‘स्नोब्लाइन्डनेस’ र ‘फ्रस्टबाइट’ ले कञ्चनजंघामा २ भारतीयको मृत्यु !

आरोहण क्रममा मृत्यु भएका विप्लव वैद्य र कुंतल करार
सुरज कुँवर

काठमाडौँ — विश्वकै तेस्रो अग्लो हिमाल कञ्चनजंघा आरोहण क्रममा दुई भारतीय आरोहीको बुधबार राति मृत्यु भएको छ । काठमाडौंस्थित पिक प्रमोसन प्रालिको व्यवस्थापनमा त्यसतर्फ गएका पश्चिम बंगाल, कोलकाताका ४८ वर्षीय विप्लव वैद्य र ४६ वर्षीय कुंतल करारको मृत्यु भएको हो ।

कञ्चनजंगा आरोहणको क्रममा ज्यान गुमाएका दुई भारतीय नागरिक कुन्ताल करार (बाँया) र विप्लव वैद्य (दाँया) । तस्बिर स्रोत : पीक प्रमोशन


पिक प्रमोसनका निर्देशक पासाङ शेर्पाका अनुसार आरोहण गर्ने क्रममा ८ हजार मिटर उचाइ आसपासमा कुंतलको मृत्यु भएको थियो भने आरोहण सकेर फर्किने क्रममा विप्लवको मृत्यु भएको हो । उनीहरूको मृत्युको कारण ‘स्नोब्लाइन्डनेस’ र ‘फ्रस्टबाइट’ अनुमान गरिएको छ ।

कम्पनीले उनीहरूको शव शेर्पा गाइडहरूको सहायतामा शनिबार आधार शिविरमा झार्ने तयारी गरिरहेको जनाएको छ । दुवैले गत वर्ष सगरमाथा आरोहण गरेका थिए । यस कम्पनीका २८ जना शेर्पा अहिले कञ्चनजंघामा खटिएका छन् ।

पिक प्रमोसनबाट यस सिजनका लागि चारवटा दलले पर्यटन विभागबाट कञ्चनजंघा आरोहणका लागि अनुमति लिएका थिए । यिनमा २३ जना सदस्य थिए । ‘२३ मध्ये २० जना आरोही चुचुरामा पुग्न सके,’ निर्देशक शेर्पाले भने, ‘यीमध्ये एक भारतीयको फर्किने क्रममा मृत्यु भयो भने अर्का एक चिलियन फर्किने क्रममै बेपत्ता भए ।’

आरोहण सकेर फर्किने क्रममा स्नोब्लाइन्डनेस र फ्रस्टबाइटका कारण बिरामी परेका दुई भारतीय आरोही रुद्र हलदर र रमेश रोय दोस्रो शिविरमा र जर्मन आरोही फ्रयांक इरनिक तेस्रो शिविरमा छन् ।

उनीहरूलाई उद्धार गर्न बिहीबार काठमाडौंबाट कैलाश सर्भिसेसको हेलिकप्टर गएको थियो तर उद्धार गर्न नसकेर ताप्लेजुङस्थित सुकेटार विमानस्थलमा फर्किएको कैलाशका निर्देशक ईश्वरी पौडेलले बताए । ‘मौसमका कारण हेलिकप्टर दिनभर कञ्चनजंघा आसपास उडायौं । इन्धन सकिएपछि अर्को हेलिकप्टरले काठमाडौंबाट इन्धन ओसार्‍यो,’ पौडेलले भने ।

शुक्रबार मौसममा सुधार भए भारतीय बिरामी आरोहीलाई कैलाशको हेलिकप्टरले उद्धार गर्नेछ भने जर्मन नागरिकलाई श्री एयरलाइन्सको हेलिकप्टरले उद्धार गर्दै छ । चारवटा आरोहण दलमध्ये ‘पिक प्रमोसन कञ्चनजंघा एक्सपिडिसन २०१९’ नामको आरोहण दलमा मात्रै नौ जना सदस्य थिए । यस टोलीका लागि खटाइएकी सम्पर्क अधिकृत रचना प्रधानका अनुसार भारतीय नागरिक भगवान बिखवा चाउलाको नेतृत्वको टोली चैत अन्तिम साता कञ्चनजंघा आरोहणका लागि काठमाडौंबाट गएको थियो ।

आरोहण दलमा रहेका दक्षिण अमेरिकी मुलुक चिलीका नागरिक रोड्रिगो भिभ्यान्को हराइरहेका छन् । प्रधानका अनुसार उनले ‘मैले आरोहण सकेँ, फर्किंदै छु’ भनेका थिए ।त्यसपछि उनको सेटलाइट डिभाइस अफ भएको थियो ।’

