्वमा रही उत्कृष्ट व्यावसायिक सीप प्रदान गरेको प्रमाण वा स्वघोषणा हुनुपर्छ,’ सूचनामा भनिएको छ । आयोगसँग कुनै स्वास्थ्य टकराव नभएको र सोसम्बन्धी शिक्षण संस्थामा लगानी नभएको व्यक्तिले मात्र आवेदन दिन पाउने सर्त छ ।

यसअघि चिकित्सा शिक्षा जाँचबुझ आयोगले दोषी ठहर्‍याएका डा. नीलमणि उपाध्यायसहित ६ जनाले चिकित्सा शिक्षा आयोगको उपाध्यक्षका लागि आवेदन दिएका थिए । चिकित्सा विज्ञान राष्ट्रिय प्रतिष्ठानका पूर्वरेक्टर डा. श्रीकृष्ण गिरी, डा. प्रमोद साह, डा. पारस पोखरेल, डा. रमेश सिंह र नीलाम्बर झाले आवेदन दिएका हुन् ।

असार ९ गतेकोआह्वानपछि उनीहरूले इच्छापत्रसहितको निवेदन दिएका थिए । आवेदन प्राप्त भएकाबाट आयोगको उपाध्यक्ष बन्न तोकिएको योग्यताको प्रमाणपत्र प्राप्त नभएकाले रद्द गरिएको समितिले जनाएको छ । चिकित्सा शिक्षा ऐनको दफा ५ बमोजिम गठन हुने चिकित्सा शिक्षा आयोगमा चिकित्सा शिक्षा क्षेत्रमा विशिष्ट योगदान पुर्‍याएकामध्ये एक जना उपाध्यक्ष हुने प्रावधान छ । उपाध्यक्ष आयोगमा पूर्णकालीन र कार्यकारीका रूपमा रहने व्यवस्था छ ।

उपाध्यक्ष नियुक्ति सिफारिसका लागि लोकसेवा आयोगका अध्यक्षको अध्यक्षतामा सिफारिस समिति गठन गरिएको थियो । समितिले दरखास्त दिएका योग्यमध्ये ३ जनाको नाम नियुक्तिका लागि सरकारसमक्ष सिफारिस गर्नेछ । त्यसबाट एक जना नियुक्त हुनेछन् । वरिष्ठ चिकित्सक दिव्या सिंह र प्रधानमन्त्री कार्यालयका सचिव सदस्य रहेको समितिले ३ जनाको नाम आयोगका कुलपति तथा प्रधानमन्त्रीसमक्ष पेस नगरी रद्द गरेको हो ।

प्रकाशित : श्रावण १, २०७६ ०८:०३
प्रतिक्रिया
पठाउनुहोस्

वाग्मतीले लखेट्यो ४ सय परिवार

शिव पुरी

(बडहर्वा, रौतहट) — शुक्रबार राति बाढीले घर डुबाएपछि जसोतसो ज्यान जोगाएकी दुर्गाभगवती गाउँपालिका ५ बडहर्वाकी ६५ वर्षीया सरस्वती कोइरीको बायाँ खुट्टा भाँचिएको छ । बाढीबाट जोगिन भाग्ने क्रममा उनको खुट्टा भाँचिएको हो । 

रौतहटको दुर्गाभगवती गाउँपालिका–५ बडहर्वास्थित वाग्मतीको बाँधमाथि त्रिपाल टाँगेर कष्टले बसेका विस्थापित । शुक्रबार रातिको बाढीले उक्त बस्तीका ४ सय परिवार विस्थापित भएका छन् ।  तस्बिर : शिव/कान्तिपुर 

छोरा उदयशंकरले हतारहतार उठाएर आमालाई बाँधमा पुर्‍याए । अन्नपात, लत्ताकपडा सबै डुब्यो । घटनाको पाँच दिन बिते पनि उनको खुट्टाको उपचार हुन सकेको छैन ।

राति करिब १० बजेको थियो । सबै सुत्ने तयारीमा थिए । पानी जोडले परेपछि कोइरी परिवारलाई शंका लाग्यो । बाहिरको अवस्था बुझ्न छोरा उदय बाहिर निस्केका मात्र थिए, बाढीले घर घेरिसकेको रहेछ । उनी आत्तिएर भित्रका सबैलाई बाहिर निस्कन भने । ‘ज्यानै गयो जस्तो लागेको थियो । छोराले बचायो,’ सरस्वती भन्छिन्, ‘अब सरकारले हामीलाई गाँस होइन, बासको व्यवस्था गरिदेओस् ।’

बडहर्वा गाउँमा झन्डै ४ सय घरधुरी छन् । तीमध्ये ३ सय ३८ घर डुबानमा परेका छन् । केहीलाई बाढीले बगाएर लग्यो । अहिले २ सय घरपरिवार वाग्मतीको बाँधनजिकै त्रिपाल टाँगेर आश्रय लिइरहेका छन् । ४० घर परिवारले माण्डवी नामक संस्थाले बनाइदिएको सेफ हाउसमा आश्रय लिएका छन् । विस्थापितमध्ये अधिकांशको त्रिपाल च्यातिइसकेको छ । रातभर पानी चुहिन्छ । सुत्न नपाएको चार दिन भइसक्यो । अधिकांशले खान पनि पाएका छैनन् । बस्तीनजिकै रहेको बिजुलीको ट्रान्सफर्मर ढलेको छ । बत्ती छैन। शुद्ध खानेपानीको अभाव छ । धेरैजसो पीडित रुघाखोकीबाट ग्रस्त बनेको जशोदादेवी साहले बताइन् । ‘सर्पले टोक्ने हो कि भन्ने डर पनि उत्तिकै छ,’ उनले भनिन्, ‘यसरी कतिन्जेल बस्नु ? त्रासैत्रासमा जीवन सकिने भयो ।’

यसअघि पनि वाग्मतीमा बाढी आयो भने बाँधको आडैमा घर भएकाहरू रातभर जाग्राम बस्थे । बाँध भत्किएर बगाउँछ कि भन्ने त्रासले सधैं पिरोल्थ्यो । तर अहिले त्यही बाँधको भरमा दुई सय विस्थापित त्रिपालमुनि बस्न बाध्य छन् । झाझ नदी नियन्त्रण र हुलाकी पुलको लम्बाइका कारण डुबानको समस्या बढेको वडाध्यक्ष धर्मनाथ चौधरीले बताए ।

‘गाउँ पुग्ने सडकमा १ सय मिटर लामो पुल बनाउनुपर्नेमा १२ मिटर मात्र बनाएपछि थप समस्या भयो,’ उनले भने, ‘डुबान हुनुमा प्रमुख कारण पुल पनि हो । यसको लम्बाइ तत्काल बढाउनुपर्छ ।’

यहाँ बसेका कसैको पनि निजी जमिन छैन । ऐलानी जमिनमा घर बनाएर बसेका सबै विस्थापित परिवारका हुन् । वाग्मतीका कारण केहीको खेती बगर बनेको छ । हिउँदमा उनीहरूले त्यहीँ खेती गर्छन् । थोरै उब्जनी भए पनि चित्त बुझाउँछन् ।

बस्तीमा मंगलबार प्रमुख जिल्ला अधिकारी किरण थापा, प्रहरी र सेनाका अधिकारीसहितको टोली राहत लिएर पुगेको छ । विस्थापितका लागि ४ सय थान त्रिपाल र राहत सामग्री लिई आएको प्रजिअ थापाले बताए ।

प्रकाशित : श्रावण १, २०७६ ०७:५९
पूरा पढ्नुहोस्
प्रतिक्रिया
पठाउनुहोस्