कान्तिपुर वेबसाईट
AdvertisementAdvertisement

प्रधानमन्त्री कार्यालयले रोक्यो चार्जिङ स्टेसन

विद्युतीय सवारीसाधन चार्जिङ स्टेसन निर्माण हुने भएपछि उत्साहित लुम्बिनीवासीको आशा प्रधानमन्त्री तथा मन्त्रिपरिषद् कार्यालयले काम रोक्न निर्देशन दिएपछि निराशामा परिणत भएको छ । 
दीपेन्द्र बडुवाल, मनोज पौडेल

लुम्बिनी — बिजुलीबाट सञ्चालन हुने सवारीसाधन (बस) का लागि चाहिने चार्जिङ स्टेसनको काम रोकिएको छ । लुम्बिनी परिसरमा स्टेसन निर्माण गरेको भन्दै प्रधानमन्त्री र मन्त्रिपरिषद्को कार्यालयले काम रोक्न निर्देशन दिएको हो । 

लुम्बिनीमा निर्माणाधीन सोलार पावरहाउस चार्जर स्टेसनस्थल । प्रधानमन्त्री कार्यालयले राष्ट्रिय गौरवको आयोजना क्षेत्र लुम्बिनीमा यसको काम अघि नबढाउन निर्देशन दिएको छ । तस्बिर : मनोज/कान्तिपुर

लुम्बिनी क्लिन ट्रान्सपोर्ट परियोजनाअन्तर्गत निमार्णाधीन चार्जिङ स्टेसनको काम अहिले ठप्प छ । एसियाली विकास बैंक (एडीबी) को १३ करोड रुपैयाँको सहयोगमा स्टेसन निर्माणको काम अन्तिम चरणमा पुगेको थियो । लुम्बिनी परिसरमा स्टेसन निर्माण गरेको भन्दै प्रधानमन्त्री केपी शर्मा ओलीले आलोचना गरेका थिए । लुम्बिनी र बुटवलमा केही महिनाअघि आयोजित सार्वजनिक कार्यक्रममा उनले स्टेसन निर्माण रोक्नुपर्ने बताएका हुन् ।


चैत अन्त्यमा प्रधानमन्त्री तथा मन्त्रिपरिषद् कार्यालयले काम रोक्न पत्राचार गरेको हो । प्रधानमन्त्रीको कार्यालयले लुम्बिनी विकास कोषलाई काम रोक्न पत्राचार गरेको स्रोतले जनायो । स्टेसन निर्माणको स्थानीयस्तरमा अनुगमन र निरीक्षण कोषले गर्दै आएको थियो । करिब दुई महिनादेखि काम रोकिएपछि सोलार पावर हाउस चार्जर स्टेसन स्थल खण्डहर बनेको छ । चारैतिर घाँसपात उम्रिएका छन् । कामदार छैनन् । बिहीबार निर्माणस्थलमा कोही थिएनन् ।


जापानको इसाका इलेक्ट्रिक कम्पनीले पावर हाउस निर्माणको काम गरिरहेको हो । डिसेम्बरमा सुरु निर्माण अप्रिल तेस्रो साताभित्र पूरा गर्ने लक्ष्य थियो । ‘काम तीव्र गतिमा भइरहेको थियो,’ स्टेसनका साइट इलेक्ट्रिक इन्जिनियर जीवन खनालले भने, ‘एक्कासि काम रोकियो । नत्र, अहिलेसम्म सञ्चालनमा आइसक्थ्यो । अब काम हुन्छ/हुन्न अन्योल छ ।’


