कान्तिपुर वेबसाईट
AdvertisementAdvertisement

पाँचथर हत्या काण्डबारे मिक्लाजुङ गाउँपालिका अध्यक्ष भन्छन्- 'हामी पुग्दा घटनास्थल रगताम्मे थियो'

कान्तिपुर संवाददाता

काठमाडौँ — मैले यो घटना मंगलबार बिहान ६ बजेर ११ मिनेटमा थाहा पाएँ । थाहा पाउने वित्तिकै नजिकैको प्रहरी चौकीमा खबर गरेँ । र, इन्सपेक्टरसहित हामी घटनास्थलमा पुग्यौं । तत्कालै जिल्ला प्रशासन कार्यालय र जिल्ला प्रहरी कार्यालयलाई पनि खबर गरियो ।

हामी घटनास्थलमा पुग्दा ससुरा र ज्वाइँको घरमा घटना भएको देखियो । ससुरा र ज्वाइँको घर माथि र तल छ । सुरुमा हामीले ससुरा बमबहादुर फियाकको शव देखियो । बमबहादुर घरबाहिर सिखुवामा सुतेका रहेछन् । उनको अनुहारभरी धारिलो हतियार प्रहार गरेको देखियो । अनुहार नचिन्ने गरी हानिएको छ । छ्याकछ्याक पारेको देखियो । यताउता रगत लत्पतिएको देखियो ।


बमबहादुरको घरमा ४ वटा शव थिए । जसमा एउटा बाहिर र ३ वटा भित्र । हेर्नै नसकिने अवस्था थियो ।


त्यसपछि ज्वाइँ धनराज शेर्माको घरमा जाँदा झनै विभत्स दृश्य देखियो । भित्र जान सकिएन । बाहिरैबाट हेर्दा २ बालबालिका खाटमा रगताम्य भएर लडिरहेको देखियो । ३ वटा शव खप्टिएको देखियो । जताततै रगतै रगत थियो । रगतको 'खोलै' बगे जस्तै थियो ।


अहिले गाउँ शोकमग्न भएको छ । भागेर बाँच्न सफल भएकी १२ वर्षीया सीता खजुमका अनुसार हत्याराले मुख नचिनुन् भनेर अनुहार छोपेर आएका थिए । अहिलेसम्म कसले, के कारणले हत्या गर्‍यो अनुमान गर्नै सकिएको छैन । जिल्ला सदरमुकामबाट पनि अनुसन्धानका लागि डिएसपीको नेतृत्वमा आउँदै छ भन्ने सुनेको छु ।


हाम्रो गाउँपालिकाका सबैजसो जनप्रतिनिधि यहाँ भेला भएका छौं । यहाँको वातावरण निकै भावविह्वल छ । प्रहरीले घटनास्थल सिल गरेको छ । वरपर कसैलाई जान दिएको छैन । फोटो खिच्न दिइएको छैन । मृतकहरुको त्यस्तो कोहीकसैसँग नराम्रो भए जस्तो त मलाई लागेको थिएन । कसले, किन हत्या गर्‍यो प्रहरी अनुसन्धानबाट खुल्छ भन्ने विश्वासमा हामी छौं ।


मिक्लाजुङ गाउँपालिकाका अध्यक्ष अमरराज माखिमसँग कञ्चन अधिकारीले गरेको कुराकानीमा आधारित


यो पनि पढ्नुहोस्ः

पाँचथर हत्या काण्ड : भागेर बाँच्न सफल बालिका भन्छिन् - 'धारिलो हतियारले पालैपालो सबैलाई प्रहार गरे'

पाँचथरमा २ परिवारका ९ जनाको हत्या

प्रकाशित : जेष्ठ ७, २०७६ ११:०५
प्रतिक्रिया
पठाउनुहोस्

खानेपानीको प्रतिवेदन सार्वजनिक भएन

रकम हिनामिना भएको आशंकामा माघ १५ गते गठित समितिले वैशाख १५ गते प्रतिवेदन बुझाएको छ
कान्तिपुर संवाददाता

संखुवासभा — रकम हिनामिना भएको आरोपपछि माघ १५ मा गठित खाँदबारी खानेपानी छानबिन समितिले वैशाख १५ गते प्रतिवेदन बुझायो ।

कर्मचारीले महसुललगायत रकम हिनामिना गरेको आरोप लागेपछि छानबिन गरिएको थियो । घटनाको छानबिन प्रतिवेदन उपभोक्ता तथा सरसफाइ संस्थाले सार्वजनिक गर्न मानेको छैन ।

खाँदबारी नगरपालिकाका लेखापाल रुद्रमणि श्रेष्ठ एक सदस्यीय छानबिन समितिका संयोजक हुन् । खानेपानी महसुल र आयोजना सञ्चालनका क्रममा उपभोक्ताबाट उठाइएको ५ प्रतिशत रकम छानबिन गर्ने अधिकार उनलाई दिइएको थियो । ‘प्रतिवेदन तयार पारी खानेपानी उपभोक्ता समिति, जिसस र खाँदबारी नगरपालिकालाई बुझाएको छु,’ उनले भने, ‘प्रतिवेदन सार्वजनिक गर्ने अधिकार मलाई छैन, उपभोक्ता संस्थाले गरेको आधिकारिक हुन्छ ।’

प्रतिवेदन सार्वजनिक गर्न आलटाल गरेपछि उपभोक्ताले अनेक आशंका गरेका छन् । उनीहरू तत्काल प्रतिवेदन सार्वजनिक गर्न माग गरेका छन् । उपभोक्ता जीवनाथ खनाल संस्थाको सुरुआतबाटै छानबिन हुन आवश्यक रहेको बताउँछन् ।

उनले हिसाबकिताब चुस्तदुरुस्त बनाउन हालसम्मकै कारोबारको छानबिन हुनुपर्ने बताए । उपभोक्ताले पटक-पटक हिसाब सार्वजनिक गर्न माग गरे पनि उपभोक्ता समितिले आलटाल गरिरहेको छ ।

जिल्लामा भएका ठूला राजनीतिक दल यो विषयमा बोल्न चाहँदैनन् । राजनीतिक दलको भागबन्डाका आधारमा समिति चयन भएको हो । त्यस कारण पनि उपभोक्ता समिति प्रतिवेदन सार्वजनिक गर्न आटटाल गरिरहेको छ । छानबिनमै प्रश्न उठेको उनको भनाइ छ ।

संस्थाका अध्यक्ष नरेन्द्र राईले तत्कालै सार्वजनिक गर्न नमिल्ने बताए । खाँदबारी नगरपालिकासँग बिस्तारै सल्लाह गरेर मात्र प्रतिवेदन सार्वजनिक गर्ने उनले बताए । उपभोक्ताले पटकपटक हिसाब खोजे पनि नगरपालिका मूकदर्शक मात्र भएर बसेको छ ।

संस्थाले जडान शुल्क भन्दै उपभोक्ताबाट ५ प्रतिशतका दरले २ करोड १५ लाख अग्रिम उठाएको थियो । धेरै अनियमितता देखिएकाले उच्चस्तरीय समिति गठन गरेर थप छानबिन गर्नुपर्ने प्रमुख मुरारी खतिवडाको भनाइ छ । त्यसपछि मात्र प्रतिवेदन सार्वजनिक गरिने उनले बताए । उपभोक्ता संस्थाले भने तीन कर्मचारीलाई निलम्बन गरेको जनायो ।

खाँदबारीमा मागअनुसार उपलब्ध गराउन ४३ किलोमिटर टाढा मकालु-५, मांसिमाको सिमाली खोलाबाट पानी ल्याइएको छ । ३ हजार ४ सय धाराबाट पानी वितरण गर्ने गरी आयोजनाको काम सुरु गरिएको थियो । तर, सिनोटिक र आशिष निर्माण कम्पनीले २ हजार ७ सय ७५ धारा मात्र जडान गरेका छन् ।

आयोजना सञ्चालनका लागि २ हजार ९ सय ५९ घरबाट ५ प्रतिशत रकम जम्मा गर्न लगाइएको थियो । निर्माण कम्पनीले पूरा धारा जडान नगरेको र पानीसमेत नियमित सञ्चालन गर्न नसकिरहेको अवस्थामा संस्थाले आयोजना सम्पन्न भएको सिफारिस दिएको छ ।

रकम जम्मा गरेका उपभोक्ताका घरमा धारा जडान गर्नु निर्माण कम्पनीको जिम्मेवारी हो । २ हजार ७ सय ७५ धारा जडान भए पनि २ हजारवटा मात्र सञ्चालनमा रहेको संस्थाका अध्यक्ष राईले बताए । डिजाइन गलत हुँदा धाराबाट पानी आउन सकिरहेको छैन, उनले भने, २०७२ को भूकम्पले पनि मुहान सुकेका कारण २४ घण्टा पानी वितरण गर्न सकिएन ।

पहिले उपभोक्तासँग ५ प्रतिशत रकम उठाउदा समितिले २४ घण्टा फिल्टर गरिएको पानी उपलब्ध गराउने भनेको थियो । अहिले मुस्किलले २ दिनमा एक पटक धारामा पानी आउने गरेको छ । योजनाभन्दा १ हजार ४ सय कम धारा सञ्चालनमा आउँदा पनि पानीको चरम अभाव छ । आयोजना सम्पन्न भएको डेढ वर्ष बित्न लागे पनि महिनामा दुईपटक मुस्किलले पानी आउने गरेको उपभोक्ता कुमारबहादुर मगरले बताए ।

आयोजना निर्माण २०७० असोजमा सुरु भएको थियो । पाँचपटक म्याद थप गरी २०७४ पुस १६ मा निर्माण कम्पनीले काम सम्पन्न गरेको संस्थाको दाबी छ । कम्पनीले १८ महिनामा सक्नुपर्ने काम ५१ महिना लगाएको थियो ।

निर्माण सम्पन्न भएको एक महिनासम्म मर्मत, सम्भारसहित समस्याको समाधान गर्नुपर्ने जिम्मेवारी ठेकेदारकै हो । यो समय पनि वैशाखमा सकिएको छ । संस्थाका अध्यक्ष राईले समझदारीमा निर्माण पूरा गर्न लगाउने गरी सम्पन्नको सिफारिस दिइएको बताए ।

आयोजनाबाट खाँदबारीका १ देखि ९ वडा, चिचिला गाउँपालिकाको चिचिला बजर क्षेत्र र कुवापानीका उपभोक्तालाई पानी वितरण गर्ने लक्ष्य थियो । यसका लागि नगर विकास कोषबाट २० करोड २ लाख ऋण लिइएको थियो । संस्थाले ऋण १५ वर्षभित्र तिर्नुपर्नेछ । भेरिएसन अर्डर र मूल्य समायोजनसहित आयोजनाको खर्च रकम ४६ करोड ५१ लाख पुगिसकेको संस्थाले जनाएको छ ।

प्रकाशित : जेष्ठ ७, २०७६ ११:०४
पूरा पढ्नुहोस्
प्रतिक्रिया
पठाउनुहोस्
×