अब ड्रोनले गर्छ योजना अनुगमन

पर्यटकीय क्षेत्रको प्रचारका लागि पनि ड्रोनकै माध्यमबाट भिडियो र तस्बिर लिने पनि नगरपालिकाको योजना छ ।
हरिराम उप्रेती

गोरखा — सदरमुकामर रहेको गोरखा नगरपालिकाभित्र सञ्चालित योजनाको सर्वे र अनुगमन आगामी वर्षदेखि ड्रोनबाट हुने भएको छ । यसका लागि नगरपालिकाले ड्रोन किनिसकेको छ । मंगलबार त्यसको परीक्षणसमेत गरियो ।

आगामी आर्थिक वर्षको साउनबाट नगर क्षेत्रमा सञ्चालन हुने योजनाको सर्वे, अनुगमन र नक्सांकन ड्रोनका माध्यमबाट हुने नगर प्रमुख राजनराज पन्तले बताए ।

ड्रोन सञ्चालनका लागि सञ्चार मन्त्रालय र जिल्ला प्रशासन कार्यालयमार्फत अनुमति लिने प्रक्रिया थालिएको उनको भनाइ छ । नगरपालिकामा प्राविधिक जनशक्ति अभावलाई केही हदसम्म पूरा गर्न ड्रोनले सघाउने नगरपालिकाको विश्वास छ ।

‘धेरै जनशक्ति खटिरहनुपर्दैन,’ उनले भने, ‘ड्रोनले आवश्यक कुरा खिचेर ल्याएपछि कार्यालयका कर्मचारीले चाहिएको तथ्यांक लिन सक्छन्, यसले समयको पनि बचत हुनेछ ।’ नगरपालिकामै बसेर योजनाको अनुगमन गर्न सक्ने प्रविधि भएकाले यसले फाइदा पुर्‍याउने उनको भनाइ छ । ‘ड्रोन सञ्चालनका लागि एउटा कक्ष स्थापना गरेर व्यवस्थित रूपमा अघि बढ्छौं,’ पन्तले भने ।

पर्यटकीय क्षेत्रको प्रचारका लागि पनि ड्रोनकै माध्यमबाट भिडियो र तस्बिर लिने पनि नगरपालिकाको योजना छ । ‘सन् २०१९/२० पर्यटन वर्ष घोषणा गरेर पर्यटक भित्र्याउने प्रदेश र संघीय सरकारले घोषणा गरिसकेका छन्,’ पन्तले भने, ‘अब हाम्रो नगरपालिकामा पर्यटक भित्र्याउन यहाँ रहेका ऐतिहासिक एवं पर्यटनसँग सम्बन्धित ठाउँलाई ड्रोनमार्फत भिडियो र तस्बिर लिएर प्रचारप्रसारमा जोड दिन्छौं ।’

गोरखा नगर क्षेत्रको ऐतिहासिक, धार्मिक एवं पर्यटकीय क्षेत्रलाई समेटेर वृत्तचित्र निर्माण गरी अन्तर्राष्ट्रिय स्तरसम्म पुर्‍याउने नगरपालिकाको योजना छ । २०७५/७६ को वार्षिक नीति तथा कार्यक्रममा योजना समावेश गरेर ड्रोन किनिएको उनले बताए ।

त्यसका लागि झन्डै १५ लाख रुपैयाँ लागत लागेको छ । ‘प्रविधिमैत्री बन्न के गर्न सकिन्छ भनेर अध्ययन गर्दै जाँदा नगरपालिकाको कामलाई छिटोछरितो बनाउन उपयुक्त ड्रोन हुन्छ भनेर निर्क्योल गरेका हौं,’ पन्तले भने, ‘कार्यालयमै बसेर कामको नियमित अनुगमन हुने भएपछि फिल्डमा रहेका कामदारले गुणस्तरमा पनि ध्यान दिन्छन् भन्ने हाम्रो विश्वास छ ।’

प्राविधिकले पाँच दिन लगाएर गर्ने काम ड्रोनबाट दुई घण्टामै गर्न सकिने नगरपालिकाका सूचना प्रविधि अधिकृत सुयोग खनालले जानकारी दिए । ‘ड्रोनले एक सेन्टिमिटरसम्मको गल्ती निकाल्छ,’ उनले भने, ‘तस्बिरका आधारमा वास्तविक तथ्यांक निकाल्न यो बढी सहयोगी हुन्छ ।’

नगर क्षेत्रबाट सबैभन्दा टाढाका गाउँ देउराली र ताप्लेसम्मका योजना नगरपालिकाबाटै हेर्न सकिने उनले बताए । ‘ड्रोनले २० देखि ३० वटा स्याटेलाइटसँग समन्वय गरी डाटा लिएर आउँछ,’ खनालले भने, ‘आठ किलोमिटर परसम्मका योजना हेर्न र डाटा लिन सक्छौं ।’

फोटो र भिडियो हाई रिजोल्युसनको आउने र इमेज स्पष्ट देखिने भएकाले कम्प्युटरमा हालेर प्रोसेसिङ गरेपछि कुनै पनि डेटा नहराउने खनालको भनाइ छ । लम्बाइ, उचाइ क्षेत्रफल सबै तस्बिरमार्फत हेर्न मिल्ने भएकाले कार्यसम्पादनमा सजिलो हुने उनले बताए ।