स्टेसनको ‘रि–डिजाइन’ गर्न काम रोकिएको कोषका उपाध्यक्ष अवधेशकुमार त्रिपाठी (भिक्षु मैत्तेय) ले बताए । ‘निर्माण भइरहेको ठाउँ उपयुक्त भएन,’ उनले भने, ‘त्यहाँ गाडी चार्ज गर्दा कोलाहल र भीडभाड हुने देखियो ।’ शान्ति खोज्दै ध्यान गर्न आउने स्थानमा गाडीको भीडभाड उपयुक्त नहुने उनले बताए । ‘पहिले नै सोचेको भए राम्रो हुन्थ्यो,’ उनले भने, ‘महत्त्वपूर्ण स्थानमा स्टेसन बनाउन उपयुक्त थिएन ।’ त्यही भएर अर्को ठाउँमा सार्नका लागि काम रोक्नुपर्ने बाध्यता आएको उनले बताए ।


आगामी तीन वर्षभित्र लुम्बिनीमा पेट्रोलियम पदार्थले चल्ने गाडी विस्थापित गर्ने योजनाअनुसार काम थालिएको उनले सुनाए । अहिले अन्तर्राष्ट्रिय सभाहल तथा ध्यान केन्द्र नजिकै स्टेसन निर्माण भइरहेको छ । प्रधानमन्त्री कार्यालयका प्रवक्ता विनोदबहादुर कुँवरले निर्माण रोकिएका बारेमा आफूलाई जानकारी नभएको बताए । उनले पर्यटन वा ऊर्जा मन्त्रालयमा जानकारी लिँदा राम्रो हुने सुझाव दिए ।


'काम रोकिनु दुःखद’

यहाँबाट प्रतिनिधित्व गर्ने जनप्रतिनिधिले विद्युतीय गाडी सञ्चालन गर्ने कुरा सुखद भएको बताउँदै पूर्वाधार निर्माण रोकिनु दुःखद भएको प्रतिक्रिया दिएका छन् । ‘लुम्बिनी विकासका काममा भर्खरै वामे सर्दै थियो, यस्तो निर्णयले ठेस लाग्यो,’ प्रदेश सांसद फखरुद्दिन खाँले भने, ‘यस्तो हुनु दुःखद हो ।’


निर्माण रोकिनुको कारण स्थानीयले थाहा पाउनुपर्ने उनले बताए । ‘के कारणले रोकियो, जनताले थाहा पाउनुपर्छ,’ उनले भने, ‘कसैको स्वार्थमा रोक्नुहुन्न । तत्काल काम सुरु गर्नुपर्छ ।’ लुम्बिनी विकास कोषले यसको काम रोकिएको विषय गुपचुप राखेको छ ।


‘यही महिनाबाट विद्युतीय जिप चढ्ने सपना थियो,’ लुम्बिनी सांस्कृतिक नगरपालिकाका प्रमुख मनमोहन चौधरीले भने, ‘सपना सबै हावाले उडायो ।’ निर्माणको अन्तिम चरणमा पुगेको पूर्वाधार रोकिनु दुःखद भएको र यसले स्थानीयको भावनामा ठेस पुर्‍याएको उनले बताए । ‘पहिल्यै उपयुक्त ठाउँ खोज्नुपर्थ्यो,’ भिक्षु महासंघका अध्यक्ष मैत्री महाअस्थवीरले भने, ‘निर्माण पूरा भएपछि यस्तो गर्नु हुँदैन ।’ यसले लुम्बिनीबारे राम्रो सन्देश नजाने बताए ।


८० प्रतिशत काम

स्टेसनको निर्माण ८० प्रतिशत र सोलार प्यानल जडान गर्ने काम सम्पन्न भएको छ । इक्विपमेन्ट कन्ट्रोल कोठाबाट प्यानलसम्म तार जोडिसकिएको छ । घामबाट सोलार प्यानल चार्ज भएपछि विद्युत् उत्पादन हुन्छ । ५ सय ९४ सोलार प्यानल जडान गरिएको छ । यसबाट १५४ किलोवाट विद्युत् उत्पादन हुन्छ । यो मुलुककै ठूलो सोलार चार्जर स्टेसन हो । पावर हाउसका लागि आवश्यक सामग्री विदेशबाट ल्याइएका छन् ।


