छोरी बलात्कार गर्नेलाई जन्मकैद

कान्तिपुर संवाददाता

स्याङ्जा — छोरीलाई बलात्कार गरेको अभियोगमा पुतलीबजार नगरपालिका–३ का एक व्यक्तिलाई जिल्ला अदालतले जन्मकैदको फैसला सुनाएको छ । उनीमाथि हाड–नाता करणीसहित ज्यान मार्ने उद्योगको मुद्दा थियो । ज्यान मार्ने उद्योगमा भने सफाइ पाएका छन् । पीडितले ०७५ माघ १५ गते मुद्दा दर्ता गराएकी थिइन् ।

प्रतिकात्मक तस्बिर ।

जिल्ला न्यायाधीश रमानाथ पौडेलको इजलासले मुलुकी अपराध संहिताअनुसार हाडनातामा मात्रै १० वर्ष र थप जन्मकैद हुने गरी फैसला गरेको स्रेस्तेदार नन्दप्रसाद आचार्यले जनाए ।


जिल्ला अदालतले जबरजस्ती करणीका अरु तीन अभियुक्तलाई पनि सजाय तोकेको छ । पुतलीबजार नगरपालिका–१ हुलाक रोडस्थित रेमन्ड टेलर्सका नैयर अहमदलाई ८ वर्ष कैद र १ लाख रुपैयाँ क्षतिपूर्ति, स्थानीय तरकारी व्यापारी एवं ट्याक्सी चालक दीपक नेपाली र खुमादेवी मानन्धरलाई ४/४ वर्ष कैद सजाय तोकिएको हो । उनीहरू २ वर्षअघि १४ वर्षीया किशोरीमाथिको करणी मुद्दामा संलग्न थिए ।


यसैगरी अर्की १४ वर्षीयालाई बलात्कार गरेको आरोपमा पुर्पक्षमा रहेका १९ वर्षीय प्रकाश नेपालीलाई पनि जिल्ला अदालतले सोमबार ७ वर्ष कैद तोकेको छ । पर्वतको कुस्मा–१४ घर भई हाल पुतलीबजार–१ गौरीबजार बस्दै आएका प्रकाशविरुद्ध पीडितले ०७५ वैशाख ३० गते जिल्ला प्रहरीमा जाहेरी गरेकी थिइन् ।

प्रकाशित : जेष्ठ २९, २०७६ १७:४१
प्रतिक्रिया
पठाउनुहोस्

मिर्गौला प्रत्यारोपणका लागि २ लाख सहयोग

कान्तिपुर संवाददाता

सुनसरी — मोरङको बेलबारी बस्ने ४४ वर्षीय सोमबहादुर श्रेष्ठलाई धरानका संस्थागत विद्यालयहरुले बुधबार २ लाख ३ हजार ९ सय रुपैयाँ आर्थिक सहयोग गरेका छन् । चार वर्षदेखि दुवै मिर्गौला खराब भएर उपचार (डाइलाइसिस) गरिरहेका श्रेष्ठलाई बचाउन संस्थागत विद्यालयहरुले आर्थिक सहयोग गरेका हुन् ।


धरानस्थित ज्ञानोदय सेकेण्डरीका भाइस प्रिन्सिपलसमेत रहेका उनका दाजु खेमराज श्रेष्ठले स्वदेश र विदेश बस्ने मनकारी नेपाली समुदायबाट उपचारका लागि सहयोग जुटिरहेको बताए । चिकित्सकले मिर्गौला प्रत्यारोपणको व्यवस्था नभएसम्म डाइलाइसिस गर्नु पर्ने सुझाव दिएको श्रेष्ठले बताए ।
उनले एउटा मिर्गौला प्रत्यारोपण गर्न कम्तीमा ४० लाख रुपैयाँ आवश्यक पर्ने भएकाले रकम जुटाउने अभियानमा लागेको श्रेष्ठले बताए । भाइ बचाउन आर्थिक संकलनमा जुटेका खेमराजले भने, ‘मिर्गौला प्रत्यारोपण गर्न खर्चिलो छ । चार वर्षको अवधिमा १२ मिर्गौला डाइलाइसीस र अन्य उपचारमा धेरै खर्च भएको छ । जति सक्दो चाँडो आर्थिक संकलनमा जुटेका छौं । सोही संकलित रकमले सोमबहादुरको मिर्गौला प्रत्यारोपण गर्ने सोच बनाएका छौं । आफ्नो गच्छेअनुसार आर्थिक सहयोग भएमा सोमबहादुरलाई बचाउन सकिन्छ भन्ने आशा पलाएको छ ।’

प्रकाशित : जेष्ठ २९, २०७६ १६:५०
पूरा पढ्नुहोस्
प्रतिक्रिया
पठाउनुहोस्
×