हुरी पीडत भन्छन्- बोल्ने धेरै भए, राहत दिने थोरै

बालबालिका र महिला असुरक्षित
विमल खतिवडा, भूषण यादव, लक्ष्मी साह, पवन यादव

फेटा, बारा — फेटा गाउँपालिका–६ स्थित पुरैनियाका मन्जुर आलम बुधबार मध्याह्न देब्रे खुट्टा समात्दै स्वास्थ्य शिविर चाहर्दै थिए । खुट्टा सुन्निएको थियो । नेसनल मेडिकल कलेज वीरगन्जले लगाइदिएको पट्टी खोल्न उनी स्वास्थ्यकर्मीको खोजीमा थिए । घाउ पाकेको थियो । दुखाइ सहन नसकेर छटपटिएका थिए । शिविर पुगेर स्वास्थ्यकर्मीलाई घाउ सफा गरेर पट्टी फेरिदिन आग्रह गरे । 

ZenTravel


तर स्वास्थ्यकर्मीले मानेनन् । जुन अस्पतालमा उपचार गराएको हो, त्यहीं गएर पट्टी खोल्न भनेपछि उनी निराश हुँदै घरतिर लागे । भत्किएको घर पुगे । चारैतिर नियाले । अस्थायी टेन्टभित्र पुगेर बसे । स्वास्थ्य शिविरमा उपचार नै पाइएन । उनले निराश हुँदै भने, ‘दुखाइ बढेको छ तर अस्पताल पुग्ने आँटै छैन ।’ उनको पीडा अरूको भन्दा भिन्न छ । खाना खानै लाग्दा आएको ठूलो हुरीमा दुई छोरी गुमाए । ३ मिनेटको समयमा आँखै अगाडि बोली रहेका दुई छोरीहरू १८ वर्षीया सवनम र १० वर्षीया रुविको ज्यान गयो । अरू ३ छोरी घाइते छन् ।

Meroghar


‘अकस्मात हुरी आयो, सबै जना एकै ठाउँमा थियौं,’ उनले भने, ‘छिनभरमा घर ढल्यो, को कता पुरियो केही थाहा पाइएन, एकछिन पछि इँटा पन्छाएर हेर्दा २ छोरीको ज्यान गइसकेको थियो ।’ घाइते छोरीहरू उपचार गराइरहेका छन् । आफैंले उब्जाउ गरेको अन्नले वर्ष दिन खान पुग्दैन । अर्काको खेतबारीमा काम गरेर परिवार पाल्दै आएका थिए । परिवार १५ जनाको छ । राहतका रूपमा टेन्ट पाए । परिवार त्यसैमा बसेका छन् । ठाउँठाउँमा राखिएको शिविरमा पुगेर खाने गरेका छन् । मनमा पीडा छ । फेरि हावाहुरी आए कसरी जोगिने भन्ने पीर पनि उस्तै छ ।

‘घर भत्किएर सबै सामान पुरियो,’ उनले भने, ‘पकाउने भाँडाकुँडा छैन, लाउने लुगा र ओड्ने ओछ्याउने पनि छैन ।’

अहिले गाउँमा राहत बाँड्न प्रतिस्पर्धा छ । तर भाँडाकुँडा वितरण गर्ने कोही आएका छैनन् । प्रभावित स्थानीयको माग पकाउने भाँडाकुँडाको छ । यो वडामा सशस्त्र प्रहरीले सयभन्दा बढी टेन्ट वितरण गरिसकेको छ । वितरण गरिएको टेन्ट ठड्याएर प्रभावितलाई राख्ने काम नेपाली सेनाले गरेको छ । गाउँ अशान्त छ । स्थानीय अझै त्रासमा छन् । हावाहुरी चल्दा झस्किन्छन् । साँझ परेपछि गाउँ अन्धकार बन्छ ।

फेटा गाउँपालिकाका अध्यक्ष अमिरीलाल प्रसाद घटनापछि गाउँलेको उद्धारमा खटिँदै आएका छन् । उनका अनुसार अहिले राहत र अस्थायी बासमा विशेष ध्यान दिइएको छ । यो गाउँमा मात्र १८ जनाको ज्यान गएको छ । केन्द्र र प्रदेश सरकारले सोमबार नै सहयोग घोषणा गरिसकेका छन । ठूला पार्टीका शीर्ष नेता आएर गाउँ अवलोकन गर्दै फर्किएका छन् । राहत घोषणाका लागि शीर्ष नेतामा समेत प्रतिस्पर्धा देखिन्छ ।

