कान्तिपुर वेबसाईट
AdvertisementAdvertisement

गुठी विधेयकबारे निर्णय लिन प्रधानमन्त्रीसहित नेकपाका नेताहरु आन्तरिक छलफलमा 

कान्तिपुर संवाददाता

काठमाडौँ — गुठी विधेयकका कारण आन्दोलन चर्किने देखेपछि नेकपा नेताहरुले फिर्ता गर्ने वा स्थगन भन्नेमा आन्तरिक छलफल तिव्र बनाएका छन् । प्रधानमन्त्री केपी ओलीले सोमबार बिहान भूमिसुधार मन्त्री पद्मा अर्यालसँग विधेयककाबारेमा सोधपुछ गरेका छन् । 

उनले अपरान्ह नेकपाकै काठमाडौंबाट प्रतिनिधित्व गर्ने जनप्रतिनिधिहरुको भेला बोलाएका छन् । प्रधानमन्त्रीका प्रेस सल्लाहकार कुन्दन अर्यालका अनुसार सबै पक्षसँगको छलफलबाट प्रधानमन्त्रीले बुझ्ने कोशिस गरिरहेका छन् ।


प्रधानमन्त्रीका सल्लाहकार विष्णु रिमालले आफ्नो ट्वीटरमा हालेको छलफलको तस्बिर ।


नेकपाकै वरिष्ठ नेता माधवकुमार नेपालले सोमबार काठमाडौंका नेताहरुसँग संसदभित्र छलफल गरेका छन् । त्यहाँ अधिकांस नेताहरुले फिर्ता लिनुपर्ने सुझाव दिएको नेकपाका केन्द्रीय सदस्य विष्णु रिजालले जनाएका छन् ।




नेकपाभित्र विधेयकको विषयमा सांसदहरुको एकमत छैन । पश्चिम क्षेत्रका सांसदहरुले विधेयक ठिक रहेको प्रतिक्रिया दिइरहेका छन् । त्यसैले विधेयकका राम्रा र नराम्रा पक्षको समिक्षापछि फिर्ता लिने कि स्थगन गर्ने भन्ने निर्णय हुनेछ ।


प्रधानमन्त्री निवासमा नेकपाका उपत्यकाका संघीय सांसद, प्रदेश सांसद, मेयर तथा स्थानीय जनप्रतिनिधिबीच छलफल भइरहेको छ । सो छलफलमा रक्षामन्त्री इश्वर पोखरेल, नेताहरु माधव नेपाल, सुवास नेम्वाङ, विष्णु पौडेल लगायतको सहभागिता रहेको छ ।


प्रकाशित : असार २, २०७६ १५:५१
प्रतिक्रिया
पठाउनुहोस्

दोस्रो गुरिल्ला अल्ट्रा दौडको उपाधि बुढालाई 

हरि गौतम

रुकुम पूर्व — गुरिल्ला अल्ट्रा दौडको उपाधि दुर्गाराज बुढाले जितेका छन् । भूमे गाउँपालिकाले आयोजना गरेको दोस्रो गुरिल्ला अल्ट्रा दौडको उपाधि रुकुम पश्चिमका बुढाले जितेका हुन् । ५२ किलोमिटर लामो दुरी उनले ६ घण्टा १५ मिनेट १५ सेकेण्डमा पार गरे । जितसँगै बुढाले ५० हजार रुपैयाँ सहित ट्रफि र मेडल पाए । 

६ घण्टा २८ मिनेट २८ सेकेण्डमा दुरी पार गरेका सोलुखुम्बुका सुमन कुलुङ दोस्रो भए । उनले ३५ हजार नगद पुरस्कार सहित मेडल हात पारे । कुलुङ भन्दा २१ मिनेटपछि परेका रुकुम पूर्वका मोहन केसी तेस्रो भए । दौडमा पुरुषतर्फ विभिन्न जिल्लाका ३४ जनाले सहभागिता जनाएका थिए ।

महिलातर्फको दौडमा प्युठानकी हुमी बुढा मगर प्रथम बनिन् । ७ घण्टा १८ मिनेट ३५ सेकेण्डमा ५२ किलोमिटर दुरी पार गरेकी उनले पनि ५० हजार नगद पुरस्कारको साथमा ट्रफि र मेडल प्राप्त गरिन् । उनलाई पछ्याएकी धादिङकी रसिला तामाङ दोस्रो बनिन् । रसिलाले ७ घण्टा २० मिनेट ३८ सेकेण्डमा उक्त दुरी पार गरेकी थिइन् । भोजपुरकी आनि राई तेस्रो भइन् ।

सशस्त्र युद्धका क्रममा तत्कालीन माओवादीका लडाकुहरु हिँडेको बाटैबाटो धावकलाई दौडाएर युद्ध पर्यटनको विकासमा टेवा पुर्‍याउने लक्ष्यका साथ प्रतियोगिताको आयोजना गरिएको गाउँपालिकाका अध्यक्ष रामसुर बुढा मगरले बताए । अघिल्लो वर्षदेखि थालिएको यो प्रतियोगिता निरन्तर चल्ने उनको भनाई छ ।

भूमे गाउँपालिका–६ को महतबाट सुरु भएको दौड रोल्पाको थवाङबाट जलजला पुगेर पुनः थवाङबाट रुकुम पूर्व भूमेको मारिङ लेक, लकुम, काँक्री हुँदै खाबाङ बगरस्थित भूमे गाउँपालिकामा आएर समापन भएको थियो ।

नेपाल ट्रेल सिरिज अन्तर्गत दोस्रो गुरिल्ला ट्रेल दौड आयोजना गरिएको प्रतियोगिताका संयोजक सुनिल रोका मगरले बताए । स्थानीय स्तरमा धावक उत्पादन गर्ने र जिल्ला बाहिरको साथै विदेशबाट समेत धावक ल्याएर पर्यटन प्रवर्द्धनमा टेवा पुर्‍याउने लक्ष्यका साथ प्रतियोगिताको आयोजना गरिएको रोकाले बताए ।

प्रकाशित : असार २, २०७६ १५:४३
पूरा पढ्नुहोस्
प्रतिक्रिया
पठाउनुहोस्
×