विषादी प्रकरणबारे प्रधानमन्त्रीले भने- 'भारतको कूटनीतिक प्रयासहरू बारे मलाई अनभिज्ञ राखियो'

'पछि मात्र थाहा भयो, त्यससम्बन्धमा भारतले कूटनीतिक प्रयासहरू र विभिन्न ठाउँमा संवादहरू अघि बढाएको रहेछ'
कान्तिपुर संवाददाता

काठमाडौँ — प्रधानमन्त्री केपी शर्मा ओलीले विषादी परीक्षण रोक्नका लागि भारतीय दूतावासले पठाएको पत्रबारे आफूलाई सरकारी निकायले ‘अनभिज्ञ’ राखेको बताएका छन् । भारतीय दूतावासले विभिन्न संवाद गर्दै हिँडेको र पत्र पठाएको बारे २३ गते मात्र जानकारी प्राप्त गरेको प्रधानमन्त्री ओलीले उल्लेख गरेका छन् । 

‘मलाई पछि मात्र थाहा भयो र त्यससम्बन्धमा भारतले कूटनीतिक प्रयासहरू र विभिन्न ठाउँमा संवादहरू अघि बढाएको रहेछ । त्यो कुराबाट पनि मलाई अनभिज्ञ नै राखियो । तसर्थ मेरो जानकारीमा नभएको हुनाले मैले पत्र आएको छैन भनें । तर २३ गते बेलुका मात्र मैले पत्र आएकोबारे जानकारी पाएँ । म त्यसबाट अत्यन्त दुखित छु,’ प्रधानमन्त्री ओलीले बुधबार जनतासँग प्रधानमन्त्री कार्यक्रममा विषादी प्रकरणबारे स्पष्टीकरण दिँदै भने, ‘र, मलाई जसले जानेर भ्रममा राख्यो वा अन्जानमा बताउन भुल्यो, जेसुकै होस्, मसँग त्यो कुरा आएन र मैले प्रधानमन्त्रीको हैसियतमा त्यो जानकारी पाउनुपर्थ्यो । एउटा यथार्थ मबाट लुकेको रहेछ ।’

प्रधानमन्त्रीको यो अभिव्यक्तिले मुलुकको कार्यकारी व्यक्ति नै कति गुमराहमा छन् भन्ने प्रश्न उब्जिएको छ । प्रधानमन्त्री ओलीले २१ गते नेकपाको संसदीयदलमा ‘कस्तो पत्र कसले पठाएको पत्र ?’ भन्दै सांसदहरूमाथि आक्रोश पोखेका थिए । उनले पत्रै नआएको दाबी गरेका थिए ।

प्रधानमन्त्री ओलीले त्यसो भनेको दुई दिनपछि (२३ गते) भारतीय दूतावासले असार १४ मा नै परराष्ट्र मन्त्रालयलाई सम्बोधन र उद्योग वाणिज्य तथा आपूर्ति मन्त्रालय, कृषि मन्त्रालय र खाद्यप्रविधितथा गुणस्तर नियन्त्रण विभागलाई बोधार्थ दिँदै लेखेको पत्र सार्वजनिक भएको थियो । प्रधानमन्त्री ओलीले आफूबाट लुकेको कुरा थाहा नपाउँदा जे हो त्यही अभिव्यक्ति
दिएको बताए ।

‘लुकेको कुरा थाहा नहुँदा मैले आएको छैन (पत्र) भनें । त्यसबाट मैले कहीं जनतालाई अल्मल्याउन खोजेको त होइन भन्ने भ्रम पर्ने अवस्था र विरोधीहरूले भएको कुरालाई हैन भन्यो भनेर प्रचार गर्ने मौका पाए,’ प्रधानमन्त्री ओलीले भने, ‘मलाई त्यसमा कुनै त्यो एउटा तथ्यलाई अर्को ढंगले भन्नुपर्ने र त्यसो भन्दा लाभ हुने अवस्था होइन र थिएन ।’

