सख्मा टोलमा ट्युबवेल गाडियो
विराटनगर — बुढीगंगा गाउँपालिका-२ सख्मा टोलमा उखेलिएको ट्युबवेल बिहीबार गाडिएको छ । सख्मा टोलका सनी ऋषिदेव र सिर्जना थापामगर सम्पर्क विहीन भएपछि थापा परिवार र ऋषिदेव परिवारबीच भएको विवादका कारण ऋषिदेव बस्तीको ट्युबवेल थापा परिवारले उखेलिदिएको थियो ।
ट्युबवेल नहुँदा पानी खान समस्यामा परेको भन्दै ऋषिदेव परिवारले जिल्ला प्रहरी कार्यालयमा उजुरी दिएपछि मोरङ प्रहरीले मङ्गलवार नै ट्युबवेल गाड्न निर्देशन दिएको थियो ।
बस्तीको सामूहिक ट्युबवेल उखेलिएपछि ऋषिदेव परिवारले पानी खानका लागि एक महिनादेखि विभिन्न समस्या झेल्दै आएका थिए । बिहीबार घर अगाडि नै ट्युबवेल गाडिदा उनीहरू हर्षित बनेका छन् ।
ट्युबवेल नहुँदा एक महिनादेखि अर्को टोलबाट बोकेर पानी ल्याउनुपर्दा निकै दुःख पाइरहेको कलावती ऋषिदेवले बताइन । 'एक महिनादेखि हामीले पानी खानको लागि धेरै दुःख पाउनुपर्यो,' उनले भनिन्, 'अब घर अगाडी नै ट्युबवेल गाडिएको छ, अर्को बस्तीमा गएर पानी बोक्नु पर्दैन खुसी लागेको छ ।'
थापा परिवारले भने आफ्नी नाबालिक छोरीको अवस्थाको विषयमा अझै कुनै जानकारी नआएको भन्दै गुनासो गरेको छ । लामो समय भइसक्दापनि प्रहरीले आफ्नी छोरीको खोजी गर्न नसकेको उनीहरूको गुनासो छ ।
सनी ऋषिदेव र सिर्जना थापामगर चैत १८ गतेदेखि नै बेपत्ता भएका छन् । सामाजिक सञ्जालमा भने उनीहरूले विवाह गरेको तस्बिर सार्वजनिक गरेका छन् ।
यो पनि पढ्नुहोस्ः
उखेलिएको ट्युबवेल तुरुन्त गाड्न मोरङ प्रहरीको निर्देशन, सनी र सिर्जनाको खोजी तीव्र
अन्तरजातीय बिहेपछि मुसहर समुदायले पानी पाएन
प्रकाशित : जेष्ठ २, २०७६ १७:०८