प्रश्नपत्र चुहावटमा १२ जनाविरुद्ध मुद्दा

कान्तिपुर संवाददाता

काठमाडौँ — अख्तियार दुरुपयोग अनुसन्धान आयोगले प्रश्नपत्र चुहावटमा संलग्न भएको आरोपमा सिरहाका प्रहरी जवान दीपेन्द्रकुमार मण्डलसहित १२ जनाविरुद्ध विशेष अदालतमा भ्रष्टाचार मुद्दा चलाएको छ ।

एसईईको प्रश्नपत्र चोरीको आरोपमा पक्राउ परेका दुई प्रहरीसहित ६ जनालाई बिहीबार जिल्ला प्रहरी कार्यालय सप्तरीमा सार्वजनिक गरिँदै । तस्बिर : अवधेशकुमार झा/कान्तिपुर

२०७५ चैत १० देखि सुरु भएको एसईईमा अनिवार्य विज्ञान, सामाजिक अध्ययनलगायत विषयका प्रश्नपत्र परीक्षाअघि नै बाहिरिएका थिए ।

अख्तियारले सिरहाका प्रहरी जवान दीपेन्द्रकुमार मण्डल, ब्रह्मदेव सुनरैत र शिक्षक मनोजकुमार यादव, अरोध यादव, विष्णुदेव यादव, राजेशकुमार यादव, श्रवण यादव र इन्दल यादवविरुद्ध मुद्दा चलाएको छ । उक्त प्रकरणमा जोडिएका १६ वर्षमुनिका चार विद्यार्थीलाई पनि अख्तियारले मुद्दा चलाएको छ । प्रश्नपत्र बाहिरिएलगत्तै राष्ट्रिय परीक्षा बोर्डको छानबिन समिति र प्रदेश २ सरकारले गठन गरेको छानबिन समितिले छुट्टाछुट्टै छानबिन थालेका थिए ।

केन्द्रीय अनुसन्धान ब्युरो (सीआईबी) ले पनि दुई प्रहरी नियन्त्रणमा लिएको थियो । उनीहरू अन्य धेरै परीक्षार्थीबीच प्रश्नपत्र पुर्‍याउने काममा खटिएको अख्तियार स्रोतको भनाइ छ । उनीहरू कार्यरत इलाका प्रहरी कार्यालय कल्याणपुरमा जनता मण्डल मावि र रादु माविका प्रश्नपत्र राखिएको थियो । जनतामा २ सय ४१ र रादुमा २ सय ५० परीक्षार्थी थिए । प्रश्नपत्रको सजिलै पहुँचमा रहेका उनीहरूमध्ये एकले सिल खोलेर प्रश्नपत्रको फोटो खिचेको स्रोतको दाबी छ ।

परीक्षार्थी प्रहरीका लागि ड्युटीमा रहेका अर्का प्रहरीले कार्यालयबाटै सिलबन्दी तोडेर प्रश्नपत्रको फोटो खिचेका थिए । उनले परीक्षार्थी रहेका प्रहरी साथीलाई फेसबुक म्यासेन्जरबाटफोटो पठाएका थिए ।

बाहिरिएको प्रश्नपत्रको तस्बिर नजिकै ब्लेडसमेत भेटिएको थियो । अनुसन्धान अधिकारीहरूले तस्बिरका आधारमा ब्लेडले सिलबन्दी काटेर प्रश्नपत्र निकालिएको निष्कर्ष निकालेका छन् । यसरी बाहिरिएको प्रश्नपत्रको फोटो सामाजिक सञ्जाल फेसबुक, भाइबर र ह्वाट्स एपमार्फत मोबाइलमा छ्यापछ्याप्ती भएको थियो ।

प्रकाशित : जेष्ठ २९, २०७६ ०८:०२
प्रतिक्रिया
पठाउनुहोस्

सगरमाथा नचढी चढेको दाबी

सुरज कुँवर

काठमाडौँ — पाँच नेपाली र चार विदेशी नागरिकले यो सिजनमा सगरमाथा आरोहण नै नगरी झूटो विवरण पेस गरेको फेला परेको छ । 