परीक्षणका लागि तयारी नपुगेको र त्यसअनुसारको संरचना पनि नभएको पाएपछि केही समयका लागि रोक्ने निर्णय आफैंले गरेको ओलीले दाबी गरे । ‘त्यो चासो सरोकार जनाएको कुरा पनि मसम्म आएको थिएन । मैले त आफैं तयारी पुगेको छैन भनेर रोकेको हुंँ,’ प्रधानमन्त्री ओलीले भने, ‘भित्रभित्रै कुरा भएको रहेछ । विभिन्न ठाउँमा राजदूतले नै भेटेर भनेको आदि पाइयो । यो कुरा त मलाई कसैले बताएन । मैले त हाम्रो तयारी पुगेन भनेर केही समयका लागि तयारी गर्नका लागि रोक्ने निर्देशन गरेको हो ।’

उनले विषादी परीक्षण कुनै देशसँग लक्षित नरहेको बताए । ‘यो कुनै देशसँग लक्षित होइन । सामान्य ढंगले हामीले आयात गर्ने खाद्यपदार्थ शुद्ध हुनुपर्छ भन्ने कुरा हो,’ उनले भने, ‘यो कुनै देशका विरुद्ध होइन, हामी धेरै देशबाट खाद्य सामग्री आयात गर्छौं, बंगलादेश, थाइल्यान्ड, ब्राजिल, अमेरिकाबाट गर्छौं तर अलिक ठूलो भोल्युममा भएकाले त्यसले अलिक चासो सरोकार जनायो होला ।’ प्रधानमन्त्री ओलीले अहिले पनि सम्पूर्ण रूपमा परीक्षण नरोकिएको दाबी गरे ।

छिटो परीक्षणका लागि छिटो काम भइरहेको र अन्य मित्रराष्ट्रहरूलाई पनि परीक्षण गरेको प्रमाणपत्रसहित पठाउनुहोस् भनेर आग्रह गरेको प्रधानमन्त्रीले जानकारी दिए । अहिले आफूले नै परीक्षणको काम सुरु गरेको र केही समय तयारीका लागि रोक्दा‘कोहोहोलो’ मच्चाइएको भन्दा आक्रोश पोखे ।

‘यसअघि अमृतै अमृत आउँथ्यो ? छानबिन गर्नु पर्दैनथ्यो, बहुमत राम्रो कुरा मात्र हुन्थ्यो ? यतिबेला चाहिँ हल्ला भएको छ । विषादीयुक्त चीज खाने भनेर ? तबसम्म किन नबोलेका जबसम्म म बोलिनँ ? किन नबोलेको हो ? अहिले मैले छानबिन गरिरहेको छु र मित्रराष्ट्रहरूलाई आफ्ना परीक्षण गरेको प्रमाणपत्र दिएर सामान पठाउनु भनेको छु,’ प्रधानमन्त्री ओलीले भने ।

जनशक्ति र यन्त्रहरू पनि पर्याप्त नरहेको अवस्थामा परीक्षण गर्न सकिन्छ भन्ने खालको प्रस्ताव मन्त्रालयबाट किन आयो भन्नेमा पनि प्रधानमन्त्रीले आशंका व्यक्त गरेका छन् । ‘अब भयो (परीक्षण गर्ने क्षमता) भनेर प्रस्ताव किन ल्यायो ? तर प्रस्ताव त्यसरी आयो जसबाट म अलिकति झुक्किएँ,’ प्रधानमन्त्री ओलीले भने । उनले यो प्रकरणमा प्रतिक्रिया दिनेहरूप्रति आपत्ति जनाए ।

‘यसलाई बहुतै देशभक्त पल्टिएर र जनताका स्वास्थ्यमा बहुतै सजग पल्टिएर कोही चिकित्सकहरू कराउने, कोही कुन संस्था कराउने ? एकैचोटि जुन यो हुइँया मच्चिएको छ, यो हुइँयाको सजगताका लागि धन्यवाद छ,’ प्रधानमन्त्री ओलीले भने, ‘यसअघि किन चुँ पनि गरिएन ? म सरकारमा आएपछि त सजगता अपनाएँ । तयारी गर्नुपर्ने ठाउँमा तयारी गरें । अलिकति तयारी नपुगेको रहेछ, घोषणा हतारोसाथ भएछ, त्यसैले केही समयलाई रोकेको हो ।

