गैरआवासीय नेपालीले १० अर्ब भित्र्याउने प्रतिबद्धता

कान्तिपुर संवाददाता

काठमाडौँ — गैरआवासीय नेपाली सङ्घ (एनआरएनए) ले प्रारम्भिक चरणमा १० अर्ब रुपैयाँ लगानी भित्र्याउने सरकारसँग समझदारी भएको छ । लगानी सम्मेलनको दोस्रो दिन उक्त रकमले नेपाल सरकारको प्राथमिकताका आयोजनामा लगानी गर्ने प्रतिबद्धता सहितको समझदारी भएको हो । 


समझदारीपत्रमा सरकारकातर्फबाट उद्योग विभागका महानिर्देशक विनोदप्रकाश सिंह र सङ्घका तर्फबाट अध्यक्ष भवन भट्टले हस्ताक्षर गरेका हुन्।

‘सरकारको समृद्ध नेपाल र सुखी नेपाली अभियानमा गैर आवासीय नेपालीहरूको सहभागिताका निम्ति एउटा सामूहिक लगानी कोष खडा गने विषयमा एक समझदारी पत्रमा हस्ताक्षर भएको छ,’ एनआरएनएद्वारा जारी विज्ञप्तिमा भनिएको छ, ‘यो लगानी कोष स्थापनाका लागि नेपालको प्रचलित कानुन अनुसार कम्पनी खडा गरिने छ।’

प्रारम्भिक चरणमा १० अर्ब रुपैयाँ लगानी भित्र्याउने प्रतिबद्धता सहित समझदारी भएको हो। ‘यस कोष मार्फत् नेपाल सरकारको प्राथमिकतामा परेका आयोजना तथा समग्र नेपालीको हितमा रहने साना ठुला परियोजनाहरूमा लगानी गरिने छ,’ विज्ञप्तिमा भनिएको छ।

प्रकाशित : चैत्र १६, २०७५ २०:०५
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

६ सय मेगावाटको दूधकोशी निर्माण गर्न एडीबीको चासो

कान्तिपुर संवाददाता

काठमाडौँ — एसियाली विकास बैंकले ६ सय मेगाावट क्षमता भएको दूधकोसी जलाशययुक्त आयोजनामा लगानी गर्ने इच्छा देखाएको छ । एडीबीका दक्षिण एसिया हेर्ने उपाध्यक्ष सिसिन चेनले ऊर्जामन्त्री वर्षमान पुनलाई शनिबार साँझ भेट गर्दै आयोजनामा ७० अर्ब लगानी गर्त तयार रहेको बताएका हुन् ।

खोटाङ ओखलढुंगा र सोलुखुम्बुको सीमानामा पर्ने आयोजना २०४२ मा पहिचान भएको थियो । विद्युत् विकास विभागले यही वर्ष भदौमा आयोजनाको अध्ययन अनुमति पत्र नेपाल विद्युत् प्राधिकरणलाई दिएको छ । आयोजनाको सम्भाव्यता अध्ययन, विस्तृत इन्जिनियरि डिजाइनको लागि एडीबीले अनुदान दिएको छ । एडीबीले आयोजनामा लगानी गर्न पनि यसअघिदेखि नै चासो देखाउँदै आएको थियो ।

उपाध्यक्ष चेनले लगानी सम्मेलनमा भाग लिन नेपाल आएका हुन् । लगानी सम्मेलनमा बोल्दै चेनले नेपालको आर्थिक समृद्धिमा सहयोग गर्न एडीबी तयार रहेको बताएका हुन् । सम्मेलनमा उनले नेपाललाई एडीबीले हालसम्म ६ अर्ब डलर पूर्वाधार निर्माणलगायतका क्षेत्रमा सहयोग गरेको बताए ।

ऊर्जामन्त्री पुनसँग अन्य लगानीकर्ताहरुले पनि भेट गरेको मन्त्रीको सचिवालयद्वारा जारी विज्ञप्तिमा जनाइएको छ । चिनियाँ कम्पनी पावर चाइनाका अध्यक्ष दोङ सेङले पनि शनिबार साँझ ऊर्जामन्त्री पुनसँग भेट गर्दै तल्लो अरुण, किमाथाङ्का र आधिखोलाजस्ता आयोजनामा लगानी गर्न चाहेको बताए । लगानी सम्मेलनमा सहभागी हुन नेपाल आएका विभिन्न देशका लगानीकर्तालाई ऊर्जामन्त्रीले शनिबार साँझ ५ घण्टासम्म छुट्टाछुट्टै भेटघाट गरेको मन्त्रीको सचिवालयद्वारा जारी विज्ञप्तिमा जनाइएको छ ।

प्रकाशित : चैत्र १६, २०७५ १९:५०
पूरा पढ्नुहोस्
प्रतिक्रिया
पठाउनुहोस्
ADVERTISEMENT