पर्यटन विभागकी निर्देशक मीरा आचार्यका अनुसार काठमाडौंमा रहेको प्रेस्टिज एड्भेन्चर प्राइभेट लिमिटेडबाट गएकामध्ये ९ जनाले जेठ १२ गते सगरमाथा आरोहण गरेको दाबी गर्दै प्रतिवेदन बुझाएका थिए । विभागमा उजुरी परेपछि उनीहरूमाथि छानबिन गर्दा सगरमाथा आरोहण नगरेको प्रमाण भेटिएको उनले बताइन् । ‘आरोहणको प्रमाणपत्र माग गर्दै आएको प्रतिवेदनमा उनीहरूले सगरमाथा आरोहण गरेको दाबी गरे पनि प्रमाण जुटाउन सकेनन्,’ आचार्यले कान्तिपुरसँग भनिन् ।

झूटो विवरण पेस गर्ने विदेशी आरोहीमा यूएईकी खादिजा मोहम्मद अली, भारतका शोभा बनवाला, विकास राना र अंकुश छन् । पर्यटन विभागले हरेक आरोहण दलसँग सम्पर्क अधिकृत पनि खटाउने गरेको छ । यी आरोहीका लागि विश्वबन्धु रेग्मीलाई सम्पर्क अधिकृत खटाइएको थियो । तर, रेग्मी आधार शिविरमा एक दिनमात्रै बसेर काठमाडौं फर्किएका थिए । उनले स्वास्थ्यमा समस्या आइपरेकाले आधार शिविरमा बस्न नसकेको बताए । चार विदेशी र ५ नेपाली शेर्पाले सगरमाथा आरोहण गरेको प्रतिवेदन रेग्मीले भृकुटीमण्डपस्थित विभागमा बुझाएका थिए ।

‘मलाई फोनबाट सगरमाथा आरोहण गरेर फर्कियौं भनी टिपाए,’ उनले कान्तिपुरसँग भने, ‘मलाई जे भनियो, त्यही प्रतिवेदनमा लेखेको हुँ ।’ रेग्मीको जिम्मामा १० जना सदस्य थिए । तीमध्ये २ जना गएनन्, ८ जना मात्रै सगरमाथातर्फ लागेका थिए । ‘एक जनाले मात्रै चढेको रहेछ, बाँकीले चढ्दै चढेका रहेनछन्,’ उनले भने ।

यसै विषयमा विभागले आरोहण जिम्मा लिएको कम्पनीलाई पनि सोधपुछ गरेको थियो । उक्त कम्पनीले मंगलबार चार विदेशी र ५ शेर्पाले सगरमाथा आरोहण नगरेको प्रतिवेदन बुझाएको छ । प्रेस्टिज एड्भेन्चरका लेखा अधिकृत यज्ञराज उप्रेतीले सम्पर्क अधिकृत र
आफ्नो कम्पनीलाई विदेशी आरोहीले झुक्याएको बताए । ‘सगरमाथा चढ्यौं भने, हामीले उनीहरूको कुरा सुनेर विभागमा प्रतिवेदन बुझायौं तर प्रमाण दिन सकेनन्,’ उनले भने ।

ती विदेशीले चुचुरोमा पुगेको तस्बिरलगायत प्रमाण पेस गर्न नसकेकाले विभागले उनीहरूको प्रतिवेदनलाई झूटो मान्दै कारबाही गर्ने भएको छ । विभागको कानुनअनुसार यसरी फर्जी प्रमाण पेस गर्नेलाई नेपालका हिमाल आरोहणमा रोक लगाइन्छ ।

यसैबीच शेर्पाहरूले आफूहरूलाई नसोधी आरोहण गरेको भनी नाम टिपाइदिएको विभागलाई बयान दिएका छन् । यसपटकको सिजनमा ३ सय ८१ जनाले सलामी दस्तुर तिरेर सगरमाथा आरोहणको अनुमति लिएका थिए । यीमध्ये २ सय ८१ ले मात्रै आरोहण गरेका छन् । सलामी दस्तुर नतिरेर आरोहणमा जाने ३ सय ७८ सहयोगी शेर्पाहरूले पनि सगरमाथा आरोहण गरेका छन् ।

दस्तुर तिरेर जाने स्वदेशी/विदेशी तथा शेर्पासहित यसपटकको वसन्तकालीन सिजनमा ६ सय ५९ ले सगरमाथा आरोहण गरे । यिनमा ५ सय ९४ पुरुष र ६५ महिला छन् ।

प्रकाशित : जेष्ठ २९, २०७६ ०७:५९
पूरा पढ्नुहोस्
प्रतिक्रिया
पठाउनुहोस्