वन मन्त्रालयले सोध्यो चन्द्रागिरीलाई स्पष्टीकरण 

अब्दुल्लाह मियाँ

काठमाडौँ — वन तथा वातावरण मन्त्रालयले चन्द्रागिरी हिल्स कम्पनी लिमिटेडलाई स्पष्टीकरण सोधेको छ । वातावरणीय प्रभाव मूल्यांकन (ईआईए) प्रतिवेदनमा उल्लेख भएभन्दा फरक प्रकृतिको संरचना निर्माण गरेको भन्दै वातावरण विभागले कारबाही गर्न सिफारिस गरेपछि मन्त्रालयले त्यसाे गर्नुको कारण सोधेको हो ।

काठमाडौंको चन्द्रागिरिमा रिसोर्टका लागि बनाइएका कंक्रिट भवनहरू । तस्बिर : किरण पाण्डे/कान्तिपुर

‘एक पटक स्पष्टीकरणको मौका दिइएको छ’, मन्त्रालयका प्रवक्ता सहसचिव सिन्धुप्रसाद ढुंगानाले कान्तिपुरसित भने, ‘उहाँहरुको के जवाफ आउँछ अनि त्यहीअनुसार मन्त्रालय अघि बढ्छ।

चन्द्रागिरीले ईआईए प्रतिवेदन उल्लंघन गर्दै संरचना निर्माण गरेकाले वातावरण ऐन २०५३ को धारा १८ (१) अनुसार कारबाही गर्न वातावरण विभागले दुई साता अघि मन्त्रालयसमक्ष प्रस्ताव गरेको थियो।

अध्ययन प्रतिवेदनमा विभागले संरचना निर्माण गर्दा ईआईए प्रतिवेदनलाई ख्याल नगरिएको उल्लेख छ। वातावरण ऐनको धारा १८ (१) मा प्रस्ताव स्वीकृत नगराई वा स्वीकृत प्रस्ताव विपरित कुनै कार्य गरेमा तोकिएको अधिकारीले त्यस्तो कार्य तुरुन्त बन्द गराउन सक्ने र त्यस्तो कार्य गर्ने कुनै व्यक्ति वा संस्थाले गरेको भए निजलाई कसूरको मात्रा हेरी एक लाख रुपैयाँसम्म जरिबाना गर्न सकिने व्यवस्था छ। कारबाही गर्ने निकाय वन तथा वातावरण मन्त्रालय नै हो।

तत्कालिन वातावरण, विज्ञान तथा प्रविधि मन्त्रालयका सचिवबाट २०६९ भदौ १९ मा स्वीकृत चन्द्रागिरीको ईआईए प्रतिवेदनमा वातावरणमैत्री ४० वटा कटेज निर्माण गरिने उल्लेख छ। चन्द्रागिरीले त्यसबिपरित भालेश्वरमा कंक्रिट संरचना खडा गरेको छ।

वन तथा वातावरण मन्त्रालयको जैविक विविधता तथा वातावरण महाशाखाले चन्द्रागिरीका संरचना ईआईएअनुसार निर्माण भए/नभएकोबारे अनुगमन गरी प्रतिवेदन पेश गर्न चैत १७ मा विभागलाई जिम्मेवारी दिएको थियो।

वातावरण निरीक्षकहरु भूपेन्द्र शर्मा, स्वस्ती श्रेष्ठ, हसना श्रेष्ठ, लक्ष्मीकुमारी ठगुन्ना, विभागका सिभिल इन्जिनियर अजय आचार्य र वन तथा भू–संरक्षण विभागका सहायक वन अधिकृत डम्बरबहादुर भण्डारीको टोलीले अध्ययन गरी प्रतिवेदन तयार गरेका थिए।
प्रतिक्रिया
पठाउनुहोस्

ओमनमा बंगालीद्वारा नेपाली युवतीको हत्या

होम कार्की

काठमाडौँ — ओमनको पर्यटकीय सहर सललाहामा कार्यरत लेटाङ–मोरङकी २५ वर्षीय अप्सरा दाहाल सार्कीको जेठ ३ गते हत्या भएको छ । बर्दियाकी २१ वर्षीय सुनिता सार्कीको रहस्यमय मृत्यु भएको छ । मस्कटस्थित नेपाली दूतावासका अनुसार दुवै घटनाको अनुसन्धान भइरहेको छ ।

दुवैजनाको शवलाई अल सुल्तान कावुस अस्पतालमा राखिएको छ। ‘अप्सरालाई चक्कु लागेको अवस्थामा प्रहरीले फेला पारेको सूचना प्राप्त भएको छ,’ ओमनका लागि नेपाली राजदूत शर्मिला पराजुली ढकालले कान्तिपुरलाई भनिन्,‘घटनाको अबस्था बुझ्न श्रम सहचारीलाई सल्लाह पठाउँदैछौं।’ मस्कटबाट सललाह झन्डै एक हजार किलोमिटर टाढा पर्छ।

प्रहरीले अप्सरासँगै बस्दै आएका एक बंगालीलाई पक्राउ गरेको छ। २२ महिना अघि ओमन पुगेकी अस्सरा घरमालिक छोडेर बंगलीसँग बस्दै आएकी थिइन्। अप्सराको शरीरभरी चक्कु प्रहार भएको थियो। उनको उपचारको क्रममा अस्पतालमै ज्यान गएको हो। ‘हामी दिउँसो नेपाली रेष्टुरेन्टमा मःमः खाएर छुट्टिएका थियौं,’ अप्सराका साथी गीता थापाले कान्तिपुरसँग भनिन्,‘शुक्रबार राति (जेठ ३) मारिएको खबर सुन्यौं।’

सुनिता सार्कीलाई भने प्रहरीले आत्महत्या गरेको अवस्थामा फेला पारेको थियो। दुवै खुट्टाको घुँडाले जमिनमा टेकेको अवस्थामा झुन्डिएको अवस्थामा फेला परेपछि प्रहरीले गहिरो रुपमा छानबिन थालेको दूतावासले जनाएको छ।

‘घटना सुन्दा रहस्यमय छ। प्रहरीले यसलाई निकै गम्भिरतापूर्वक छानबिन गरिरहेको छ,’ राजदूत ढकालले भनिन्। सार्की पनि बंगालीसँग बस्दै आएकी थिइन्। कुवेतमा कार्यरत सुनिताका दिदीले दूतावासलाई जानकारी दिइए अनुसार सुनिता मस्कटबाट भागेर सललाह पुगेकी हुन्। उनी भिजिट भिसामा ओमन पुगेकी थिइन। उनीसँगै बस्दै आएको बंगाली भने घटना हुनु एकसाता अगाडि नै बंगलादेश गइसकेको खुलेको छ।

प्रहरीले सुनिता झुन्डिएको कोठामा एक बंगाली महिलाको परिचयपत्र मात्रै फेला परेको थियो। त्यही आधारमा सुनिता बंगाली भएको अनुमान गरिदैँ आएको थियो। दूतावासले उनी नेपाली नै भएको भन्दै राहदानीको प्रतिलिपि प्रहरीलाई उपलब्ध गराएको छ।

प्रकाशित : जेष्ठ १२, २०७६ १३:२१
पूरा पढ्नुहोस्
प्रतिक्रिया
पठाउनुहोस्