हुम्ला जिप दुर्घटना : बेपत्ता भेटिएनन्, गोताखोर फर्किए

छपाल लामा

हुम्ला — कर्णाली नदीमा जिपसँगै बेपत्ता भएका व्यक्ति नभेटिएपछि गोताखोर टोली फर्किएको छ । गत मंगलबार खार्पुनाथ गाउँपालिका–५ को बेडुबिसौना र कैल्यवालुको बीचमा जिप सडकदेखि २० मिटर तल नदी खसेको थियो ।

घटनाको भोलिपल्ट सशस्त्र प्रहरी निरीक्षक लक्ष्मण बस्नेतको गोताखोर टोली जिप र बेपत्ताको खोजीको लागि हुम्ला आएको थियो। तीन दिनसम्म लगातार खोज्दा पनि नभेटिएपछि टोली फर्किएको प्रमुख जिल्ला अधिकार धोलकराज ढकालले बताए। नदीमा पानीको बहाव बढ्नु, पानी धमिलो हुनु, चिसो बढ्नु जस्ता कारणले गोताखोरको लागि खोजीकार्य जटिल बनेको उनले जानकारी दिए।

राष्ट्रिय सडक सञ्जालसँग नजोडिएको एकमात्र जिल्ला हुम्लामा खार्पुनाथ यातायात प्रालिले हेलिकोप्टरबाट चारवटा जिप लगेर सेवा दिएको थियो। लु१ज ७१६६ नम्बरको उक्त जिप खसेपछि अब खार्पुनाथसँग तीनवटा जिप बाँकी छन्। प्रालिका अध्यक्ष सरोज रावतले दुर्घटनास्थल खासै अप्ठेरो नभए पनि कसरी खस्यो भन्दै आश्चर्य व्यक्त गरे।

जिप दुर्घटनामा परि बेपत्ता भएका व्यक्तिको बिहीबार कुशको शव बनाएर कर्णाली नदीमा अन्त्यष्टि गरिँदै। तस्बिर : छपाल लामा। कान्तिपुर


जिप दुर्घटनामा खार्पुनाथ गाउँपालिका उपाध्यक्ष सिन्धु हमाल शाहसहित ११ जना बेपत्ता भएका थिए। गाउँपालिकाको खापुबाट पालिका केन्द्र याङचु जाने क्रममा जिप कर्णाली नदीमा खसेको थियो।

गोताखोर टोली उपलव्धीबिनै फर्किएपछि गाउँपालिका अध्यक्ष कर्ण रावलले निराशा व्यक्त गरे। उनले गोताखोर आएपछि बेपत्ताको केही न केही भेटिने आश भए पनि असंभव भएको बताए। गाउँपालिका उपाध्यसहित व्यक्ति गुमाएपछि खार्पुनाथमा शोक छाएको छ। गाउँपालिकाका जनप्रतिनिधि र कार्यालयका कर्मचारीसमेत स्तव्ध छन्।

यही शोकमा गाउँपालिकाले १३ दिनसम्म कुनै पनि औपचारिक कार्यक्रम नगर्ने निर्णय गरेको छ। बेपत्ता सबैका परिवारलाई जनही १० हजार रुपैयाँ किरियाखर्च बापत दिइने अध्यक्ष रावलले जनाए। उनका अनुसार तेह्रौं दिनको दिन असार १६ गते गाउँपालिकामा श्रद्धाञ्जलीसभा गर्नुका साथै सम्पूर्ण सरकारी कार्यालय र विद्यालय बन्द गरिनेछन्।

स्थानीय शोभा शाहीले उपाध्यक्ष सिन्धुको मत्युले गाउँपालिका र जिल्लाले ठूलो क्षति व्यहोरेको बताइन्। ‘उहाँजस्तो मिलनसार र कुशल नेतृको अभाव सधैं खडकरहने छ,’ उनले भनिन्, ‘ हामीलाई राजनीतिक र सामाजिक काममा प्रेरणा दिइरहने स्वभाव यहाँका महिलाले सम्झिरहने छन्।’