प्रकाशित : असार २६, २०७६ ०७:५०
प्रतिक्रिया
पठाउनुहोस्

प्रतिबन्धपछि चन्द समूहका ८ कार्यकर्ता मारिए, गाउँगाउँमा थपिए सुरक्षाकर्मी

कान्तिपुर संवाददाता

काठमाडौँ — सरकारले नेत्रविक्रम चन्द समूहलाई प्रतिबन्ध लगाएपछिको द्वन्द्वका क्रममा चन्द समूहका ८ नेता–कार्यकर्ता मारिएका छन् । चन्द समूहको आक्रमणमा एक सर्वसाधारण र एक प्रहरी जवानको पनि ज्यान गएको छ ।

पछिल्लोपल्ट बुधबार भोजपुरमा ओखलढुंगा इन्चार्ज नीरकुमार राई र प्रहरी जवान सञ्जीव राई मारिएका हुन् । भोजपुरमा दुई, सर्लाहीमा एक, काठमाडौं विस्फोटमा ५ गरी चन्द समूहका ८ जना मारिएका हुन् । काठमाडौ विस्फोटमा एक सर्वसाधारणको पनि ज्यान गएको थियो ।

प्रतिबन्धयताको अवधिमा दुई प्रहरीसहित ९ जना घाइते छन् ।

नेकपा संसदीय दलको चैत ११ को बैठकमा प्रधानमन्त्री केपी शर्मा ओलीले चैत महिनाभित्र नेत्रविक्रम चन्द समूहलाई सरकारले निस्तेज पारिसक्ने दाबी गरेका थिए । प्रधानमन्त्रीको यस्तो दाबीपछिका चार महिनामा पटकपटक चन्द समूह र प्रहरीबीच देशका विभिन्न स्थानमा भिडन्तको अवस्था सिर्जना भएको देखिन्छ ।

फागुन २८ गते बसेको मन्त्रिपरिषद् बैठकले चन्द समूहको गतिविधिमा प्रतिबन्ध लगाएपछि उक्त समूहका नेता तथा कार्यकर्तामाथि निगरानी बढाउन, सार्वजनिक रूपमा कार्यक्रम गर्न नदिन सुरक्षा निकायलाई परिचालन गरिएको थियो । सरकारी निर्णयपछि प्रहरीले देशैभर चन्द समूहका नेता तथा कार्यकर्ता पक्राउ तीव्र पारेको थियो ।

१० चैतमा गृह मन्त्रालयले चन्द समूहलाई प्रत्यक्ष–परोक्ष सहयोग पुर्‍याउने व्यक्ति, संस्था वा समूहलाई समेत कारबाहीको दायरामा ल्याइने भन्दै सार्वजनिक सूचना जारी गरेको थियो ।

सूचना जारी भएलगत्तै प्रधानमन्त्री ओलीले चैत महिनाको समय दिएका थिए । त्यसपछि झन् सरकार र चन्द समूह आमनेसामने भइरहेका छन् । असार ५ गते सर्लाहीको लालबन्दी नगरपालिका–१ मा चन्द समूहका जिल्ला इन्चार्ज कुमार पौडेल प्रहरीको गोलीबाट मारिए ।

दोहोरो भिडन्तमा कुमार मारिएको दाबी प्रहरीले गरे पनि फेक इन्काउन्टरमा प्रहरीले पौडेललाई मारेको भन्दै संसद्मा प्रतिपक्षी र सरकारसम्बद्ध दलकै नेताले प्रश्न उठाइरहेका छन् । यो विषयमा संसदीय छानबिनको माग गर्दै प्रमुख विपक्षी कांग्रेसले प्रतिनिधिसभा अवरोध गरिरहेको छ ।

गत जेठ ७ मा भोजपुरको ट्याम्के मैयुङ गाउँपालिकामा चन्द समूहकै कार्यकर्ता तीर्थराज घिमिरेको पनि प्रहरीको गोली लागी मृत्यु भएको थियो । प्रहरीले आफ्ना कार्यकर्तालाई नियन्त्रणमा लिएर हत्या गरेको भन्दै चन्द समूहले नेपाल बन्दकै आयोजना गरेको थियो ।