८ हजार ५ सय ६८ मिटर अग्लो कञ्चनजंघा हिमाल आरोहणका लागि यस सिजनमा ३२ विदेशी र २ नेपालीसहित ३४ जनाले अनुमति लिएका थिए ।

प्रकाशित : जेष्ठ ३, २०७६ ०८:२४
प्रतिक्रिया
पठाउनुहोस्
ADVERTISEMENT

डिभिजन प्रमुखसहित २० जनाविरुद्ध मुद्दा

कान्तिपुर संवाददाता

काठमाडौँ — डिभिजन वन कार्यालय, मकवानपुरका प्रमुख प्रह्लादप्रसाद धितालसहित २० जनाविरुद्ध अख्तियार दुरुपयोग अनुसन्धान आयोगले विशेष अदालतमा मुद्दा दायर गरेको छ । सामुदायिक वनमा सालका २ सय ८ वटा रूख कटान गरी १ करोड ५८ लाख ७० हजार ७ सय ९० रुपैयाँ ३८ पैसा हानिनोक्सानी पुर्‍याएको पुष्टि भएपछि अख्तियारले बुधबार मुद्दा दायर गरेको हो ।

उपसचिव धिताल, सहायक वन अधिकृतहरू विशाल भट्टराई, टंकनारायण श्रेष्ठ, नारायणबहादुर कार्की, दशराम चौधरी र अवकाशप्राप्त सहायक वन अधिकृतद्वय मोहनबहादुर खड्का र राजेन्द्रमान राजभण्डारी, रेञ्जर राजु लामा, फरेस्टर ब्रह्मदेव यादव, वनरक्षक देवीप्रसाद गौतमलगायत विरुद्ध १ करोड ५८ लाख ७० हजार ७ सय ९० रुपैयाँ बिगोसहित कैद सजाय मागदाबी गरिएको छ ।

मकवानपुरको बकैया गाउँपालिका-२ मा पर्ने ब्रह्म सामुदायिक वन उपभोक्ता समूहका अध्यक्ष मर्दनसिंह थिङसहित ठेकेदार, वन समिति र वन कार्यालयसमेतको मिलेमतोमा डिभिजन प्रमुख धितालले १ लाख रुपैयाँसमेत घूस लिएर ११ हजार १ सय ५४.४९ हजार क्युबिक फिट काठ कटानी र संकलन अनुमति दिएको अख्तियारले जनाएको छ ।

मकवानपुरकै स्थायी बासिन्दा धिताल प्रदेश ३ को वन मन्त्रालयमा हाजिर भए पनि लामो बिदामा थिए । जंगलबाट काठ सहज ढंगले बेचबिखन गर्न सजिलो होस् भनेर ठेकेदार र सामुदायिक वनका पदाधिकारीले २० लाख रुपैयाँभन्दा बढी रकम विभिन्न निकायमा पहिल्यै बाँडेका थिए ।

हेटौंडास्थित होटल सामनाका सञ्चालक सानुकाजी आचार्य, सामना काष्ठ उद्योगका सञ्चालक सुरज आचार्य, सामुदायिक वनका अध्यक्ष थिङ, कोषाध्यक्ष शुक्रबहादुर भोलन, ब्रह्म आधारभूत विद्यालयका प्रधानाध्यापक राजन भन्ने रामबहादुर घोरसाइनी, सामुदायिक वनका सल्लाहकार जीवन भन्ने भीमबहादुर थिङ, ढलापडा काठदाउरा संकलन समितिका संयोजक बनेका भुटानी भन्ने बुद्धबहादुर लोप्चन, सदस्यद्वय सोमबहादुर तिमल्सिना र सुर्जबहादुर जिम्बा भन्ने सूर्यबहादुर जिम्बाविरुद्ध पनि बिगोदाबी गरिएको छ ।

उक्त सामुदायिक वनभित्रका २ सय ६२ वटा ढलापडा सालका रूख मात्र कटान गर्नका लागि छपान भएकामा ठेकेदारहरूले बदनियतपूर्वक छपान नगरेका सालका हरिया सग्ला २ सय ८ रूख कटान (९४९७.७८ क्युबिक फिट) गरेकाले उनीहरूविरुद्ध भ्रष्टाचार निवारण ऐनअनुसार अदालतमा आरोपपत्र दायर गरिएको अख्तियारा प्रवक्ता प्रदीप कोइरालाले उल्लेख गरेका छन् ।

प्रकाशित : जेष्ठ ३, २०७६ ०८:२२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×