सरकारको नीति तथा कार्यक्रम झुटको पुलिन्दा : गगन थापा
काठमाडौँ — नेपाली कांग्रेसका सांसद गगन थापाले सरकारको नीति तथा कार्यक्रमलाई झुटको पुलिन्दा भएको टिप्पणी गरेका छन् । संघीय संसद् भवनबाट बाहिरिँने क्रममा सञ्चारकर्मीसँग बोल्दै सांसद थापाले नीति तथा कार्यक्रम पुरानैको निरन्तरता मात्र भएको बताए । 'सरकारको आज सार्वजनिक भएको नीति तथा कार्यक्रम झुटको पुलिन्दा हो' उनले भने, 'यसले समृद्धि ल्याउँदैन ।'
नीति तथा कार्यक्रममा गत वर्षको समीक्षासमेत हुन नसकेको भन्दै उनले यसले आगामी वर्ष कुनै उपलब्धि नहुने र जनतामा निराशा ल्याउने दाबी गरे ।
कांग्रेसका अर्का सांसद नारायण खड्काले पनि नीति तथा कार्यक्रममा नयाँ कुरा समेट्न नसकेको प्रतिक्रिया दिए । उनले सरकारले आगामी वर्षको कार्यक्रमले स्पष्ट दिशासमेत दिन नसकेको टिप्पणी गरे ।
तर, उपप्रधान तथा स्वास्थ्यमन्त्री उपेन्द्र यादवले सरकारको नीति तथा कार्यक्रमबाट समृद्धि आउने दाबी गरे ।