नवजात शिशु चोरी गरेको आरोपमा दुई महिला पक्राउ

प्रदीप मेन्याङ्बो

सुनसरी — नवजात शिशु चोरी गरेको आरोपमा प्रहरीले दुईजना महिलालाई पक्राउ गरेको छ । वीपी कोइराला स्वास्थ्य विज्ञान प्रतिष्ठानको स्त्री तथा प्रसूति विभागबाट नवजात शिशु चोरी गरेको आरोपमा प्रहरीले धरान–१५ की लीला बिक र उनकी भाउजू मिना लिम्बू विकलाई प्रक्राउ गरेको हो । 

बुधवार राति स्त्री तथा प्रसूति विभागबाट भोक्राहा गाउँपालिका–१ की बबिता मेहताको छोरा वार्डबाटै हराएपछि हल्ला भएको थियो ।बच्चा र आमाको स्वास्थ्यमा समस्या देखिएपछि वार्डमै राखेर उपचार भइरहेको अवस्थामा अरूको कुरुवा बनेर नाटक गरी बस्ने धरान–१५ का लीला बिक र उनका भाउजू पर्ने मिना लिम्बु बिकले बच्चा चोरी गरेको इलाका प्रहरी कार्यालय धरानका डीएसपी ढुण्डीराज न्यौपानेले बताए । चोरी गरिएको नवजात शिशु प्रतिष्ठानबाट करिब पाँच किलोमिटर पूर्व पर्ने धरान–१५ बगरकोटमा प्रहरीले फेला पारेको थियो ।

डीएसपी न्यौपानेका अनुसार नवजात शिशुका आमा बबिता राति बिउँझिदा आफ्नो साथ बच्चा नभएको देखेपछि हल्ला भयो । तत्काल डाक्टर, नर्स र प्रहरीले खोजी गर्न थाले । त्यसैबेला शंकास्पद रूपमा वार्ड बाहिर सुतिरहेकी लीला बिक फेला परिन् । न्यौपानेले भने, ‘केरकार गर्दा सुरुमा त लिलाले आफू अचेत भएजस्तो बहाना गरिन् । तर, उनको मोबाइलबाट कल गएको र आएको तथ्यले उजागर गर्‍यो ।’

लिलाको मोबाइलमा आएको पछिल्लो नम्बरमा एक चिकित्सकले डाक्टरले डायल गर्दा फोन उठाउनेको नजिकै बच्चा रोएको आवाज सुनेपछि लिलालाई सोधखोज गर्दा चोरी भएकै पत्ता लागेको थियो ।

डीएसपी न्यौपानेले भने, ‘लिलाले आफ्नो भाउजू मिनालाई बोलाएर मेहताको नवजात बच्चा चोरी गरी टेम्पोमा पठाएकी रहेछ । मिनाले बच्चा बगरकोट पुर्‍याएकी रहेछन् । बगरकोटबाटै प्रहरीले बच्चा फेला पारेर मेहता दम्पतीलाई जिम्मा दिएका छौँ ।’ मेहता दम्पतीले आफ्नो बच्चा चोरी गर्नेहरुलाई कारबाही गर्न माग गर्दै जाहेरी दिएको प्रनाउ न्यौपानेले बताए ।

प्रतिष्ठानको प्रसूति गृहबाट बच्चा चोर्नका लागि लीला र मिना केही दिनअघिदेखि नियमित रूपमा बिरामी कुरुवाको नाटक गरेर आउने जाने गर्थे । बच्चा चोरी हुने राति पनि उनीहरू मध्ये लीला विक मेहता दम्पतीको क्याबिनमा आएर सुतेकी थिइन् । मेहता दम्पती र अरू कुरुवा सबै निदाएको मौका पारेर बच्चा चोरी गरेको रहस्य खुलेको प्रहरीले जनाएको छ ।