सोलार प्यानल जापानबाट, पूर्वाधारका सामान चीन र जंसन बक्स (पावर कन्ट्रोल र सप्लाई गर्ने उपकरण) इटालीबाट आयात गरिएको हो । लिथेमाइन ब्याट्री मात्र आउन बाँकी छ । कोरियाबाट ल्याइएको ब्याट्री कोलकाता बन्दरगाहसम्म आइपुगेको छ । ब्याट्री आउनासाथ जडान गरेर स्टेसन सञ्चालन हुन्थ्यो । सोलारले ब्याट्री चार्ज गरेर इन्भर्टरबाट ऊर्जा सप्लाइ गर्छ । ब्याट्रीको क्षमता ९ सय किलोवाटको छ ।


पावर हाउसमा २३ वटा गाडी चार्जर स्ट्यान्ड राख्न मात्र बाँकी छ । यिनमा तीनवटा क्विक चार्जर हुन्छन् । ८० किलोवाट क्षमताको ब्याट्री हुने एउटा बस र ४० किलोवाट क्षमताका २ वटा जिप, कार एकैपटक क्विक चार्ज गर्न सकिन्छ । क्विक चार्जबाट फुल चार्ज हुन आधा घण्टा लाग्छ । बाँकी २० वटा सामान्य चार्जर हुन्छन् । यसबाट एक घण्टामा फुल चार्ज हुन्छ । पावर हाउसबाट एकैपटकमा १३ वटा सवारीसाधनले चार्ज गर्न सक्नेछन् ।


योजनाअन्तर्गतका २५ चार्जरमध्ये तीनवटा पावर हाउस स्टेसनबहिर जडान गरिनेछ । एउटा लुम्बिनी विकास कोष परिसर र दुईवटा भैरहवास्थित गौतम बुद्ध विमानस्थलमा राखिनेछ । प्रकाशित : जेष्ठ २४, २०७६ ०८:३०

प्रतिक्रिया
पठाउनुहोस्

विश्वकप क्रिकेटमा सलबलाउँदै सट्टेबाज

जनकराज सापकोटा

काठमाडौँ — क्रिकेट विश्वकप चलिरहँदा सट्टेबाजहरू सलबलाउन थालेका छन् । नेपाल प्रहरीको महानगरीय प्रहरी अपराध महाशाखाले गैरकानुनी सट्टेबाजी खेलाएको आरोपमा तीन जनालाई पक्राउ गरेको छ ।

महाशाखाले इन्डियन प्रिमियर लिग क्रिकेट (आईपीएल), विश्वकप क्रिकेट र च्याम्पियनसिप फुटबलमा सट्टेबाजी गराएको आरोपमा न्युरोडबाट वज्रप्रकाश लामा, विद्युतप्रकाश लामा र उमेश कार्कीलाई समातेको हो ।

उनीहरूबाट प्रहरीले एक लाख रुपैयाँ बरामद गरेको छ । पक्राउ परेकाहरूबाट बरामद डायरीमा उनीहरूले दैनिक अनुमानित ७०/८० लाखसम्म सट्टेबाजीको कारोबार गरेको देखिन्छ । अन्तर्राष्ट्रिय फुटबल र क्रिकेट प्रतियोगिता हुनुअघि नै सट्टेबाजी खेलाउनेहरूले अनलाइनमार्फत अनुमान गर्न र खातामा रकम हाल्न लगाउने गरेको देखिन्छ ।

प्रहरी निगरानी हुँदाहुँदै पनि काठमाडौं र देशका मुख्य सहरमा अवैध सट्टेबाजी भइरहेको देखिन्छ । ०७५ जेठ १७ मा पनि प्रहरीले आईपीएल तथा अन्य खेलमा सट्टेबाजी खेलाएको आरोपमा प्रहरी परिसर काठमाडौंले पूर्वराष्ट्रिय खेलाडी अञ्जन केसी, गौरव तिवारी, भूपेन्द्र कुँवर, दिनेश बोगटी, विजय श्रेष्ठ र नरेन्द्र सुवाललाई पक्रेको थियो । यो समूहले आईपीएलका खेलमा २५ हजारदेखि १५ लाख रुपैयाँसम्मका बाजी खेलाएको प्रहरी अनुसन्धानबाट खुलेको थियो ।