पुत्ला बनाएर दाहसंस्कार
यसैबीच, दुर्घटनामा बेपत्ता भएका व्यक्तिको शव नभेटिएपछि बिहीबार आफन्तले कुशको पुत्ला बनाई दाहसंस्कार गरेका छन्। अन्तिम संस्कारसँगै उनीहरूको विधिवत रूपमा मृत्यु भएको विश्वास गरिएको छ।

उपाध्यक्ष सिन्धु हमाल शाहीसँगै ७ जनाको कर्णाली नदीको खापुदोभानमा दाहसंस्कार गरियो। प्यूस निवासी कौरा दमाई र उनका दुई वर्षीय छोराको भने कर्णालीकै गोग्चेगौंडामा दाहसंस्कार गरिएको छ। परालको पुत्ला बनाएर दाहसंस्कार गरिँदा स्थानीय शोकमग्न अवस्थामा दाहसंस्कारस्थलमा पुगेका थिए।

उनीहरूले बेपत्ता व्यक्तिहरूप्रति अन्तिम श्रद्धाञ्जलीसमेत गरे। ‘तीन दिनसम्म खोज्दा पनि लाश भेटिने आश मरेपछि हिन्दु परम्पराअनुसार परालको पुत्ला बनाएर दाहसंस्कार गरेका हौं,’ गाउँपालिका अध्यक्ष रावलले भने, ‘उहाँहरू सबैको स्वर्गमा बास होस्।'

प्रकाशित : असार ७, २०७६ २०:३०
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

मुख्यमन्त्रीलाई केन्द्रमा राखेर अर्बभन्दा बढीका योजना

प्रदेश सरकार भनेको मुख्यमन्त्री केन्द्रीत नै हुने हो, पदलाई स्थापीत गर्न र संघियतालाई बलीयो बनाउन केही कार्यक्रम ल्याउनु आवश्यक छ– मन्त्री इन्द्रवहादुर आङबो 
लीलावल्लभ घिमिरे

विराटनगर — आगामी आर्थिक वर्ष ०७६/७७ का लागि प्रदेश सरकारले मुख्यमन्त्रीसँग जोडेर अर्बभन्दा बढीका कार्यक्रम सञ्चालन गर्ने भएको छ । संघ सरकारले प्रधानमन्त्रीसँग जोडेर ल्याएका योजना जस्तै प्रदेशमा पनि मुख्यमन्त्रीलाई केन्द्रमा राखेर योजना ल्याइएको हो ।

एउटै कार्यक्रममा करोडौं रुपैयाँ छुट्याइएको छ । सबै कार्यक्रममा १ अर्ब ५ करोड रुपैयाँभन्दा बढी विनियोजन गरिएको छ । मुख्यमन्त्रीसँग जोडेर सडक निर्माण, रेडियो टीभी कार्यक्रम सञ्चालन, रोजगारी र पुरस्कारदेखि खेलकुदसम्मका कार्यक्रम ल्याइएको छ ।

चालु आर्थिक वर्षमा समेत रहेको मुख्यमन्त्री ग्रामीण सडक सुधार कार्यक्रममा आगामी वर्षका लागि ४ करोड थप गरेर ७४ करोड पुर्‍याएको छ । यसैगरी मुख्यमन्त्री तथा मन्त्रिपरिषदको कार्यालयमा स्थापना गर्ने गरी ‘मुख्यमन्त्री ड्यासवोर्ड’ का लागि २ करोड विनियोजन गरिएको छ ।

‘मुख्यमन्त्रीसँग जनता रेडियो कार्यक्रम’ का लागि १० लाख रुपैयाँ विनियोजन गरिएको छ । ‘मुख्यमन्त्रीसँग जनता टेलिभिजन कार्यक्रम’ का लागि १५ लाख रुपैयाँ छुट्याइएको छ । ‘मुख्यमन्त्री राहत कोष’ मा ५० लाख रुपैयाँ राखिएको छ । ‘मुख्यमन्त्री युवा उद्यमशील कार्यक्रम’ का लागि २० करोड रुपैयाँ विनियोजन गरिएको छ । ‘मुख्यमन्त्री उत्कृष्ट कृषक पुरस्कार’ का लागि १ लाखका दरले सुनसरी, इलाम, पाँचथर, धनकुटा, सोलु, ओखलढुंगा, उदयपुर, झापा र मोरङमा वितरण गर्न रकम विनियोजन गरिएको छ । प्रत्येक जिल्लामा मुख्यमन्त्री अत्यावश्यक सेवा केन्द्रको स्थापनाका निम्ति पनि रकम विनियोजन गरिएको छ ।