प्रधानमन्त्री केपी शर्मा ओली, नेकपाका अध्यक्ष पुष्पकमल दाहाल, कांग्रेस सभापति शेरबहादुर देउवालगायत शीर्ष नेता आएर राहत दिने प्रतिबद्धता गर्दै फर्किएका छन् ।

‘बारा आए पनि प्रधानमन्त्री ओली प्रभावित गाउँमै पुग्नु भएन,’ उनले भने, ‘न संघीय सरकारबाट सहयोग पायौं, न प्रदेश सरकारबाट सहयोग पाएका छौं ।’ उनका अनुसार सहयोग घोषणा सबैले गरेका छन् । घोषणा गरेअनुसार सहयोग तत्काल पाउनुपर्ने माग स्थानीयको छ । ‘घोषणा गर्न प्रतिस्पर्धा चल्छ,’ उनले भने, ‘तर कहिले पाउने हो थाहा छैन ।’
सरकारले सहयोग नगरे पनि गाउँपालिकाको विकास बजेट कटाएरै भए पनि प्रभावित गाउँलेलाई सहयोग गर्ने प्रतिबद्धता उनले जनाए । ‘पहिला गाउँलेलाई बचाउनुपर्‍यो,’ उनले भने, ‘गाउँले बचाएपछि विकासको काम गरौंला ।’ उनले अहिले तत्काल टेन्टको व्यवस्था गरिए पनि हावाहुरीको समस्या देखापरे विद्यालय, स्वास्थ्यचौकीमा
लगेर राख्ने बताए ।

पानी र शौचालयको समस्या
प्रभावित क्षेत्रमा अहिले पिउने पानी र शौचालयको समस्या देखा परेको छ । जहाँ घर भत्किए, त्यहाँ चापाकल सुकेका छन् । शौचालय भत्किएका छन् । गाउँमा शौचालय नभएपछि त्यसका लागि त्रिपाल गाडेर अस्थायी शौचालय बनाउन लागिएको छ । त्यस्तै खानेपानी संस्थानमार्फत पानीको ट्यांकी ल्याएर राख्ने तयारी गरेको अध्यक्ष अमिरीलालले बताए । उनका अनुसार विद्यालय बन्द छन् । बिहीबारबाट सबै विद्यालय खुल्ने छन् । भत्किएका घरमा विद्यार्थीका किताबसमेत पुरिएका छन् ।

भाँडाकुँडा अभाव
घर भत्किएर सबै पुरिएकाले स्थानीयसँग पकाउने भाँडाकुँडा छैनन् । चामल, दाल, तरकारी बाँड्न प्रतिस्पर्धा चले पनि पकाउने भाँडाकुँडा नहुँदा सामूहिक रूपमा पकाएको ठाउँमा लाइन लागेर खान बाध्य भएको प्रभावित क्षेत्रका स्थानीयले गुनासो गरेका छन् । भत्किएका घरबाट सामान कतै निकालिएको छ, कतै निकाल्न सकिएको छैन ।
निकालेका भाँडाकुँडा फुटेका र कुचिएका छन् । विद्युत् सेवा अवरुद्ध छ । जसले गर्दा स्थानीयले चार्ज गर्न पाएका छैनन् । गाउँका अधिकांश युवा विदेशमा छन् । उनीहरूलाई घटनाबारे जानकारी गराउन सकेका छैनन् । ‘गाउँ अन्धकार छ,’ स्थानीय अगुवा समिमोहमद मियाँले भने, ‘बत्तीको आवश्यकता छ, सोलार बत्ती मात्र राख्न सकिए पनि समस्या हुने थिएन ।’

