व्यक्तिगत काममा जाँदा मन्त्रीलाई सरकारी इन्धन नदिन निर्देशन

लालप्रसाद शर्मा

पोखरा — गण्डकी प्रदेशसभा सार्वजनिक लेखा समितिले ऐनले व्यवस्था गरेभन्दा बढी इन्धन प्रयोग नगर्न प्रदेश सरकारलाई निर्देशन दिएको छ । मन्त्रीहरुले इन्धनमा दोहोरो सुविधा लिएको विषयमा छानबिन गरेको समितिले शुक्रबार यस्तो निर्देशन दिएको हो ।

ऐनअनुसार मुख्यमन्त्रीले मासिक २ सय ५० लिटर र मन्त्रीहरुले मासिक एक सय ५० लिटर इन्धन सुविधा छ । तर, मन्त्रीहरुले सुविधाबाहेक मन्त्रालयबाट थप इन्धन लिएको सार्वजनिक भएपछि लेखा समितिले गत माघ १४ मा सबै मन्त्रालयको विवरण मागेको थियो । यस विषयमा समितिले थप छानबिन गर्न चैत १२ मा समिति सदस्य रामजीप्रसाद बरालको संयोजकत्वमा मेखलाल श्रेष्ठ र प्रभा कोइराला सदस्य रहेको उपसमिति गठन गरेको थियो । उपसमितिको प्रतिवेदनमा मन्त्रीहरुले कार्यकर्ता भेट्न जाँदादेखि भोजभतेर, व्यक्तिगत काम र निर्वाचन क्षेत्र केन्द्रित प्रयोजनको कार्य र बढी आफ्नै निर्वाचन क्षेत्रमा जाँदा सरकारी ईन्धन प्रयोग गरिएको उल्लेख गरिएको छ । इन्धन एकद्वार प्रणालीबाट गरिनुपर्ने, लगबुकलाई अनिवार्य भर्नैपर्ने, कानुनसम्मत बाहेक ईन्धन खर्च गर्न नपाइने प्रतिवेदनमा छ । उपसमितिका संयोजक बरालले नमिलेको प्रक्रिया सुधार्न निर्देशन दिएको बताए ।

समितिका अनुसार मुख्यमन्त्रीबाहेक प्रदेशका ५ मन्त्रीले चालु आवमा ऐनमा तोकिएबाहेक साढे ५ हजार लिटर इन्धन बढी प्रयोग गरेका छन् । लेखा समिति सभापति कुमार खड्काले व्यक्तिगत काममा जाँदा सरकारी इन्धन प्रयोग नगर्न निर्देशन दिइएको बताए । 'मन्त्रीहरुले ऐनले तोकेबाहेक सम्बन्धित मन्त्रालयबाट पनि इन्धन लिएको पाइयो' उनले भने, 'मन्त्रीहरु व्यक्तिगत काममा जाँदा पनि भ्रमण आदेश स्वीकृत गर्ने देखिएकाले त्यसो नगर्न भनेका छौं ।'

खड्काले मुख्यमन्त्रीलाई पनि मन्त्रीहरुको भ्रमण आदेश स्वीकृत गर्दा सम्बन्धित मन्त्रालय/विभागको काम भए/नभएको हेर्न सुझाव दिएको बताए । सरकारीबाहेकका कार्यक्रममा जाँदा मन्त्रीहरुले सम्बन्धित आयोजकबाटै इन्धन सुविधा लिन समितिले निर्देशन दिएको छ । साथै लगबुक व्यवस्थित गर्न, खर्चमा एकरुपता कायम गर्न आर्थिक मापदण्ड बनाउन, एकद्वार प्रणाली अपनाउन र ऐनको व्याख्यात्मक टिप्पणी फेर्न समितिले सुझाव दिएको छ ।

प्रकाशित : जेष्ठ १०, २०७६ १८:३१
ADVERTISEMENT
प्रतिक्रिया
पठाउनुहोस्
ADVERTISEMENT

कतारमा मृत्यु भएका परिवारलाई सहयोग

कान्तिपुर संवाददाता

लमजुङ — कतारमा निधन भएका एक युवकका परिवारलाई लमजुङ सेवा समाज दोहा कतारले आर्थिक सहयोग गरेको छ । दूधपोखरी गाउँपालिका २ विचौर घर भई २ वर्षदेखि कतारमा कार्यरत ३८ वर्षीय ईन्द्रप्रसाद दवाडीको परिवारलाई सेवा समाजका तर्फबाट ३० हजार ५ सय ६१ रुपैयाँ सहयोग गरिएको हो ।

समाजका निवर्तमान सल्लाहकार कृष्ण बरालले दवाडीका पत्नि उमालाई सहयोग रकम हस्तान्तरण गरे । उनका अनुसार दवाडीका आफन्तसमेत रहेका गण्डकी प्रदेशसभा सदस्य धनञ्जय दवाडी, स्थानीय विनय दवाडी, नेपाल पत्रकार महासंघका जिल्ला उपाध्यक्ष कृष्ण आले, बाग्लुङ सेवा समाज कतारका सदस्य मानसिंह रानाको उपस्थितिमा सहयोग हस्तान्तरण गरिएको हो ।

लमजुङ सेवा समाज कतारले सन् २००५ देखि वैदेशिक रोजगारीमा गएका जिल्लावासीलाई दुःख-सुखमा साथ दिँदै आएका बरालले बताए । समाजका अध्यक्ष नवराज नखोलाको संयोजनमा दवाडीको कम्पनी र दूतावासमा आवश्यक प्रक्रिया मिलाउने, शव नेपाल पठाउने र आर्थिक सहयोग उपलब्ध गराउने लगायतका काम गरिएको थियो ।

दवाडीको वैशाख १ गते हृदयघात भई निधन भएको थियो । कतारस्थित डेयू इञ्जिनियरिङ कम्पनीमा कार्यरत दवाडीका पत्नि, एक छोरा, दुई छोरी छन् । परिवारका लालनपालनकै लागि दवाडीले १० वर्ष कतारमा बिताएका थिए ।

प्रकाशित : जेष्ठ १०, २०७६ १८:२२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×