आर्थिक वर्ष ०७६/७७ का लागि प्रदेश सरकारले ४२ अर्ब २० करोड ४ लाख १२ हजार रुपैयाँको बजेट विनियोजन गरेको थियो । सरकारले पुँजीगततर्फ २३ अर्ब ५७ करोड ३९ लाख ३४ हजार र चालु खर्चतर्फ १८ अर्ब ५४ करोड ६४ लाख ७६ हजार रुपैयाँ छुट्याएको छ । प्रदेश सरकारले आगामी वर्षका लागि मुख्यमन्त्री तथा मन्त्रिपरिषदको कार्यालयका लागि २८ करोड ६७ लाख ३ हजार रुपैयाँ विनियोजन गरेको छ ।

यस्तै मुख्यन्त्रीका लागि सवारी साधन खरिद गर्न २ करोड ५० लाख रुपैयाँ छुट्याइएको छ । ‘प्रदेश सरकार भनेको मुख्यमन्त्री केन्द्रित नै हुने हो,’ आर्थिक मामिला तथा योजनामन्त्री इन्द्रबहादुर आङबोले भने, ‘मुख्यमन्त्री पदलाई स्थापित गर्न र संघीयतालाई बलियो बनाउनका लागि पनि केही कार्यक्रम ल्याउनु आवश्यक छ ।’

सरकारले आर्थिक मामिला तथा योजना मन्त्रालयका लागि ९१ करोड ३१ लाख ७ हजार रुपैयाँ, उद्योग, पर्यटन, वन तथा वातावरण मन्त्रालयका लागि ३ अर्ब ८३ करोड २७ लाख ३८ हजार रुपैयाँ, भूमि व्यवस्था, कृषि तथा सहकारी मन्त्रालयका लागि ४ अर्ब ४१ करोड ३२ हजार रुपैयाँ, आन्तरिक मामिला तथा कानुन मन्त्रालयमा १ अर्ब ४८ करोड २८ लाख ६८ हजार रुपैयाँ, भौतिक पूर्वाधार विकास मन्त्रालयमा १ अर्ब ९५ करोड ९९ लाख ८१ हजार रुपैयाँ र सामाजिक विकास मन्त्रालयका लागि ४ अर्ब १६ करोड ६८ लाख ७५ हजार रुपैयाँ विनियोजन गरिएको छ ।

यसैगरी प्रदेशका ५६ निर्वाचन क्षेत्रका लागि निर्वाचन क्षेत्र पूर्वाधार विकास कार्यक्रममा २ करोड ५० लाख विनियोजन गरेको छ । चालु आवमा यी कार्यक्रमका लागि २ करोडका दरले रकम दिएको थियो । तर, प्रदेशसभा बैठक सञ्चालन भएका बेला समानुपातिकतर्फका सांसदहरूले कुनै न कुनै रूपमा प्रत्यक्ष सांसदहरूलाई मात्र रकम दिएको आफूहरूलाई हेला गरेको भन्दै विरोध गर्ने गरेकाले आगामी वर्षका लागि प्रदेश ९३ जना संसादहरूलाई ‘निर्वाचन क्षेत्र विकास कार्यक्रम’ भन्दै ५० लाखका दरले रकम विनियोजन गरिएको छ । दुवै कार्यक्रमका लागि १ अर्ब ८६ करोड ५० लाख विनियोजना गरिएको छ ।

यस्तै मुख्यमन्त्री प्रदेश लिग फुटबल प्रतियोगिताका लागि १ करोड रुपैयाँ, अन्तर्राष्ट्रिय आमन्त्रण मुख्यमन्त्री फुटबल प्रतियोगिताका लागि १ करोड रुपैयाँ छुट्याइएको छ ।

प्रकाशित : असार ७, २०७६ २०:२३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT