घर फिर्न थाले विस्थापित

कान्तिपुर संवाददाता

विराटनगर — सोमबारदेखि पानी पर्न कम भएपछि विराटनगर महानगरपालिकाका बाढीपीडित परिवार मंगलबारदेखि घर फिर्न थालेका छन् । महानगरका १९ वटै वडामा पानीको निकास नहुँदा बस्ता, सिंघिया र केसलिया खोलाको पानी बस्ती पसेको थियो । यसबाट करिब हजार परिवारलाई सुरक्षित स्थलमा राखिएको थियो ।

वडा ७ का विस्थापित ५६ परिवार मंगलबार घर फर्किएको वडा प्रमुख मधुबाबु तिवारीले जानकारी दिए । उनीहरू स्थानीय गायत्री संस्कृत विद्यालयमा बसेका थिए । त्यसैगरी वडा नम्बर ८ का पीडित परिवार पनि घरतर्फ लागेको वडाध्यक्ष निश्चल अर्यालले बताए ।

महानगर १ को विजयपुर, पाथीभरा मन्दिरको धर्मशाला, शान्तिचोक र नयाँ बस्तीमा राखिएका १ सय २५ विस्थापित परिवार पनि मंगलबार घरतर्फ लागेको वडा प्रमुख उद्धव अर्यालको भनाइ छ ।

केही परिवार भने फर्किन नसकेको महानगर प्रमुख भीम पराजुलीले बताए । सुरक्षित स्थलमा राखिएका परिवारलाई महानगरले खानाको व्यवस्था गरेको छ । पानी रोकिएको अवस्थामा बुधबारसम्म विस्थापित घर फर्किसक्ने उनको भनाइ छ ।

प्रकाशित : असार ३१, २०७६ १९:३३
ADVERTISEMENT
प्रतिक्रिया
पठाउनुहोस्
ADVERTISEMENT

बाढीले खेदेपछि... [फोटोफिचर]

बाढीको कहर
शिव पुरी

रौतहट — तराई/मधेसका जिल्लामा प्राकृतिक विपत्तिको सधैं त्रास हुन्छ । आगलागी, हावाहुरी, शीतलहर र बाढीका कारण वर्षेनी ज्यान गुमाउनेको संख्या ठूलो छ । यस वर्ष मात्र बाढीबाट रौतहटमा १० जनाले ज्यान गुमाइसकेका छन् । १ जना बेपत्ता छन् । लगातारको वर्षापछि लालबकैया र वाग्मती नदी बस्ती पस्दा जिल्लाको ८० प्रतिशत भूभाग डुबानमा परेको छ ।

जिल्लामा बाढीबाट झन्डै ७० हजार घर प्रभावित भएको छ भने ७ हजार मानिस विस्थापित भएको प्रारम्भिक अनुमान छ । ४ सय घर पूर्ण रूपमा ध्वस्त भएको छ । जिल्लाको ईश्नाथ नगरपालिका र दुर्गाभगवति गाउँपालिकामा बाढीको बितण्डा धेरै नै देखिएको छ । दुर्गाभगवती गाउँपालिका ५ स्थित बडहर्वा गाउँमा झण्डै ४ सय घरधुरी छन् । तीमध्ये ३ सय ३८ घर बाढीले डुबान र केही बगाएर लगेको छ । अहिले २ सय घर परिवार वागमती नदीको बाँधमा त्रिपाल टाँगेर बसेका छन् ।

विस्थापितमध्ये अधिकांशको त्रिपाल च्यातिएर कामै नलाग्ने छ । बाढीको त्रासले चार दिनदेखि पीडितहरु अनिँदो छन् । अधिकांशले खान पाएका छैनन् । अन्न डुबाएपछि थप समस्या छ । बस्ती नजिकको विद्युत्‌ ट्रान्सफर्मर ढलेको छ । विस्थापितलाई शुद्ध खानेपानी समस्या छ । २०४८ सालदेखि यो बस्तीका मानिस वागमती नदीबाट भागेको भागै छन् । अहिले त्यही बाँधको भर परेर विस्थापित कष्ट संगले त्रिपाल टाँगेर बसेका छन् ।

गएको शुक्रबार रातिको बाढीले घर डुबानमा परेपछि उनीहरु माथि उक्लेर रातभर जाग्राम बसे । प्राकृतिक बिपत्तिले कतिसम्म गर्छ भन्ने यो गाउँ उदाहरण बनेको छ । २०४८ सालमा बडहर्वा गाउँ पहिलो पटक बागमतीमा आएको बाढीले डुबानमा पार्‍यो । त्यसबेला झण्डै ५ सय बिघा जमिन बगायो । ५ जनाको मृत्यु भयो । त्यसपछि उनीहरु केही पर आएर बसे । २०५० सालको बाढीले फेरि गाउँ डुबानमा पार्‍यो । त्यसपछि उनीहरु बाँधको आडैमा आएर बसे ।

२०७४ सालमा बागमती नदीको बाढीले सिंगो गाउँ डुबानमा पार्‍यो । त्यस बेला ६ जनाको मृत्यु भएको थियो । अहिले फेरि यति ठूलो बिपत्ति ल्यायो,’ पीडित ईन्द्रजी दास भन्छन्, ‘प्रकृतिक प्रकोपले पनि खेदेको खेदै गर्‍यो । अब राहतभन्दा पनि सुरक्षित बासको ब्यवस्था गरिदिए हुन्थ्यो ।

प्रकाशित : असार ३१, २०७६ १९:२०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT