बेइजिङमा लुम्बिनी शान्ति बगैंचा

लक्ष्मी लम्साल

बेइजिङ — राष्ट्रपति विद्यादेवी भण्डारीले आइतबार साँझ बेइजिङको यानछिङ जिल्लामा लुम्बिनी शान्ति बगैंचा उद्घाटन गरेकी छन् । विश्व बागवानी एक्स्पो–२०१९ अन्तर्गत लुम्बिनी शान्ति बगैंचा नामक नेपाली पेभिलियनमा नेपालबाट झिकाइएका बिरुवा रोपेर उद्घाटन गरेकी हुन् ।

राष्ट्रपति विद्यादेवी भण्डारी आइतबार बेइजिङको यानछिङमा लुम्बिनी शान्ति बगैंचा उद्घाटनपछि । तस्बिर : सुरेन्द्रबहादुर नेपाली/रासस

उद्घाटनमा परराष्ट्रमन्त्री प्रदीप ज्ञवाली, प्रदेश ३ का मुख्यमन्त्री डोरमणि पौडेललगायत नेपाली डेलिगेसन थिए । विश्वका १ सय १० मुलुक तथा क्षेत्रका संगठनले भाग लिएको एक्स्पो उद्घाटनको सांस्कृतिक साँझमा पनि भण्डारी सहभागी थिइन् ।

सांस्कृतिक प्रस्तुति उद्घाटनमा बोल्दै चीनका राष्ट्रपति सी चिनफिङले शनिबार सकिएको बीआरआई दोस्रो शिखर सहकार्य मञ्चसँगै बागवानी एक्स्पो पनि निकै महत्त्वपूर्ण भएको बताए । ‘विश्व बागवानी एक्स्पो–२०१९ सुरु भयो,’ राष्ट्रपति सीले भनेपछि तालीको गडगडाहटसँगै मञ्चमा नेपालसहित विभिन्न देशको झन्डा फहराइएको थियो ।

मन्तव्य सकेर मञ्चमा फर्किएका सीले सोही लहरमा बसेकी राष्ट्रपति भण्डारीसँग हात मिलाए । समारोहमा विभिन्न देशका प्रतिनिधि सहभागी थिए । पाँच महिनाभन्दा बढी अर्थात् १६२ दिनसम्म चल्ने यो एक्स्पो अक्टोबर ७ तारिखमा सम्पन्न हुनेछ । चीनले यस वर्षको घरेलु कूटनीतिमा बेइजिङ विश्व एक्स्पोलाई पनि महत्त्वको सूचीमा समावेश गरेको छ । एक्स्पो स्थल राजधानी बेइजिङ केन्द्रदेखि ७४ किमि टाढा यानछिङ जिल्लामा पर्छ । सोही जिल्लाले सन् २०२२ बेइजिङ ओलम्पिकका लागि कार्यक्रम संयोजन गर्दै छ । आयोजकका अनुसार १ करोड ६० लाखले यो एक्स्पो अवलोकन गर्ने पूर्वानुमान छ ।

विश्व बागवानी मामिला सहकार्य ब्युरोका उपनिर्देशक वु काङका अनुसार कम्तीमा १० हजार कर्मचारी खटिएर बगैंचा र घरहरू बनाउने कार्य पूरा भएको हो । हरित जीवन, सुन्दर घर नाम दिइएको यस एक्स्पोले वातावरणीय सूचना तथा चीन सरकारको प्रदूषण नियन्त्रणप्रतिको पहललाई उजागर गरेको छ । एक्स्पोभित्र ८० वटा बगैंचा पेभेलियन र घर छन् । एक्स्पो प्रस्तुतिमा विभिन्न देशका कलाकारले हरित जीवन र वनस्पति जगतका अनेक आयाम झल्किने नृत्य तथा गायन अभिनय प्रस्तुत गरेका थिए ।

बिहान चिनियाँ उद्यमीसँग लगानीका विषयमा सम्बोधन गरेकी राष्ट्रपति भण्डारी दिउँसो अरनिकोले बनाएको श्वेत चैत्यको अवलोकन गरेकी थिइन् । बेइजिङको केन्द्रमा रहेको प्यागोडा शैलीमा तेह्रौं शताब्दीमा निर्मित उक्त श्वेत चैत्य तत्कालीन समयको सबैभन्दा अग्लो संरचना मानिन्थ्यो ।

प्रकाशित : वैशाख १६, २०७६ ०८:०९
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

कमिलाको पनि पार्सल

एजेन्सी

छाङसा — चीनमा बेलायतबाट आएको एक मेल पार्सलमा कमिला भेटिएका छन् । चीनको केन्द्रीय भन्सार कार्यालयका अनुसार ‘पार्सल’ मा एक हजारभन्दा बढी कमिला पठाएको भेटिएको हो । 

चीनको हुनान प्रान्तको छाङसाबाट कमिलासहितको उक्त पार्सल नियन्त्रणमा लिइएको छ । ती कमिला ‘हार्भेस्टर एन्ट’ लाई आवश्यक पोषणयुक्त खानासहित टेस्टट्युबमा बन्द गरिएको अवस्थामा भेटिएको भन्सार अधिकारीले जनाएका छन् । चीनमा पछिल्लो समय विदेशी जीव पाल्ने सोख बढ्दो छ । कमिलाको उक्त प्रजातिलाई आयात गरिएको हुन सक्ने अधिकारीहरूले बताएका छन् ।

‘हार्भेस्टर एन्ट्स’ मध्ये ३७ वटा १.४ सेमि लामो र काला तथा राता रानी कमिला रहेका छन् । रानी कमिलासँगै ठूलो संख्यामा ज्यामी कमिला र तिनीहरूका फुलसमेत पार्सलमा भेटिएको भन्सारले जनाएको छ । एक अधिकारीले भने, ‘सबै कमिला ‘हार्भेस्टर एन्ट’ प्रजातिका रहेका र सुन्दर भएका कारण जीव पाल्न सौखिन चिनियाँबीच लोकप्रिय छ ।’ उक्त प्रजातिका कमिलाको प्रजनन छिटो हुने भएकाले हुर्काउन सहज मान्ने गरिएको चिनियाँ जीवविज्ञहरूले बताएका छन् ।

चीनमा हुलाक वा हुलाकजन्य सेवामार्फत जीवित अवस्थामा कुनै पनि जीव ल्याउन कानुनी प्रतिबन्ध छ । चिनियाँ अधिकारीहरू भन्छन्, ‘गैरकानुनी रूपमा आयात गरिने विदेशी कमिलाको प्रजातिका कारण मुलुकको पारिस्थितिक सन्तुलन जोखिममा पर्न सक्छ ।’ चिनियाँ कानुनअनुसार ती कमिला र पार्सललाई प्रक्रिया पुर्‍याएर नष्ट गरिनेछ ।

चीनमा फस्टाउँदो ई(कमर्सका कारण सरीसृप (सर्प), सानाठूला किरा र छेपारो प्रजातिका विदेशी जीवको आयातमा वृद्धि भइरहेको छ । विदेशी जीव र संकटापन्न जीवको अवैध कारोबार गरेको आरोप चीनले पटक–पटक खेप्दै आएको छ ।

प्रकाशित : वैशाख १६, २०७६ ०८:०७
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT