भाइरल ‘कुर्सी सलामी’ मेयरको स्पष्टोक्ति : 'अञ्जानमा गल्ती भो’

रमेशचन्द्र अधिकारी

धनकुटा — जब खेलकुदको धुन बज्न थाल्यो, नगर प्रमुख भने कुर्सी माथि चढेर सलामी दिन थाले । भेला भएका सर्वसाधारण अनौठो मानेर दृश्य नियालिरहे । महालक्ष्मी नगरपालिकाका प्रमुख पर्शुराम नेपालले राष्ट्रपति रनिङ शिल्ड प्रतियोगिताको उद्घाटन गर्नेक्रममा बुधबार जितपुरस्थित खेल मैदानमा सलामी दिएका हुन् ।

उपप्रमुख मञ्जु अधिकारी सहित अन्य अतिथि भूइँमा उभिएका थिए। तर, प्रमुख नेपाल मात्र कुर्सीमा उभिएर सलामी दिए। उनी प्लाष्टिकको कुर्सीमा टेकेर सलामी दिन टेबल माथि उभिएका थिए।
पछिल्लो केही दिनमा उनले सलामी दिएको तस्बिर र शैलीबारे सामाजिक सञ्जालमा टिप्पणी आउनेक्रम तीव्र बनेको छ। गणतान्त्रिक व्यवस्थाका जनप्रतिनिधिले विगतको राजतन्त्रात्मक शैलीको व्यवहार देखाउने गरिएको भन्दै सर्वसाधारणबाट गुनासो चुलिएको छ। खासगरी विगत दुई दिनदेखि सामाजिक सञ्जालमा ‘कुर्सी सलामी’ को तस्बिर भाइरल हुँदै गएपछि खैलाबैला मच्चिएको छ। नगर प्रमुखले त्यसप्रकारको शैली अपनाउने कार्यलाई पचाउन नसकिने स्थानीय रविन बुढाथोकी बताउँछन्। ‘उक्त कार्य सामान्तवादी शैलीको छ,' उनले भने, ‘यो जनप्रतिनिधिले सुहाउने तौरतरिका होइन।’
जिल्लाका ७ स्थानीय तहमध्ये सबैमा तत्कालिन एमालेले क्लीन स्वीप जीत हात पारेको थियो। त्यसमध्ये प्रभावशाली मेयरको रुपमा देखिएका नेपालले राष्ट्रपति रनिङ शिल्ड प्रतियोगितामा देखाएको शैली अपच्य सावित भएको स्थानीयको गुनासो छ।
पछिल्लो समय सामाजिक सञ्जालको टिप्पणी र सलामीको तस्बिरलाई आवश्यकता भन्दा बढि नकारात्मक बनाइएको उक्त नगरपालिका अन्तर्गत प्रधानमन्त्री स्वरोजगार कार्यक्रमका अधिकृत गौरब कार्कीको भनाई छ। उनले मनशाय खराब नगरि गरिएको कार्यलाई क्षम्य हुनु पर्ने तर्क राखे। उक्त कार्यबारे प्रतिक्रिया लिन बारंबार सम्पर्क गर्दा नेपालले टेलिफोन उठाएनन्।
तर, महालक्ष्मी नगरपालिकाका प्रमुख प्रशासकीय अधिकृत सहदेव रायामाझी र स्रोत व्यक्ति पुष्पबहादुर कटुवालद्वारा संयुक्त रुपमा हस्ताक्षरित विज्ञप्ति मार्फत उक्त टिप्पणी प्रति आफुहरुको गम्भीर ध्यानाकर्षण भएको जनाइएको छ।
खेलकुद प्रतियोगितामा उपस्थितिका आधारमा सबैभन्दा वरिष्ठ व्यक्तिको हैसियतमा आयोजकको आग्रहमा टेबलमा उभिन आग्रह गरिएको विज्ञप्तिमा उल्लेख छ। विगतमा जस्तै नियमित सलामीको कार्य भएकोले भ्रम फैलाउने काम नगर्न नगर कार्य पालिकाको कार्यालयको तर्फबाट आग्रह गरिएको विज्ञप्तिमा उल्लेख छ। खेलाडीलाई प्रोत्साहन दिन अरु भन्दा माथि उभिएर सलामी दिइएको दाबी समेत गरिएको छ।
यस्तै, नगरपालिकाका प्रमुख नेपालले समेत सोमबार सामाजिक सञ्जाल मार्फत आफूले गरेको कार्यप्रति आत्मालोचना गरेका छन्। उनले आफूबाट अञ्जान गल्ती गरेको बताएका छन्। ‘म बाट गल्ती भएको महसुस भइरहेको छ,' उनले भने, ‘आगामी दिनमा यसलाई पाठ ठानेर सुधार गर्ने छु।’ आफूले तल बसेरै सलामी दिने भनेपनि आयोजकले चलन रहेको भन्दै टेबल ल्याएपछि सोही बमोजिम गरेको उनले उल्लेख गरेका छन्। सामान्तवादको सिको गर्न खोजेको आरोपलाई भने स्वीकार गर्न नसक्ने उनले जनाएका छन्।

