‘मानवनिर्मित संरचनाले बढी क्षति’

विकास निर्माणका गतिविधि प्रकृतिमैत्री बनाउन सरकारलाई संसदीय समितिको सुझाव 
कान्तिपुर संवाददाता

काठमाडौँ — प्रतिनिधिसभाको राज्य व्यवस्था तथा सुशासन समितिका सदस्यहरूले मानव निर्मित भौतिक संरचनाका कारण पनि बाढीपहिरो र डुबानबाट बढी क्षति भएको बताएका छन् । समितिको बैठकमा आइतबार उनीहरूले बिनाप्राविधिक डोजर प्रयोग गरी जथाभावी सडक खनेर प्रकृतिको विनाश गरिएका कारण पनि विपदबाट क्षति भएको धारणा राखेका थिए ।

उनीहरूले विकास निर्माणका गतिविधि प्रकृतिमैत्री बनाउन सरकारलाई सुझाव दिएका छन् ।

समिति सदस्यहरूले भारतले एकतर्फी रूपमा सीमा क्षेत्रमा बनाएका बाँध र तटबन्धका कारण मुलुकको तराई क्षेत्र हरेक वर्ष डुबानमा पर्ने गरेको उल्लेख गर्दै त्यस्तो समस्या समाधानका लागि समयमै कूटनीतिक पहल चाल्न नसकेकामा सरकारप्रति रोष प्रकट गरेका थिए ।

भारतसँगका कोसी र गण्डकजस्ता असमान सम्झौताका कारणसमेत तराईका बस्ती डुबानमा पर्ने गरेकोतर्फ गम्भीर भई ती सम्झौता पुनरावलोकनका लागि कूटनीतिक पहल गर्नसमेत सांसदहरूले सरकारलाई आग्रह गरे । उनीहरूले नेपालमा बाढीपहिरो आउँदा भारतमा समेत असर पर्ने भएकाले सरकारले द्विपक्षीय पहलबाट दीर्घकालीन समस्या समाधानका लागि लाग्नुपर्नेमा जोड दिए ।

गृहमन्त्री रामबहादुर थापाले मानवीय त्रुटि र कमजोरी तथा पूर्वसावधानीको अभावका कारण बाढीबाट बढी क्षति पुगेको स्वीकार गरेका छन् । जथाभावी विकास गर्ने, डाँडापाखा भत्काउने, खोलानाला थुनेर घर बनाउने प्रवृत्तिका कारण क्षति बढी भएको उनको भनाइ थियो । विश्वव्यापी तापक्रम वृद्धिको असर पनि यसमा देखिएको गृहमन्त्री थापाले बताए ।

उनले प्रकोप न्यूनीकरणका लागि पूर्वतयारी कमजोर हुँदा बाढीपहिरो र डुबानबाट बढी क्षति भएको उल्लेख गर्दै यसमा सरकारसमेत दोषी रहेको बताए । ‘बाढीद्वारा सिर्जित समस्या प्राकृतिक हो । तर यसको न्यूनीकरण गर्न सकिन्छ,’ उनले भने, ‘चुरे नांगिएको छ । खोलामा घर बनेका छन् । खोलामा घर त बनाउनु भएन नि ।’ उनले अब सरकारले विकास निर्माणका काम गर्दा सचेतना र पूर्वतयारी अपनाउने प्रतिबद्धता व्यक्त गरे ।

उद्धार र राहत प्रभावकारी बनाउन निर्देशन
राज्य व्यवस्था तथा सुशासन समितिले बाढीपहिरो र डुबानपीडितको तत्काल उद्धार, राहत तथा घाइतेको उपचार प्रभावकारी बनाउन सरकारलाई निर्देशन दिएको छ । समितिले बेपत्ता भएका व्यक्तिहरूको खोजी र विस्थापितहरूको उचित आश्रयस्थल प्रबन्ध गर्नसमेत सरकारलाई ध्यानाकर्षण गराएको छ । समितिले बाढीपहिरो र डुबान प्रभावित ठाउँमा महामारी फैलिन नदिन तत्काल औषधिसहित स्वास्थ्यकर्मी पठाउनसमेत सरकारलाई निर्देशन दिएको छ ।

बैठकमा गृहमन्त्री थापाले बाढीपहिरो तथा डुबान प्रभावित ठाउँमा सम्पूर्ण सरकारी संयन्त्र परिचालन गरी सरकारले उद्धार तथा राहतको काम गरिरहेको जानकारी गराए । प्रतिकूल मौसम र हेलिकप्टर अपर्याप्तताका कारण केही ढिलाइ भए पनि सरकारले उद्धार र राहतको काममा कुनै कसर बाँकी नराखेको बताए ।

प्रकाशित : असार २९, २०७६ २१:०३
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

साताका ७ उत्कृष्ट तस्बिर

कान्तिपुर संवाददाता

काठमाडौँ — गतसाता प्रधानमन्त्री केपी शर्मा ओलीलाई स्वागत गर्नका लागि हिलोमा ओछ्याइएको रातो कार्पेटको तस्बिरको धेरै चर्चा भयो । साताभर बाढी,डुबान तथा पहिरोका तस्बिरहरुले प्राथमिकता पाए । त्रिभुवन विमानस्थलमा शुक्रबार बिहान नेपालगन्जबाट यात्रु लिएर आएको यति एयरलाइन्सको जहाज अवतरण गर्ने क्रममा धावनमार्गबाट चिप्लिएर घाँसे मैदानमा पुगेको तस्बिरमा पनि रुचाइयो । साताभर बाढी पहिरोकै तस्बिरहरुले चर्चा बटुले ।

कलंकीमा आफ्नो नानीलाई पिठ्युमा बोकेर डुबान क्षेत्रबाट निस्किने प्रयास गर्दै एक बुवा । लगातारको वर्षाका कारण उपत्याकाको तीन वटै जिल्ला प्रभावित बनेका छन् । तस्बिरः सन्जोग मानन्धर

अविरल वर्षाका कारण कंलकीको ट्राफिक प्रभाग परिसरमा डुबानमा परेको माइक्रो बस र बाइकहरु । तस्बिर: बिजु महर्जन

पानी रोकिएपछि देखिएको किर्तिपुरको दृश्य । तस्बिरः केशव थापा

राजधानीको बानेश्वरमा छाता ओढेर गन्तव्यतिर जादै यात्रु । अहिले मुलुकभर मनसुन सक्रिय रहेको छ । तस्बिरः अंगद ढकाल

भारी वर्षाका कारण जनजीवन प्रभावित भएको छ । सामान्य ढल निकास राम्रो नहुँदा बर्षादको समयमा सर्वसाधारणले सास्ती खेप्नु परिरहेको छ । तस्बिरः प्रकाशचन्द्र तिम्सिना ।

शुक्रबार बिहान नेपालगन्जबाट यात्रु लिएर आएको यति एयरलाइन्सको जहाज अवतरण गर्ने क्रममा धावनमार्गबाट चिप्लिएर घाँसे मैदानमा पुगेको थियो । तस्बिर अंगद ढकाल । कान्तिपुर

प्रकाशित : असार २९, २०७६ २०:३६
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
×