कच्ची घरमा बढी क्षति
फेटा गाउँपालिकाका इन्जिनियर जाकिर हुसेन अन्सारीका अनुसार कच्ची घरमा सबैभन्दा बढी क्षति भएको छ । ‘प्राविधिक सल्लाहबिना आफ्नै हिसाबले बनाएका घरमा बढी क्षति भएको छ,’ उनले भने, ‘त्यसमा पनि माटोमा इँटा राखेर बनाएका घर बढी परे ।’ पक्की घरमा कम क्षति भएको छ । पहिला प्राविधिक कम थिए, सबै ठाउँमा पुगेर प्राविधिक सल्लाह दिन सक्दैनन् थिए । ‘अहिले संघीयताले गर्दा स्थानीय तहमा प्राविधिक छन्, अब बन्ने घरमा समस्या हुनेछैन, प्राविधिक सल्लाहअनुसार नै बनाउनुपर्छ,’ उनले भने ।

उनका अनुसार रातको समय भएकाले बढी मानवीय क्षति भएको हो । ‘दिउँसो भए मानवीय क्षति कम हुन सक्थ्यो,’ उनले भने, ‘राति खाना खाने समयमा सबै जम्मा भए, त्यही बेला घटना घट्यो, मानवीय क्षति बढी भयो ।’ घटनामा परेर अहिलेसम्म १ हजार ८ सय ९५ घरमा क्षति भएको छ । बारामा २८ र पर्सामा एक जनाको मृत्यु भएको छ । ७ सयभन्दा बढी घाइते छन् ।
महिला असुरक्षित
शक्तिशाली हावाहुरीबाट पीडित महिला र बालबालिका बढी जोखिममा परेका छन् । विपद्ले पीडितहरू यत्रतत्र भएकाले महिलाको सुरक्षामा समस्या देखिएको छ । एकै ठाउँमा बस्नुपर्ने बाध्यता, चर्पी र बास अभावलगायत समस्याले उनीहरूको सुरक्षा जोखिममा परेको हो । कतिपय ठाउँमा महिला र पुरुष एकै ठाउँमा बस्नुपरेको छ ।
‘कतिपय महिलालाई मासिकस्राव भएको छ, त्यसका लागि सेफ्टी छैन, शौच गर्ने चर्पी छैन,’ बालबालिका तथा महिला सुरक्षा क्षेत्रमा काम गर्ने अधिकारकर्मी कृष्णा बस्नेतले भनिन्, ‘बास अभावले एकै ठाउँमा बस्नुपरिरहेको छ ।’ उनका अनुसार कतिपय बालबालिका र महिला अभिभावक गुमाउँदा मानसिक पीडामा छन् ।

‘बालबालिकाहरू बास गुमाएपछि यत्रतत्र छन्,’ उनले भनिन्, ‘विपद्मा बालबालिका र महिलाले थुप्रै समस्या झेल्नुपरेको छ ।’ विपद्पछिको अवस्थामा व्यवस्थापकीय कमजारी भएर बालबालिकाको सुरक्षादेखि उनीहरूको आवश्यक खानेकुरा, खेलकुद तथा पाठ्य सामग्री नहुँदा मानसिक दबाबमा परेको उनले बताइन् । ‘विपद्पछि बालबालिकामा दीर्घकालीन मानसिक असर पर्छ,’ बालबालिकाको सुरक्षा क्षेत्रमा काम गर्ने अन्तर्राष्ट्रिय संस्था सेभ द चिल्ड्रेनका वरिष्ठ अनुगमन मूल्यांकन संयोजक चन्द्रदेव साहले भने ।

पर्सामा १ र बारामा २८ गरी २९ जनाको मृत्यु भएकोमा १२ महिला र ६ बालबालिका परेका छन् । सात सय हाराहारीमा भएका घाइतेमध्ये धेरैजसो महिला र बालबालिका नै छन् । कतिपय सुत्केरी महिला चोटपटक खेपेर त्रिपालमै बसेका छन् । फेटा गाउँपालिका ६, पुरैनियाकी १६ दिनकी सुत्केरी रेक्मा खातुन र अर्की ६ दिनकी सुत्केरी अमेरु नेशा चोट भए पनि त्रिपालमै बसेका छन् । धेरै बालबालिकाको टाउकोमा चोट छ । ‘विपद्ले बालबालिका र महिला जोखिममा छन्,’ प्रहरीअन्तर्गत महिला तथा बालबालिका सेवा केन्द्रका एक प्रहरी अधिकृतले भने ।

हुरी प्रभावित ठाउँका विद्यालय चार दिनयता बन्द छन् । हुरीअघिदेखि जारी वार्षिक परीक्षा रोकिएको छ । राहत सामग्री स्टोर गर्ने र हुरीले घरबारविहीन भएकाको ओत लाग्ने उपयुक्त ठाउँ विद्यालय नै भएको छ । हुरीले प्रभावित झन्डै दुई हजार परिवारका सयौं बालबालिकाको घर भत्किएकाले कापी, किताब, कलम, खेलकुदलगायत सामग्री हराएका छन् ।

सुत्केरीको समस्या कान्तिपुरमा छापिएपछि नेपाल प्रहरी श्रीमती संघकी अध्यक्ष प्रमिला खनालले हुरीको चपेटामा परेकी यहाँकी दुई सुत्केरीलाई राहत सहयोग गरेकी छन् । फेटा गाउँपालिका ६, पुरैनियाकी १६ दिनकी सुत्केरी रेक्मा खातुन र अर्की ६ दिनकी सुत्केरी अमेरु नेशालाई कपडा, शिशुलाई खुवाइने दूधलगायत सामग्री दिएर राहत सहयोग गरेकी हुन्।

प्रकाशित : चैत्र २१, २०७५ ०८:०६
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

जो दोषी, उही न्यायाधीश !

न्यायपरिषद्का रामप्रसाद सिटौला र पदमप्रसाद वैदिकको प्रतिवेदनमा थप छानबिन र कारबाहीका लागि सिफारिस गरिएका राजेशकुमार काफ्ले, लेखनाथ ढकाल, कुलप्रसाद शर्मा, महम्मद जुनेद आजाद र नगेन्द्रलाल कर्ण नै उच्च अदालतको न्यायाधीशमा सिफारिस गरिएका हुन्
कृष्ण ज्ञवाली

काठमाडौँ — जिल्ला अदालतबाट उच्च अदालतमा सिफारिस ६ मध्ये ५ न्यायाधीशको कार्यक्षमतामाथि गम्भीर प्रश्न उठेको प्रमाण कान्तिपुरले फेला पारेको छ ।

परिषद्का सदस्यद्वय रामप्रसाद सिटौला र पदमप्रसाद वैदिकले न्यायपरिषद्मापेस गरेको छानबिन प्रतिवेदनमा राजेशकुमार काफ्ले, लेखनाथ ढकाल, कुलप्रसाद शर्मा, महम्मद जुनेद आजाद र नगेन्द्रलाल कर्णमाथि थप छानबिन र कारबाहीको सिफारिस गरिएको छ । छानबिनमा नपरेका बालमुकुन्द दवाडी ललितपुरको बलात्कारसम्बन्धी एक मुद्दामा अस्वाभाविक थुनछेक आदेश गरेकाले विवादित छन् ।

प्रतिवेदनमा उल्लिखित ५ न्यायाधीशमध्ये ४ जनामाथि विस्तृत अनुसन्धान र कार्यक्षमता अभावमा कारबाहीको सिफारिस गरिएको थियो । एक जनामाथि भने सचेत गराउने निर्णय भएको थियो । कारबाहीका लागि सिफारिस गरिएको प्रतिवेदनमा हस्ताक्षर गरेका न्यायपरिषद् सदस्यद्वयले नै तिनै न्यायाधीशलाई उच्च अदालतको न्यायाधीश सिफारिस गर्ने निर्णयमा हस्ताक्षर गरेका छन् । ‘हामीले त्यतिबेला प्रतिवेदनमा थप छानबिन हुनुपर्छ भनेको हो । पछि ओमप्रकाश श्रीमान् (पूर्वप्रधानन्यायाधीश ओमप्रकाश मिश्र) का पालामा उहाँहरूमाथिको उजुरी पुष्टि नहुने भनी तामेलीमा राखियो,’ न्यायपरिषद्का एक सदस्यको भनाइ उद्धृत गर्दै परिषद् स्रोतले भन्यो, ‘नैतिक प्रश्न त हो । तर कानुनी रूपमा दोषी नहुने भएकाले सिफारिस गरेका हौं ।’

न्यायपरिषद् स्रोतका अनुसार प्रारम्भिक प्रतिवेदनको सिफारिसका आधारमा अरू छानबिन पनि भएको थियो । कारबाही हुनुपर्ने भनी प्रतिवेदन पनि तयार भयो । त्यसैबेला तत्कालीन प्रधानन्यायाधीश सुशीला कार्कीले अवकाश लिइन् । त्यसपछिका प्रधानन्यायाधीश गोपाल पराजुली र ओमप्रकाश मिश्रले कुनै कारबाही गरेनन् । बरु थप छानबिन गरेर प्रमाण नभेटिएको भनी धमाधम उजुरी तामेलीमा राख्ने निर्णय भयो ।

प्रतिवेदन भन्छ–
राजेशकुमार काफ्ले
२०७३ मंसिर २७ गते १५२ दर्ता नम्बरमा पेस गरिएको छानबिन प्रतिवेदनमा जिल्ला न्यायाधीश राजेशकुमार काफ्लेको ‘कार्यक्षमता अभाव देखिएको’ भनी थप कारबाही सिफारिस छ । स्रोतले कान्तिपुरलाई उपलब्ध गराएको प्रतिवेदनमा कुटपिटसम्बन्धी मुद्दामा काफ्लेले गलत आदेश दिएको उल्लेख छ । उसना श्रेष्ठले उजुरी दिई गीता श्रेष्ठ प्रतिवादी भएको मुद्दामा उनले कुटपिट ठहर गरेका थिए । ‘प्रतिवादी पक्षले फेरि वादी पक्षलाई कुटपिट गरे यसै मिसिल प्रमाणलाई आधार लिई वादी पक्षले अर्को कुटपिट मुद्दा दायर गर्न सक्ने हुँॅदा प्रतिवादी पक्षलाई एक पटक सुध्रिने मौका दिनु इजलासलाई उपयुक्त लागेको हुँदा प्रस्तुत मुद्दामा दाबी पुग्ने ठहर्दैन,’ आदेशमा भनिएको थियो । आरोपितले नै स्विकारेको अवस्थामा कुटपिटको कसुर ठहरिएकाले सजाय हुनुपर्नेमा ‘मनोगत फैसला गरेको’ परिषद्को छानबिनमा उल्लेख छ । न्यायाधीश काफ्ले स्वेच्छाचारी भएको ठहरसहित प्रतिवेदनले उनीमाथि कारबाही बढाउन सिफारिस गरेको थियो ।

लेखनाथ ढकाल
सिफारिसमा परेका न्यायाधीश ढकालमाथि झनै संगीन प्रकृतिका आरोप छन् । काभ्रेका व्यवसायी उमेश बानियाँले २०७३ भदौ ११ गते ढकाल र उनकी श्रीमतीलाई भेटी घूस डिल गरेको उजुरी गरेका छन् । उनले भेटेको स्थान र मोबाइल नम्बरसमेत उल्लेख गरी छानबिन हुनुपर्ने माग गरेको प्रतिवेदनमै उल्लेख छ । प्रतिवेदनअनुसार ठगी मुद्दामा थुनामा रहेका व्यक्तिका आफन्तले ढकालको ससुरालीमा गई उनकी श्रीमतीलाई रकम बुझाएको उजुरी परेको थियो । रामशरण तोलाङ्गे र नरेन्द्रबहादुर कार्की जोडिएको दूषित निर्णय बदरसम्बन्धी मुद्दामा समेत ढकालविरुद्ध उजुरी थियो । यो मुद्दामा पक्षधरले एक लाख ९० हजार रुपैयाँ खर्च गरेर मुद्दा जितियो भनी हल्ला गर्दै हिँडेको छानबिन प्रतिवेदनमा छ । ‘थप अनुसन्धान गरी कारबाही गर्नुपर्ने साथै निज न्यायाधीशविरुद्ध अन्य उजुरीसमेत परेको देखिएकाले र निजका सम्बन्धमा न्यायिक अराजकताको कुरासमेत प्रकाशन भएको पाइएकाले गम्भीर छानबिन, अनुसन्धान हुनुपर्ने,’ प्रतिवेदनमा भनिएको छ ।

