वायुसेवा निगमका प्रवक्ता तथा क्याप्टेन लामा निलम्बित

कान्तिपुर संवाददाता

काठमाडौँ — नागरिक उड्डयन प्राधिकरणले नेपाल वायुसेवा निगमका प्रवक्ता तथा क्याप्टेन विजय लामालाई ग्राउन्डेड गरेको छ । प्राधिकरणले स्पष्टिकरण सोधेर स्पष्टिकरण कानुनसम्मत नभएपछि लामालाई ग्राउन्डेड गरेको हो।

तस्बिर साभार विजय लामाको फेसबुक ।

निगमका प्रवक्ता रहेका बेला दुबई उडान रद्द भएपछि लामाले दिएको अभिव्यक्ति आपत्तिजनक भएको भन्दै प्राधिकरणले लामालाई स्पष्टिकरण सोधेको थियो।

लामाको स्पष्टिकरण चित्त बुझ्दो नभएको भन्दै प्राधिकरणले उनको लाइसेन्स तत्कालका लागि सस्पेन्स गर्ने निर्णय गरेको हो।

पाइलटलगायत उड्डययनकर्मीलाई नियमन गर्ने नागरिक उड्डयन प्राधिकरणलाई गत वैशाख पहिलो साता 'आफ्नो इजाजतपत्र खारेज गर्न' चुनौती दिएका थिए। चुनौतीदिएपछि नेपाल वायुसेवा निगमका क्याप्टेन विजय लामालाई ७ दिने स्पष्टीकरण सोधिएकोथियो।

एक अनलाइन टिभीमा पाइलट लामाले ५५ मिनेट लामो अन्तर्वार्ताका क्रममा आवेशमा आई नियमन गर्ने निकायलाई चुनौती दिएपछि उनलाई प्राधिकरणमातहत सिनामंगलमा रहेको फ्लाइट सेफ्टी स्ट्यार्डड विभागले गत वैशाख ४ गते बुधबार ७ दिने स्पष्टीकरण सोधेको हो।

चैत १९ गते राति भएको निगमको दुबई उडान रद्दबारे पाइलट लामाले यूट्युब च्यानलमा बोलेको विषयलाई स्पष्टीकरण पत्रमा सोधिएको हो। पेसाले जहाज उडाउने नेपाल वायुसेवा निगमका प्रवक्ता लामाले उक्त अन्तर्वार्तामा आफू तनाव, थकान, अस्वस्थ र अनिन्द्रामा रहेको भनेकाथिए।

यो पढ्नुहोस्ः

विवादमा तानिए क्याप्टेन विजय लामा

प्रकाशित : वैशाख १६, २०७६ १६:५६
प्रतिक्रिया
पठाउनुहोस्

म्यानपावर व्यवसायीद्वारा धरौटीको ब्याज दिन माग

कान्तिपुर संवाददाता

काठमाडौँ — नेपाल वैदेशिक रोजगार व्यवसायी संघले वाणिज्य बैंकमा धरौटी बापत् बैंकमा राखेको पैसाको ब्याज दिन प्रधानमन्त्री केपी शर्मा ओलीको ध्यानाकर्षण गराएको छ ।

संघले बिमा कम्पनीहरुले बिमा कारोबार गर्न राख्नुपर्ने धरौटी रकमको ब्याज पाउने भन्दै म्यानपावर व्यवसायीलाई पनि ब्याज दिनुपर्ने संघका अध्यक्ष रोहण गुरुङले बताए । संघले यसबारे प्रधानमन्त्री तथा मन्त्रिपरिषद्को कार्यालयमा ज्ञापन पत्र बुझाएको छ ।

श्रम रोजगार, तथा सामाजिक सुरक्षा मन्त्रालयले वैदेशिक रोजगार ऐनलाई संशोधन गरी धरौटी रकम बढाएको छ । ऐन अनुसार ३ हजार भन्दा कम कामदार पठाउने म्यानपावरले ५० लाख नगद र एक करोड ५० लाख रुपैयाँ बैंक ग्यारेन्टी, तीनदेखि ५ हजारसम्म कामदार पठाउने म्यानपावरले एक करोड रुपैयाँ नगद र दुई करोड बैंक धरौटी र ५ हजार भन्दा बढी कामदार पठाउने म्यानपावरले दुई करोड रुपैयाँ नगद र तीन करोड रुपैया बैंक ग्यारेन्टी राख्नुपर्ने बाध्यकारी नियम छ ।

भदौसम्म यो धरौटी नराख्ने म्यानपावरले कामदारलाई विदेश पठाउन पाउने छैन । यसअघि ७ लाख रुपैयाँ नगद र २३ लाख रुपैया बैंक धरौटी राखेपछि म्यानपावरले कामदार पठाउने अनुमति पाउने गरेको थियो ।

‘विमा कम्पनी र स्कुल कलेजले पाउने सुविधा म्यानपावर व्यवसायीले पनि पाउनुपर्छ,’ अध्यक्ष गुरुङले भने,‘अन्यथा वैदेशिक रोजगार व्यवसायीहरुप्रति मात्रै अन्याय र विभेदपूर्ण व्यवहार गरेको ठहरिनेछ ।’

प्रकाशित : वैशाख १६, २०७६ १६:५२
पूरा पढ्नुहोस्
प्रतिक्रिया
पठाउनुहोस्