अदालतमै कुटिए वकिल

नारायण शर्मा

नवलपरासी — पूर्वी नवलपरासीको जिल्ला अदालत परिसरभित्रै अधिवक्ता चेतनाथ डुम्रे कुटिएका छन् । सोमबार दिउँसो अदालतमा बहसका लागि जाँदै गरेको अधिवक्ता डुम्रेलाई गैडाकोट–८ का ५८ वर्षीय दुर्गा ढुंगानाले कुटपिट गरेको अधिवक्ता गणेश अधिकारीले जानकारी दिए । 

ZenTravel

डुम्रे बार एसोसिएसन नवलपरासीका पूर्व अध्यक्ष हुन् । जिल्ला बार एसोसिएसनका उपाध्यक्ष गणेश अधिकारीले एक विज्ञप्ति निकालेर अधिवक्ता डुम्रेमाथि हातपात गरेर दुर्व्यवहार गर्नेलाई कडा कारबाहीको माग गरेका छन् । हातपात गर्ने ढुंगाना नेकपाका स्थानीय नेता समेत हुन् । गाडी दुर्घटना सम्बन्धी मुद्दाको साक्षी बस्ने काममा ढुंगाना अदालत आएका थिए ।

Meroghar


बार एसोसिएसनले अदालतको काम प्रभावित गर्न खोजेको र अभद्र व्यवहार गरेको आरोपमा ढुंगानाविरुद्ध मुद्दा दायर गर्ने भएको छ । जिल्ला अदालतमै वकिल कुटिएको यो पहिलो घटना हो ।

प्रकाशित : जेष्ठ १३, २०७६ १७:२८
ADVERTISEMENT
प्रतिक्रिया
पठाउनुहोस्
ADVERTISEMENT

पत्रकारिताबाट राष्ट्रिय एकता र स्वाधीनतालाई सुदृढ गर्नुपर्छ : दाहाल

रासस

काठमाडौँ — नेपाल कम्युनिष्ट पार्टी (नेकपा)का अध्यक्ष पुष्पकमल दाहालले प्रेस स्वतन्त्रताकै पक्षमा संविधान बनेकाले यसको भावनाविपरीत कुनै पनि ऐनकानून नबनाइने स्पष्ट पारेका छन् । पत्रकार तथा साहित्यकार शहीद कृष्ण सेन इच्छुकको १७औँ स्मृति दिवसका अवसरमा सोमबार प्रेस संगठन नेपालले आयोजना गरेको कार्यक्रममा उनले पत्रकारिता र साहित्यले राष्ट्रलाई अझ सुदृढ ढंगले अघि बढाउनुपर्नेमा जोड दिए ।   

'राष्ट्रिय एकता र स्वाधीनतालाई सुदृढ गराउने संकल्पमा कुनै विचार र मान्यताले कमजोर पार्नु हुँदैन,' पूर्वप्रधानमन्त्री दाहालले भने, 'हाम्रो पत्रकारिताले राष्ट्रिय एकता र राष्ट्रिय स्वाधीनतालाई सुदृढ गर्नुपर्छ।' उनले पत्रपत्रिकामा राष्ट्रिय एकतालाई कमजोर पार्ने लेखरचना छ भने त्यहाँ केही गल्ती छ भन्ने थाहा हुनेछ भन्दै त्यसको समर्थन गर्न नसकिने बताए। अध्यक्ष दाहालले इच्छुकमा राजनीतिक, वैचारिक र सैद्धान्तिक निष्ठा भएको स्पष्ट गर्दै उनले नेपाली साहित्य, संस्कृति र पत्रकारितामा खेलेको भूमिका अतुलनीय भएको बताए।

'इच्छुक बहुआयामिक व्यक्तिका रुपमा चिनिनुहुन्छ। उहाँ पत्रकार र राजनीतिक योद्धा हुनाका साथै असाध्यै सरल, इमान्दार र मिलनसार व्यक्तित्व हुनुहुन्थ्यो। यति धेरै आयाम एउटै व्यक्तिमा विरलै पाइन्छ,' अध्यक्ष दाहालले भने, 'समारोह गर्ने फूल चढाउने मात्र गर्नाले उहाँप्रति श्रद्धाञ्जलि हुँदैन। म पत्रकारका रुपमा उनले निर्भीकता र निष्ठाका साथ वर्गीय पक्षधरप्रति खरो उत्रिएर जनमत निर्माणमा निर्वाह गरेको भूमिका स्मरण गर्न चाहन्छु।'

राजनीतिक विचारको धार निर्माणमा उनको कलम तीखो रुपमा चल्ने गरेको बताउँदै नेता दाहालले पार्टीभित्रको वैचारिक संघर्षमा जहिले पनि क्रान्तिकारी कित्ता पकड्ने उहाँ सधैं श्रमजीवी वर्ग र एकताका पक्षमा उभिनुहुन्थो ' उनले भने।

साथीलाई व्यवस्थापन गर्न गाह्रो
अध्यक्ष दाहालले पार्टी एकतापछि आकांक्षी धेरै रहेकाले व्यवस्थापन गर्न गाह्रो रहेको बताए। उनले विसं २००७ र विसं २०४६ को क्रान्तिभन्दा फरक मान्यताका आधारमा अहिले संघीय लोकतान्त्रिक गणतन्त्रलाई संस्थागत गर्ने प्रक्रिया रहेको जानकारी गराए।