कुलप्रसाद शर्मा
न्यायाधीश कुलप्रसाद शर्मामाथि न्यायपरिषद्मा दुई उजुरी परेको थियो । एउटा चेक अनादरको थियो भने अर्को ज्यान मार्ने उद्योगसम्बन्धी मुद्दा थियो । सुरेन्द्रकृष्ण श्रेष्ठ र सुरेन्द्रदास श्रेष्ठ जोडिएको चेक अनादर मुद्दामा विषयवस्तुभन्दा बाहिर गई फैसला गरेको निष्कर्ष थियो । चेक काटेपछि भुक्तानी रोक्का गर्ने कामले समेत चेक अनादर हुनेमा शर्माले तथ्य विषयान्तर गरी फैसला गरेको भन्दै न्यायपरिषद्ले गठन गरेको समितिले ‘कार्यक्षमता अभाव’ भनी टिप्पणी गरेको थियो । अर्को मनोजकुमार झाले ज्यान मार्न खोजेको भनी कृष्णचन्द्र झाले दिएको जाहेरीसम्बन्धी मुद्दामा न्यायाधीश शर्माले तथ्यबाट बाहिर गई फैसला गरेको भनी प्रतिवेदनमा थप कारबाहीको सिफारिस भएको थियो । शर्माले ज्यानै लिनेसम्मको तथ्य स्थापित नभएको भनी फैसला गरेका थिए, जबकि सगरमाथा अञ्चल अस्पतालको घाउ जाँच प्रतिवेदनअनुसार मनोजकुमारलेगरेको प्रहारका कारण घाउ लागेको भन्ने उल्लेख छ ।

महम्मद जुनेद आजाद
न्यायाधीश महम्मद जुनेद आजादआफ्नो हाजिरीकपीमा टिपेक्स लगाएको आरोपमा दोषी ठहरिएका न्यायाधीश हुन् । दाङ जिल्ला अदालतमा कार्यरत रहँदा फिल्ड निरीक्षणमा गएको जनाए पनि काज स्वीकृति नभएपछि उनले हाजिरी रजिस्ट्ररमा टिपेक्स लगाएको छानबिनबाट देखिएको छ । आर्थिक लाभ लिई स्वेच्छाचारी ढंगले मुद्दाको फैसला गरेको भनी उनीमाथि परेको उजुरी छानबिन गर्दा ती मुद्दामा माथिल्लो अदालतबाट फैसला उल्टिएको भन्दै प्रतिवेदनमा उनीमाथि ‘पदीय मर्यादा र आचरण’ विपरीत काम गरेकामा कारबाही सिफारिस भएको छ ।

नगेन्द्रलाल कर्ण
न्यायाधीश नगेन्द्रलाल कर्णमाथि कास्की जिल्ला अदालतदेखि अन्यत्र रहँदासमेत उजुरी परेको छानबिनकै क्रममा खुलेको छ । मुद्दाको पक्ष, विपक्षसँगको अनावश्यक व्यवहारजस्ता उनका क्रियाकलापबाट हरेक ठाउँमा उजुरी परेको छ । प्रतिवेदनअनुसार उनी जहाँ कार्यरत भए, त्यहाँबाट उजुरी परेका छन् । स्थलगत अध्ययनका क्रममा उनीबारे सकारात्मक प्रतिक्रिया नआएको भन्दै प्रतिवेदनमा उनको फैसला तर्कपूर्ण नरहेको र कार्यशैली पनि स्तरीय नभएको निष्कर्ष छ । उनीबारे रायमा भनिएको छ, ‘कार्यक्षमताको कमी रहेको भन्ने आधारमा सचेतसम्म गराउने ।’

प्रतिवेदनमा उल्लेख नभएका अनि जिल्लाबाट उच्चमा सिफारिस भएका एकमात्रै न्यायाधीश बालमुकुन्द दवाडी हुन् । तुलनात्मक रूपमा स्वच्छ मानिएका उनी एउटा बलात्कार र ज्यान मार्ने मुद्दाको थुनछेक आदेशमा भने अत्यन्त विवादित भए । बलात्कारपछि हत्याको प्रयास गरेको अवस्थामा उद्धार गरिएकी पीडितको किटानी जाहेरी हुँदासमेत आरोपितलाई छाडेका कारण उनी विवादमा परेका थिए । उनले साधारण तारेखमा छाडेका आरोपितलाई उच्च अदालतमा थुनामा राख्न आदेश दियो भने पछि जिल्ला अदालतले दोषी किटान गर्‍यो ।

प्रकाशित : चैत्र २१, २०७५ ०७:५४
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
×