मिडिया काउन्सिल विधेयक प्रेस स्वतन्त्रता विरोधी : गगन थापा

भीमबहादुर सिंह

जाजरकोट — नेपाली कांग्रेसका नेता गगन थापाले मिडिया काउन्सिल विधेयक प्रेस स्वतन्त्रता विरोधी भएको बताएका छन् । लोकतान्त्रिक व्यवस्थामा प्रेस स्वतन्त्रता विरोधी विधेयक ल्याउनु निरंकुश तथा अलोकतान्त्रिक हर्कत भएको उनले बताए ।

प्रेस स्वतन्त्रता विरोधी उक्त विद्येयक विरुद्ध सञ्चार जगत मात्र होइन आम नेपाली जनता पनि जाग्नुपर्ने थापाको भनाई थियो।

कांग्रेसको राष्ट्रिय जागरण अभियान अर्न्तगत नेपाली कांग्रेस पार्टी जाजरकोट क्षेत्र नं २, क्षेत्रिय कार्य समितिले थलहबजारमा आयोजना गरेको आमसभालाई सम्बोधन गर्दै उनले सो कुरा बताएका हुन्। पूर्वमन्त्री समेत रहेका थापाले दुई तिहाईको सरकारले नागरिकको अधिकार खोस्दै गएको बताए।

ओली सरकारले अदालत, मानव अधिकार आयोग, अख्तियार, सञ्चार लगायत क्षेत्रलाई समेत नियन्त्रणमा राख्ने हर्कत गरेको उनले दाबी गरे। ‘गणतान्त्रिक व्यवस्थामा जनताले नागरिक अधिकारको उपभोग गर्न पाउनु पर्छ। त्यस्तै पत्रकारले गलतको कामको विरोधमा लेख्न र बोल्न पाउनुपर्छ,’ थापाले भने।

दुई तिहाईको केपी ओली सरकारले जनताका लागि गर्नुपर्ने काम त गर्दै गरेन, गर्न नहुने काम समेत गर्न थालेको थापाले बताए। ‘राष्ट्रपति सडकमा निस्कँदा समेत जनताको भागभाग हुन्छ, जस्का कारण गणतान्त्रिक व्यवस्था प्रति जनतामा आक्रोस पैदा भएको छ,’ नेता थापाले भने।

उनले पछिल्लो समय नेपाली कांग्रेस कमजोर नभएर जिम्मेवार भएको बताएका छन्। कांग्रेस गणतन्त्र, संविधान कार्यान्वयन र राजनीतिक मुल्यमान्यता प्रति जिम्मेवार भएको थापाले बताए। प्रधानमन्त्री ओलीले जथाभावी गफलाई स्थान दिएको तर, नेपाली नागरिकको हक हितमा ध्यान नदिएको उनले बताए।

उक्त आमसभामा केन्द्रिय प्रतिनिधी एवं पूर्वराज्यमन्त्री तप्तबहादुर विष्टले देशको वर्तमान अवस्था र कांगेसको भुमिकाबारे जनतालाई स्पष्ट पार्न जनजागरण अभियान लिएर गाउँ पसेको बताए। दुई तिहाई सरकारका गलत गतिविधीको भण्डाफोर गर्न जनजागरण अभियान मार्फत सम्पूर्ण देशवासी जाग्नुपर्ने विष्टले बताए।

जनजागरण अभियानमा कांग्रेस जाजरकोटका सभापति दीपकजंग शाह, नेता वेदराज सिंह, शेरबहादुर शाही लगायत सहभागिता रहेको छ। जाजरकोट कांग्रेसले जनजागरण अभियान अर्न्तगत सदरमुकाम खलंगा र छेडागाड नगरपालिकाको थलहबजारमा कार्यक्रम सम्पन्न गरेको छ। सोही अभियान अर्न्तगत कांग्रेसले नलगाड नगरपालिकाको दल्ली, बारेकोटको लिम्सा, कुशे गाउपालिकाको भार्म, भेरी नगरपालिकाको स्याउलीबजार लगायत स्थानमा कार्यक्रम आयोजना गर्न लागेको नेता वेदराज सिंहले बताए।

प्रकाशित : जेष्ठ २, २०७६ १३:३६
प्रतिक्रिया
पठाउनुहोस्

कञ्चनजंघा आरोहणका क्रममा २ भारतीयको मृत्यु, चिलीका एकजना सम्पर्कविहीन

सुरज कुँवर

काठमाडौँ — विश्वकै तेस्रो अग्लो हिमाल कञ्चनजंघा आरोहणका क्रममा दुई भारतीय आरोहीहरुको बुधबार राति मृत्यु भएको छ । काठमाडौंस्थित पीक प्रमोशन प्रालिका सेल्स तथा मार्केटीङ निर्देशक पासाङ शेर्पाले उनीहरुको मृत्यु भएको पुष्टी गरेका छन् ।

तस्बिर : रोयटर्स

मृत्यु हुनेमा भारतीय नागरिक ४८ वर्षीय विप्लव वैद्य र ४६ वर्षीय कुन्ताल करार रहेको पर्यटन विभागका निर्देशक मिरा आचार्यले बताइन्। पीक प्रमोशनका अनुसार, कुन्ताल आरोहण गर्ने क्रममा ८ हजार मिटर आसपासमा मृत्यु भएको र विप्लवको भने आरोहण सकेर फर्किने क्रममा मृत्यु भएको हो।

कञ्चनजंगा आरोहणको क्रममा ज्यान गुमाएका दुई भारतीय नागरिक कुन्ताल करार (बाँया) र विप्लव वैद्य (दाँया) । तस्बिर स्रोत : पीक प्रमोशन

त्यसैगरी दक्षिण अमेरिकी मुलुक चिलीका रोडरिगो भिभ्यान्को भने हराइरहेका छन्। निर्देशक शेर्पाका अनुसार, उनी आरोहण सकेर फर्किने क्रममा चौथो शिविरभन्दा माथीबाट हराएको हुनसक्ने अनुमान गरिएको छ।

यसैबीच भारतीयहरुको शव शुक्रबार दोस्रो शिविरसम्म ल्याइने र त्यहाँबाट हेलिकप्टरमार्फत काठमाडौं ल्याइने कम्पनीले जनाएको छ। हराएका रोडरीगोको खोजी भइरहेको छ। यस सिजनमा यस कम्पनीबाट कञ्चनजंघा आरोहणमा चारवटा आरोहण दल गएका थिए। तीनमा २३ आरोही थिए।

यीमध्ये एक जर्मनी र दुई भारतीय नागरिक बिरामी भएकाले बिहीबार बिहान कैलाश एयरको हेलिकप्टरले उद्धार गरी काठमाडौं ल्याउने तयारी गरीरहेको छ।


प्रकाशित : जेष्ठ २, २०७६ ११:५०
पूरा पढ्नुहोस्
प्रतिक्रिया
पठाउनुहोस्