सामाजिक न्याय र आर्थिक विकासका पक्षमा राष्ट्रिय पूँजीको विकास गरेर समाजवादका निम्ति तयारी गरिरहेको बताउँदै अध्यक्ष दाहालले भने, 'विचारलाई नयाँ ढंगले संलेषण गर्नुपर्नेछ। राजनीतिक रणनीति र नारालाई अझै विकसित र परिमार्जन गर्नुपर्नेछ।'

अहिले संसद्मा दर्ता भएका विधेयक छलफल भइरहेकाले नागरिक समाजमा चलेको बहसअनुसार ती विधेयकमा केही परिमार्जन गर्नुपर्ने भए प्रक्रियाअनुसार नै परिमार्जन गरी पारित हुने उनले बताए।
कतिपय मानिसलाई पार्टी एकता गरेर विचार छाड्छौं कि भनेजस्तो लागेको भए पनि त्यसो नहुने बताउँदै भने, 'विनाविचार पार्टी एकता गरिएको छैन। प्रष्ट वैचारिक मान्यता, सैद्धान्तिक निष्ठा र राजनीतिक कार्यदिशाको ‘ओरियन्टेशन’ सहित पार्टी एकता भएको हो।'

सोही कार्यक्रममा सञ्चार तथा सूचना प्रविधिमन्त्री गोकुलप्रसाद बाँस्कोटाले नेपाली प्रेसलाई कसरी बढी समृद्ध बनाउन सकिन्छ भनेर छलफलमा लागेको बताउँदै सरकार कुनै पनि हिसाबले प्रेसलाई नियन्त्रण गर्ने पक्षमा नभई नियमन गर्ने पक्षमा रहेको जानकारी दिए।

मन्त्री बाँस्कोटाले प्रेस स्वतन्त्रता खतरामा परेको नभई झनै समृद्ध हुँदै गएको बताउँदै भने, 'समृद्ध बनाउनका निम्ति हामीले समानुपातिक विज्ञापन प्रणाली ल्यायौँ। यो नेपाली प्रेसको समृद्धिको विम्ब हो। विज्ञापनरहितको कुरा पनि लिएर आएका छौं। त्यसले पनि नेपालको राष्ट्रिय अर्थतन्त्र र अर्थतन्त्रभित्रको पत्रकारिताको विकासलाई सुनिश्चित गर्छ।'

आजको पत्रकारिता नागरिकका लागि सही सूचनाको स्रोतका रुपमा हुनुपर्नेमा जोड दिँदै मन्त्री बाँस्कोटाले पत्रकारिता क्षेत्र आर्थिक हिसाबले पनि समृद्ध हुने बताए। उनले मिडिया उद्योग आलु, प्याज उद्योगजस्तो नभई राष्ट्र निर्माण र राष्ट्रिय एकता सुदृढ गर्ने एउटा महत्वपूर्ण माध्यम पनि रहेको बताए। संविधानले दिएको मान्यता र मूलभूत कुरा तथा अन्तर्राष्ट्रिय प्रचलनभन्दा बाहिर रहेर कुनै पनि कुरा नगरिर्न उल्लेख गर्दै उनले तर मिडिया विधेयकबारे प्रेस स्वतन्त्रता खतरामा पर्‍यो भनेर हल्ला मच्चाइएको बताए।

'विधेयकको गुदीमा नगएर स्वरुपमा मात्र जाने, अन्तरवस्तुमा नभएर बाह्य प्रचारमा जाने, एकोहोरो कोलाहल मच्चाउने र सरकारको आलोचना गर्ने कुराले समस्याको निकास दिँदैन,' उनले भने।

उनले पत्रकारिताको मर्यादा र विश्वास दिलाउनका लागि स्वनियमको कुरा पनि अगाडि बढिरहेको बेला पत्रकारितालाई नियन्त्रण गर्न खोजियो भन्ने आरोप लगाइएको बताए। मिडियामा देखापर्ने पूर्वाग्रह र आग्रह तथा वस्तुपरकताभन्दा बाहिरको कुरा प्रेस स्वतन्त्रताको विषय हुन नसक्ने धारणा मन्त्री बास्कोटाले व्यक्त गरे।

उनले इच्छुकको सपना कार्यान्वयन गराउन सङ्कल्प गर्नुपर्ने औँल्याउए। 'इच्छुकले चलाएको कलम साँच्चिकै साधारण परिवर्तनका लागि थिएन। त्यो आमूल परिवर्तनको विषय थियो,' उनले भने।
कार्यक्रममा नेपाल पत्रकार महासङ्घका अध्यक्ष गोविन्द आचार्यले इच्छुकका हत्यारालाई कारवाही गर्नुपर्नेमा जोड दिए। उनले अहिलेको मिडिया काउन्सिल विधेयक आचारसहिंता भएकाले आचारसहिंतामा दण्डको व्यवस्था गर्न नपाइने उल्लेख गर्दै विधेयक संशोधन गर्नुपर्ने बताए।

प्रकाशित : जेष्ठ १३, २०७६ १७:१५
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
×