ड्रोन ६ किलोमिटर उचाइ र आठ किलोमिटरसम्म टाढा उडन सक्ने र ७० देखि ८० किलोमिटर प्रतिघण्टा उडाउन सकिन्छ । ‘एक पटक उडेपछि आधादेखि ४५ मिनेटसम्म फिल्डमा पुगेर तस्बिर लिन सक्छ,’ उनले भने, ‘ब्याट्रीबाट चल्ने हो, काम नसके निश्चित उचाइमा ल्याएर फिर्ता ल्याउने र ब्याट्री चेन्ज गरेर पठाएपछि काम रोकिएको स्थानबाटै काम सुरु गर्न सकिन्छ ।’

प्रकाशित : असार १७, २०७६ १९:५१
प्रतिक्रिया
पठाउनुहोस्

सत्तारूढकै सांसदले मागे बजेट संशोधन

नेकपाका ३९ सांसदमध्ये २५ जनाले हस्ताक्षरसहित मुख्यमन्त्रीलाई पत्र बुझाए 
अर्जुन शाह

धनगढी — आफ्नै दलका दुई तिहाइ सांसदले लिखित रूपमै बजेट संशोधनको माग गरेपछि सुदूरपश्चिम प्रदेश सरकार अप्ठेरोमा परेको छ । नेकपाका २५ सांसदले हस्ताक्षरसहितको पत्र सोमबार मुख्यमन्त्रीलाई बुझाएका हुन् । ‘पार्टीको प्रदेश कमिटीलाई पनि बोधार्थ दिएका छौं,’ एक सांसदले भने । 

सुदूरपश्चिममा नेकपाको सरकार छ । दुई तिहाइ बहुमत छ । सभामुख, उपसभामुख र ८ जना मन्त्रीसहित ३९ जना पार्टीकै सांसद छन् । यसअघि कांग्रेस र राजपाका सांसदले मात्रै बजेट संशोधनका लागि सरकारलाई दबाब सिर्जना गर्दै आएका थिए । बजेट प्रस्तुत भएकै दिनदेखि प्रदेशसभा बैठक बस्न नसकेर बजेटमाथिको छलफल सुरु हुन सकेको छैन ।

हस्ताक्षर गर्ने सांसदहरूले बजेट असन्तुलित भएको, यथार्थपरकभन्दा जनस्तरमा विवादित योजनाहरूमा बजेट पारिएको, सांसदहरूको सुझावलाई लत्याइएको भन्दै असन्तुष्टि जनाएका छन् । उनीहरूले भौतिक मन्त्रालयतर्फ असन्तुलित र न्यून बजेट परेका निर्वाचन क्षेत्रहरूमा आवश्यकताअनुसार व्यवस्था गर्न, यथार्थपरक नभएका र जनस्तरमा गुनासो आएका योजना कार्यान्वयन नगर्न भनेका छन् । प्रमुख सचेतक तारा लामा तामाङ र सचेतक अक्कलबहादुर रावलको अगुवाइमा हस्ताक्षर संकलन भएको एक सांसदले बताए । तर तामाङले केही बताउन चाहेनन् ।

आफ्नै दलका सांसदको लिखित रुष्टता मुख्यमन्त्री त्रिलोचन भट्ट, आर्थिक मामिला तथा योजनामन्त्री झपट बोहरा र भौतिक पूर्वाधार विकासमन्त्री पठानसिंह बोहराको थप टाउको दुखाइ बनेको छ । त्यसअघि सांसदले बजेट असन्तुलित रहेको भन्दै गरिरहेको टिप्पणीलाई सरकारले वास्ता गरेको थिएन । सरकारका प्रवक्तासमेत रहेका आन्तरिक मामिला तथा कानुनमन्त्री प्रकाशबहादुर शाहले सोमबार एक सार्वजनिक कार्यक्रममै बजेट पहुँचका आधारमा विनियोजन भएको संकेत गरेका थिए । स्रोतका अनुसार मन्त्रीहरूबीच पनि बजेटबारे समझदारी छैन ।

यता प्रमुख प्रतिपक्षी दल कांग्रेस र राजपाको विरोधका कारण प्रदेशसभा बैठक हालसम्म बस्न सकेको छैन । सरकार र प्रतिपक्षबीच वार्ता चलिरहे पनि निष्कर्षमा पुगेको छैन । प्रतिपक्षले समावेश गर्नुपर्ने योजनाको बेग्लै सूची पेस गरेका छन् । उनीहरूबीच कुरा नमिलेकाले मंगलबारको बैठक पनि सारिएको छ । सरकार र विपक्षी दलबीचको वार्ता मंगलबारसम्म टुंगोमा पुग्न सक्ने वार्तामा संलग्न कांग्रेस सांसद भरत खडकाले बताएका थिए । तर नेकपाकै सांसद बजेटविरुद्ध खनिएपछि कांग्रेस र राजपासँगको वार्ता ओझेलमा परेको सांसद दुर्गा विकले बताइन् ।

कांग्रेस र राजपाले बजेटमा संसोधन गरी आफूहरूले प्रस्ताव गरेका योजना समावेश गर्न सरकार लचिलो हुँदै गएर सहमतिनजिक पुग्नै लागेका बेला घटनाले नयाँ मोड लिएको सांसद खडकाले बताए । ‘त्यही पनि आशा गरौं, अहिलेसम्म वार्ता सकारात्मक बाटोमा हिँडेको महसुस गरेका छौं,’ उनले भने ।

प्रकाशित : असार १७, २०७६ १९:४७
पूरा पढ्नुहोस्
प्रतिक्रिया
पठाउनुहोस्