स्ववियु निर्वाचनको कार्यतालिका सार्वजनिक गर्न माग गर्दै नेकपा निकट विद्यार्थी आन्दोलनमा
काठमाडौँ — सत्तारुढ नेकपा निकट विद्यार्थी संगठनले स्वतन्त्र विद्यार्थी युनियन (स्ववियु) निर्वाचनको कार्यतालिका सार्वजनिक गर्न माग गर्दै त्रिभुवन विश्वविद्यालयका उपकुलपतिकाे कार्यालय घेराउ गरेका छन् ।
साेमबार बिहान ११ बजे अनेरास्ववियु र अखिल (क्रान्तिकारी) ले उपकुलपति कार्यालयमा प्रदर्शन र घेराउ गरेका हुन ।
दुवै संगठनहरुले आइतबार संयुक्त विज्ञप्ति जारी गर्दै पहिलो चरणको संघर्षका कार्यक्रम घोषणा गरेका थिए ।
क्रान्तिकारीका अध्यक्ष रञ्जित तामाङ र अनेरास्ववियुकी अध्यक्ष नविना लामाले निकालेको विज्ञप्तिअनुसार सोमबार बिहान ११ बजे त्रिभुवन विश्वविद्यालयका उपकुलपति कार्यालयमा प्रदर्शनसहित घेराउ र पर्सि फागुन ७ गते देशभरका स्ववियु निर्वाचन हुने क्याम्पसमा प्रमुखको कार्यकक्षमा प्रदर्शनसहित घेराउ गरिनेछ ।
प्रकाशित : फाल्गुन ६, २०७५ १२:४८