एकमात्र अन्तर्राष्ट्रिय विमानस्थललाई 'बुटिक' बनाइने
काठमाडौँ — सरकारले एकमात्र अन्तर्राष्ट्रिय विमानस्थल त्रिभुवन अन्तर्राष्ट्रिय विमानस्थललाई 'बुटिक' विमानस्थल बनाइने घोषणा गरेको छ ।
संसदमा सरकारको नीति तथा कार्यक्रम प्रस्तुत गर्दै राष्ट्रपति विद्यादेवी भण्डारीले मौलिक परम्परा र संस्कृति झल्किने गरी विमानस्थललाई 'बुटिक' अन्तर्राष्ट्रिय विमानस्थलका रुपमा विकास गरिने बताएकी छन् । चौविसै घण्टा विमानस्थललाई सञ्चलानमा ल्याइने गरी काम भइरहेको उनले उल्लेख गरिन् ।
उपत्यका नजिकै उपयुक्त स्थानमा आन्तरिक विमानस्थलको विकास गरिने भन्दै उनले अन्य आन्तरीक विमानस्थलको पनि स्तरवृद्धि गरिने बताइन । रात्रि उडानका सुविधा नभएका विमानस्थलमा उपकरण थप गरी रात्रिकालिन विमान उडानको व्यवस्था मिलाउने उनले बताइन् ।
उनले राजमार्गका उपयुक्त खण्डहरुमा आपत्तकालिन अवस्थामा विमान अवतरण र उडान गर्न मिल्ने गरी विकास गरिने समेत उल्लेख गरिन् ।
प्रकाशित : वैशाख २०, २०७६ १७:०३