तत्कालीन एसएसपी विश्वराज पोखरेल परिसर प्रमुख रहेकै बेला ०७५ असार १० मा सट्टेबाजीका मुख्य नाइके मानिएका नागराज भनिने अमिल अग्रवाल पक्राउ परेका थिए । अग्रवालले आईपीएल खेलमा बाजीस्वरूप रकम राखेर भनेकै टिमले जिते दोब्बर पैसा दिने भन्दै करोडौं रुपैयाँ उठाएको प्रहरीको दाबी थियो । नेपालमा संगठित रूपमै भारतीय समूहसँग मिलेर अन्तर्राष्ट्रिय फुटबल र क्रिकेट खेलमा सट्टेबाजी खेलाउने समूह सक्रिय छन् । अन्तर्राष्ट्रिय खेल प्रतियोगिताको पूर्वसन्ध्यामा सट्टेबाज पक्राउ परेका घटनाले यही देखाउँछ ।

प्रहरीका अनुसार काठमाडौं उपत्यकाका अतिरिक्त विराटनगर, वीरगन्ज, चितवन, बुटवल, भैरहवा र नेपालगन्जमा सट्टेबाजीका साना तथा ठूला समूह सक्रिय देखिन्छन् । अन्तर्राष्ट्रिय खेलअगावै सट्टेबाट अन्तर्राष्ट्रिय रूपमा सलबलाउने गरेको प्रहरी प्रवक्ता डीआईजी विश्वराज पोखरेल बताउँछन् । नेपालमा स्थानीय एवं अन्तर्राष्ट्रिय दुवै खालका सट्टेबाजका एजेन्ट रहेको उनको भनाइ छ । भारतका विभिन्न सहर र बैंककमा बसेर सट्टेबाज खेलाउनेसँग पनि नेपाली सट्टेबाजको सम्पर्क देखिन्छ ।

थोरै रकमको सट्टेबाजी नेपाली समूहले नै खेलाउने र ५० लाख रुपैयाँभन्दा बढी भएपछि अन्तर्राष्ट्रिय सट्टेबाजी समूह सक्रिय हुने गरेको उनले बताए । यसअघि प्रहरीले सट्टेबाजमा सक्रियलाई पक्राउ गरेको थियो । उनीहरूलाई पनि जुवा ऐन, २०२० अन्तर्गत कारबाही गरिँदै आएको छ । यसअन्तर्गत पहिलो पटक जुवा खेल्नेलाई २ सय, दोस्रो पटक खेल्नेलाई तीन महिनासम्म कैद र तेस्रो पटक खेलेमा एक वर्षसम्म कैदको व्यवस्था थियो ।

त्यसैले सट्टेबाजमा पक्राउ परेका अधिंकाश आरोपित थोरै सजायमा मुक्त हुन्थे । फौजदारी अपराध संहिताले भने सट्टेबाजीलाई कारबाही गर्न सकिने विशेष व्यवस्था गरेको छ । संहिताको दफा १ सय २५ मा सट्टेबाजमा संलग्नलाई बिगो जफत गर्ने र १ वर्ष कैद र १० हजार जरिवाना गर्ने व्यवस्था छ । सट्टेबाज पटके भए सजायमा तीन महिना थप्न सकिने व्यवस्था छ ।

विगतका दिनमा कमजोर कानुनका कारण धेरैले फाइदा उठाएपछि अब त्यस्तो नहुने प्रवक्ता डीआईजी पोखरेलले बताए । सट्टेबाजका अनेक स–साना समूह देखा पर्न थालेको र यो प्रहरीका लागि नै नयाँ अपराध चुनौती बन्दै जान थालेको उनको भनाइ छ ।

प्रकाशित : जेष्ठ २४, २०७६ ०८:२७
पूरा पढ्नुहोस्
प्रतिक्रिया
पठाउनुहोस्
×