प्रतिबन्धअघि २०७५ वैशाखदेखि फागुन ९ सम्म प्रहरीले चन्द समूहका एक सय ९० नेता–कार्यकर्ता पक्राउ गरेको थियो । तीमध्ये एक सय ७२ जनाको मुद्दा दर्ता भएका थिए । गत फागुनदेखि असार २५ सम्म मात्र चन्द समूहका ५ सय ७९ जना पक्राउ परेका छन् । ८७ जना पुर्पक्षका लागि कारागार चलान भएका छन् । ७० जना अनुसन्धानका क्रममा थुनामा छन् । ५ सय ३६ विरुद्ध प्रहरीले मुद्दा दर्ता गरेको छ । यही अवधिमा चन्द समूहका ३९ जनालाई पक्राउपछि सोधपुछ गरेर छाडिएको प्रहरी प्रधान कार्यालयले जनाएको छ । प्रहरीको दाबीअनुसार यो अवधिमा चन्द समूहका ३ सय ५२ जनाले समूह परित्याग गरेको लिखित प्रतिबद्धता जनाएका छन् ।

चन्द समूहले गरेको विस्फोटबाट यो अवधिमा चन्द समूहका ५ सहित ६ जनाको मृत्यु भइसकेको छ । त्यस्तै ७ घाइते छन् । प्रहरी र चन्द समूहबीचको दोहोरो भिडन्तमा फागुनमा दुई प्रहरी घाइते भएका थिए । यो अवधिमा २३ नाल हतियार बरामद भएका छन् । तीमध्ये एएम १६–ए टु एक थान, एलएमजी र एसएलआर जस्ता अत्याधुनिक हतियारसहित ‘३०३ राइफल’ ३ थान, ७ थान पेस्तोल, ३ थान रिभल्वर र ५ थान घरेलु हतियार पनि बरामद गरेको छ । चन्द समूहका कार्यकर्ताबाट चार सय १७ राउन्ड गोली र ४ डेटोनेटर पनि यो अवधिमा प्रहरीले बरामद गरेको छ ।

प्रहरीका एक उच्च अधिकारीले चन्द समूहसँग सामान्य मात्रै नभएर अत्याधुनिक हतियार रहेको र तीमध्ये केही जनयुद्धकालीन र केही हालसालै किनिएका हुन सक्ने बताए । गृहमन्त्री रामबहादुर थापाले यसअघि नै चन्द समूहको शक्ति बढदै गएको र चारवटा सैन्य कम्पनी निर्माण गरेको संसद्मै जानकारी गराएका थिए ।

प्रहरीको गोलीबाट मृत्यु भएका तीनजना चन्द समूहका नेता–कार्यकर्ताको साथबाट प्रहरीले हतियार बरामद गरेको देखिन्छ । जेठ पहिलो साता भोजपुरको ट्याम्केमा मारिएका तीर्थराज घिमिरेको साथबाट प्रहरीले कटुवा पेस्तोल र त्यसमा लाग्ने ५ थान गोली, ४ थान डेटोनेटर बरामद गरेको प्रहरीको दाबी छ ।

त्यस्तै सर्लाही घटनामा मृत्यु भएका कुमार पौडेलको साथबाट सिक्सर रिभल्वर, त्यसमा लाग्ने ४ थान गोली र एक थान कटुवा पेस्तोल बरामद गरेको प्रहरीले बताएको थियो । बुधबारको घटनामा मारिएका चन्द समूहका कार्यकर्ताबाट पनि प्रहरीले चाइनिज पेस्तोल फेला परेको दाबी गरेको छ । यी तीनै घटनामा प्रहरीले दोहोरो भिडन्त दाबी गरेको छ भने तीनै मृतकको साथबाट बन्दुक फेला पारेको देखिन्छ ।

प्रकाशित : असार २६, २०७६ ०७:४२
पूरा पढ्नुहोस्
प्रतिक्रिया
पठाउनुहोस्