पढ्नुहोस् विज्ञप्ति:

प्रकाशित : असार ९, २०७६ १८:१४
प्रतिक्रिया
पठाउनुहोस्

चन्द समूहका जिल्ला अध्यक्षसहित तीन जना पक्राउ

लुकाइछिपाइ राखेको दुई थान अटोमेटिक पेस्तोल, त्यसमा लाग्ने ४ थान म्याग्जिन र १४ राउण्ड गोली र ३ नाल भरुवा बन्दुक बरामद
देवनारायण साह

मोरङ — चन्द समूहका मोरङ अध्यक्ष अशोक राई सहित तीन जनलाई प्रहरीले पक्राउ गरेको छ । उनीहरुलाई बेलबारी नगरपालिका–३ स्कुल डाँडाबाट पक्राउ गरिएको प्रहरीले जनाएको छ।पक्राउ पर्नेहरुमा कानेपोखरी गाउँपालिका–६ का ३४ वर्षीय सुदिप भन्ने कंश धिमाल र उर्लाबारी–२ सालबारीका ४८ वर्षीय केन्द्रलाल धिमाल पक्राउ परेका हुन् ।

मोरङको बेलबारी नगरपालिका–३ स्कुल डाँडाबाट आइतबार साँझ पक्राउ परेका चन्द समूहका जिल्ला अध्यक्ष अशोक राई लगायतका र उनीहरुले लुकाएर राखेको अवस्थामा बरामद हतियार जिल्ला प्रहरी कार्यालय मोरङले सोमबार सार्वजनिक गर्दै । तस्बिर : देवनारायण साह/कान्तिपुर


उनीहरुलाई जिल्ला प्रहरी कार्यालय मोरङले सोमबार पत्रकार सम्मेलन गरी सार्वजनिक गरेको छ।

यस्तै, प्रहरीले लुकाइछिपाइ राखेको दुई थान अटोमेटिक पेस्तोल, त्यसमा लाग्ने ४ थान म्याग्जिन र १४ राउण्ड गोली र ३ नाल भरुवा बन्दुक र त्यसमा प्रयोग हुने बारुद, छर्रा, नटबोल्ट, केप, वासर बरामद भएको जिल्ला प्रहरी कार्यालय मोरङका प्रहरी उपरीक्षक विश्व अधिकारीले बताए।

‘प्रारम्भिक अनुसन्धानको क्रममा उनीहरुले कंशको घरमा हतियार लुकाएर राखेको खुलेको थियो,’ प्रहरी उपरीक्षक अधिकारीले भने, ‘तत्काल उनको घर चेकजाँच गर्दा रातो झोलामा राखिरहेको अवस्थामा दुई थान अटोमेटिक पेस्तोल र त्यसमा लाग्ने ४ थान म्याग्जिन र १४ राउण्ड गोली बरामद भयो।’
थप अनुसन्धानको क्रममा सालबारीमा केही हतियार राखेको खुलेको अधिकारीले बताए। ‘तत्काल प्रहरी परिचालन गरेर सोमबार केन्द्रलाललाई नियन्त्रणमा लिई उनको घरमा खोजी गर्दा ३ नाल भरुवा बन्दुक त्यसमा प्रयोग हुने बारुद, छर्रा, नटबोल्ट, केप, वासर र पुल्थ्रोमा प्रयोग भएको कपडा बरामद भयो,’ उनले भने, ‘तीन थान बन्दुकमध्ये एउटा लोड भएको अवस्थामा बरामद भएको छ।’

उनीहरुलाई मुलुकी फौजदारी अपराध ऐन २०७४ अन्तर्गत हातहतियार तथा खरखजाना मुद्दा दर्ता गरी थप अनुसन्धान भइरहेको प्रहरी उपरीक्षक अधिकारीले बताए।

प्रकाशित : असार ९, २०७६ १८:०५
पूरा पढ्नुहोस्
प्रतिक्रिया
पठाउनुहोस्