बर्दिया राष्ट्रिय निकुञ्जमा एक महिनायता लागेको डढेलो नियन्त्रणमा आएन 

निकुञ्जको कर्णाली र बबई तटीयक्षेत्रको अम्रेनी, घुम्ना, रम्मापुर सेक्टर सैनावारदेखि बनखेत र चुरेको गोठी, बबई उपत्यका, तरंगा लगायत दर्जनौँ ठाउँमा डढेलो लागेको हो ।

डढेलो नियन्त्रणमा नआएपछि विगत तीन सातायता धुवाँको मुस्लोले मध्यवर्ती क्षेत्र समेत प्रभावित भएको छ । ठाकुरबाबा-१ का शंकर थारुका अनुसार डढेलोको मुस्लोले गाउँमा धुवाँले ढाकेको बताए ।

डढेलोका कारण बालबालिका र वृद्धलाई बढी असर परेको उनको भनाई छ । बबई उपत्यकाको विकट चुरे क्षेत्र भएकाले नियन्त्रणमा लिन सकिएको छैन ।' डढेलोसँगै चलेको हावाले निकुञ्जको उत्तरी भाग अझै डढेलोको जोखिममा रहेको रेन्जर पुष्पदेव श्रेष्ठले बताए ।

निकुञ्जभित्र मह काढ्ने, घाँस, दाउरा गर्ने र चोरी सिकारीले आगो लगाएका कारण डढेलो सल्केको आशंका निकुञ्जका कर्मचारीले गरेका छन् । डढेलो लगाउनेलाई निकुञ्जले पहिचान गर्न सकेको छैन ।

शनिवार सुर्खेत तरंगाकी पद्मा उपाध्यायलाई वनको सुखेको घाँसमा आगो लगाएको आरोपमा निकुञ्जले नियन्त्रणमा लिएको छ ।

चुरे क्षेत्रमा हावाहुरी र तातो लुसँगै आगोको मुस्लो नियन्त्रण गर्न निकुञ्ज सुरक्ष्ााका लागि तैनाथ नेपाली सेना, कर्मचारी लगायत संरक्षणकर्मीलाई हम्मे हम्मे परेको छ ।

वर्षेनी गर्मीयाम मौसममा हुने डढेलोले निकुञ्जमा क्षति पुर्‍याउँदै आएको छ । दमकल नपुग्ने विकट चुरे क्षेत्रमा डढेलो नियन्त्रण गर्ने अवस्था नरहेको निकुञ्जले जनाएको छ । डढेलो उत्तरको चुरे पहाडबाट सुरु भई दक्षिण क्षेत्रमा बढी फैलिने गरेको छ ।

हालसम्म डढेलोका कारण जंगली जनावरलाई पुगेको क्षतिको विवरण नआएपनि वन्यजन्तुले बासस्थान फेर्दै अन्यत्र जाने गरेको निकुञ्जले जनाएको छ ।