प्रहरीका अनुसार लिलाले आफ्नो श्रीमान् भारतको दिल्लीमा बस्ने गरेको बताएकी छन् । प्रारम्भिक बयानमा आफ्नै लागि बच्चा चोरी गरेको बताएपनि उनीहरूको नियतमा शङ्का गर्ने ठाउँ प्रशस्त रहेको डीएसपी न्यौपानेले बताए । उनीहरूले या त भारतमा विक्री गर्न या नरबली दिन बच्चा चोरी गरेको प्रारम्भिक अनुमान गरिएको छ ।

प्रकाशित : असार २६, २०७६ १५:४१
ADVERTISEMENT
प्रतिक्रिया
पठाउनुहोस्
ADVERTISEMENT

धरानमा डिजेलबाट चल्ने शवदाह गृह तयार

प्रदीप मेन्याङ्बो

(सुनसरी) — व्यवस्थित रुपमा शव दाहसंस्कार स्थलको अभाव रहेको धरानमा झिगु समाजले पहिलोपटक डिजेलबाट संचालन हुने आधुनिक शवदाहस्थल निर्माण गरेको छ ।

साउन पहिलो सातादेखि प्रयोगमा ल्याउन लागिएको डिजेल प्लाण्टको शव दाहसंस्कार स्थल धरान ३ सेउती किनारस्थित खत्रीधारामा निर्माण गरिएको छ।

‘विद्युतीय शव दाहसंस्कार गृह निकै महंगो र खर्चिलो प्रविधि भएकाले विकल्पमा डिजेलबाट संचालन हुने शव दाहसंस्कार स्थल निर्माण गरिएको हो,’ निर्माण समितिका अध्यक्ष मोहनकाजी शाक्यले भने, ‘०६६ सालमा धरान उपमहानगरपालिकाले सेउती किनारको खत्रीधारामा १० कट्टा जमिन उपलव्ध गराएपछि झिगु समाजले व्यवस्थित दाहसंस्कार स्थल निर्माण सुरु गरेको थियो।’

सो शवदाह गृहमा बढीमा आधा घण्टामै शव खरानी बन्ने गरी डिजाइन गरिएको छ। त्यसको कुल लागत १० लाख रुपैयाँमात्र भएपनि अन्य सबै भौतिक पूर्वाधार तयार गर्न १ करोड ६० लाख रुपैयाँ लागेको शाक्यले बताए।

शव दाहसंस्कार स्थल निर्माणकालागि जनसहभागिताबाट मात्र करिव ६० लाख रुपैयाँ संकलन भएको थियो। धरान ८ स्थित धरान औद्योगिक क्षेत्रको सूर्य मेटल प्रालिका संचालक इन्जिनियर उत्तम ताम्राकार र रोहित ताम्राकारले डिजाइन गरेर करिव १० लाख रुपैयाँ बराबरको डिजल प्लाण्ट सहयोग गरेका छन्।
विद्युतीय शवदाह गृहभन्दा केही फरक रहेको डिजेल प्लाण्ट तयार गर्न उनीहरुले तामा पित्तल पगाल्ने डिजेल प्लाण्टको भट्टीलाई नै केही परिवर्तन गरेर शवदाह गृहमा रुपान्तरित गरेका हुन्। उनीहरुले डिजाइन गरेको शवदाह गृहमा फायर प्रुफ इँटा र माटो प्रयोग गरिएको छ।


आधुनिक शवदाह संस्कार स्थल निर्माण गर्न सडक विभागले काठेपुलदेखि जाने ५ सय ५० मिटर सडक ग्राभल गरिदिएको छ। धरान उपमहानगरपालिकाले १५ लाख रुपैयाँ, संघीय सरकारले १० लाख रुपैयाँको क्रियापुत्रीको कपडा चेन्जिङ रुम निर्माण गरिदिएको छ। दाउरा र टायर प्रयोग गर्दा वातावारण समेत प्रदुषित हुने भएकाले डिजेल प्लाण्ट उपयुक्त हुने निष्कर्ष निकालिएको उनले बताए। डिजेल प्लाण्टमा दाहसंस्कार गर्दा बढीमा पाँच हजार रुपैयाँमात्र शुल्क राखिएको छ।

प्रकाशित : असार २५, २०७६ १६:४४
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT