राप्रपा (संयुक्त) को घोषणा, एकतामा आउन कमल थापालाई आग्रह

रासस

काठमाडौँ — राष्ट्रिय प्रजातन्त्र पार्टी (प्रजातान्त्रिक) र एकीकृत राष्ट्रिय प्रजातन्त्र पार्टी (राष्ट्रवादी)को शुक्रबार औपचारिक रुपमा एकीकरण भई राप्रपा (संयुक्त) गठन भएको छ । हिन्दू राष्ट्र र सबै पक्षलाई चित्त बुझ्ने साझा संस्थाका रुपमा राजसंस्थासहितको प्रजातन्त्रलाई वैचारिक नीतिका रुपमा अवलम्बन गर्दै संविधान कार्यान्वयनमा प्रतिबद्ध रहन दुवै पार्टी सहमत भई एकता घोषण गरिएको हो । 

एक महिनाभित्रमा दुवै पार्टीको विधानलाई आधार मानेर अन्तरिम विधान निर्माण गरिनेछ । करिब एक वर्षभित्रमा एकीकृत पार्टीको महाधिवेशन सम्पन्न गरिनेछ । महाधिवेशन नहुन्जेलसम्म दुवै पार्टीका अध्यक्षको संयुक्त नेतृत्व प्रणालीअन्तर्गत पार्टी सञ्चालन गरिनेछ । पार्टीका महत्वपूर्ण निर्णय अध्यक्षद्वय र पूर्वप्रधानमन्त्री लोकन्द्रबहादुर चन्दको सहमतिमा हुनेछ ।

शुक्रबार यहाँ आयोजित पार्टी एकीकरण कार्यक्रममा अध्यक्ष प्रकाशचन्द्र लोहनीले मुलुकमा हिन्दू र बौद्ध धर्मावलम्बीको पहिचान रहेकाले त्यो सभ्यतालाई कायम गरी देशलाई समृद्ध बनाउन पार्टी एकता गरिएको बताए । भ्रष्टाचार राष्ट्र निर्माणको बाधक तत्व भएकाले त्यसलाई न्यूनीकरण गर्न नवगठित पार्टी प्रतिबद्ध रहेको उनको भनाइ थियो । उनले भने, '२१ औँ शताब्दी जनताको सार्वभौमिकता सर्वोपरि भएको समय हो, उनीहरुलाई अधिकार सम्पन्न गरी देश विकास गर्न आवश्यक छ ।'

अर्का अध्यक्ष पशुपतिशमशेर जबराले विसं २०४७ पछि बनेका सरकारमध्ये अहिलेको सरकार बलियो भएको बताए । उनले देशमा सुशासन कायम गरी जनताको सामाजिक रुपान्तरण गर्न नसकेको अहिलेको अवस्थामा ती अभिभारा पूरा गर्न एकता गरिएको विचार व्यक्त गरे । अध्यक्ष जबराले सबै धर्मबीच समानता, पूर्ण धार्मिक स्वतन्त्रतासहितको हिन्दू राष्ट्र कायम गर्ने प्रतिबद्धता व्यक्त गर्दै कमल थापा नेतृत्वको राप्रपालाई पनि एकताका लागि आग्रह गरे । मुलुकको राष्ट्रियता र सामाजिक एकताका साथै पार्टीको अस्तित्वका लागि एकीकरण गरिएको बताइएको छ । उक्त पार्टीले राष्ट्रियता, प्रजातन्त्र र उदारवादका साथै असंलग्न परराष्ट्र नीतिलाई मुख्य आधार बनाएको छ ।

पूर्वप्रधानमन्त्रीद्वय लोकेन्द्रबहादुर चन्द र सूर्यबहादुर थापाको नेतृत्वमा विसं २०४७ जेठ १५ गते एकै दिन दुई पार्टी स्थापना भएको थियो । राप्रपा (थापा) र राप्रपा (चन्द) एक वर्षभित्र एकीकृत भए पनि करिब २८ वर्षको यात्रामा धेरै पटक जुट्ने र फुट्ने सिलसिला चलेको थियो । त्यस्तै पूर्व प्रधानमन्त्री थापाले राष्ट्रिय जनशक्ति पार्टीसमेत गठन गरेका थिए ।

मुलुकमा बहुदलीय प्रणालीको व्यवस्था भएपछि तीन दशक लामो पञ्चायती व्यवस्थामा क्रियाशील नेताहरुको विद्वता, राजनीतिक अनुभव र अवसरको उपयोग गरी विगतमा वामपन्थी तथा लोकतान्त्रिक दुवै शक्तिको सहयोगबाट विसं २०५४ मा नेता चन्द र थापा दुवै प्रधानमन्त्री बनेका थिए ।

दोस्रो जनआन्दोलनबाट प्राप्त उपलब्धिलाई सहजपूर्वक स्वीकारेका राणा र डा लोहनीलाई छाडेर मुलुकमा हिन्दू राष्ट्र र संवैधानिक राजसंस्थाको पक्षमा वकालत गर्दै आएका थापा विगतमा तीन पटक उपप्रधानमन्त्रीको जिम्मेवारी सम्हालिसकेका छन् ।

राणा र लोहनीले एकताका लागि बिहीबार हस्ताक्षर गरेका थिए । देशको राष्ट्रियता, प्रजातन्त्र र जनहितको सिद्धान्त र अवधारणालाई संरक्षण गरी एकता प्रक्रिया अगाडि बढाउने उद्देश्य नवगठित पार्टीको रहेको नेता सुन्दर पाण्डेले जानकारी दिए ।

दैनिक कार्य सञ्चालनका लागि दुई अध्यक्ष रहेको निर्देशन समिति गठन गरिने र समितिको अध्यक्षता आलोपालो गरिने छ । सचिवालयको काम, कर्तव्य र नियुक्ति तथा अधिकारसम्बन्धी कार्यविधि निर्माण र जिम्मेवारीको बाँडफाँटका लागि विभाग गठन गरिनेछ । पदाधिकारी तथा केन्द्रीय सदस्यको मनोनयन सहमतिमा गरिनेछ । चुनाव चिह्न ‘हलो’ राख्ने सहमति भएको छ । नयाँ पार्टीमा कार्य सम्पादनको सिलसिलामा कुनै बाधा अड्काउ आइपरेमा निर्देशक समितिले सहमतिका आधारमा निर्णय लिनेछ ।

प्रकाशित : माघ १८, २०७५ १९:५१
प्रतिक्रिया
पठाउनुहोस्

क्याम्पसमा ताला, अनशनमा विद्यार्थी

कान्तिपुर संवाददाता

विराटनगर — पूर्वाञ्चल विश्वविद्यालयको आंगिक क्याम्पस स्कुल अफ इन्जिनियरिङ एन्ड टेक्लाेनाेली कलेजका विद्यार्थीले क्याम्पसमा ताला लगाएर रिले अनशन सुरु गरेका छन् ।

विराटनगरस्थित स्कुल अफ इन्जिनियरिङ एण्ड टेक्लाेनाेली कलेजका विद्यार्थी क्याम्पसमा ताला लगाएर रिले अनशन बस्दै । तस्बिर : कान्तिपुर

पाँच वर्षदेखि सञ्चालित यो क्याम्पसलाई विश्वविद्यालयले इन्जिनियरिङ काउन्सिलमा अझै दर्ता नगर्दा उत्तीर्ण भएका विद्यार्थीले अघिल्लो चरणको अध्ययन गर्न र रोजगारीका लागि आवेदन दिन नपाएको भन्दै उनीहरूले क्याम्पसमा तालाबन्दी गरेर रिले अनशन बसेका हुन्।

यो क्याम्पसको पहिलो व्याजका ४८ विद्यार्थीमध्ये ७ जना नियमिततर्फमा उत्तीर्ण भएका छन्। काउन्सिलमा दर्ता नभएका कारण उनीहरूले अहिलेसम्म सर्टिफिकेटको सदुपयोग गर्न नपाएको र दोस्रो सेमिस्टारको पनि परीक्षाको नतिजा आउने बेलासम्म क्याम्पसले इन्जिनियरिङ परिषद्मा दर्ता गराइएको छैन।

काउन्सिलमा दर्ता प्रक्रिया भइरहेको र साताभित्रमा दर्ता भइसक्ने क्याम्पस प्रमुख मनोजकुमार हलवाइको भनाइ छ। उनले काउन्सिलमा दर्ता गर्नैका लागि उपकुलपति घनश्यामलाल दाससहितका पदाधिकारी सक्रिय रूपमा खटिरहेको दाबी गरे।

त्यसैगरी क्याम्पसमा नियमित अध्यापन नहुने, प्रयोगात्मक सिकाइको शुल्क विद्यार्थीबाट लिए पनि प्रयोगात्मक कक्षा नहुने, गुणस्तरीय अध्यापन नहुँदा परीक्षामा अत्यन्तै न्यून विद्यार्थी उत्तीर्ण हुने र समयमा कोर्ष पूरा नहुने भन्दै क्याम्पस प्रशासनविरुद्ध विभिन्न दबावमूलक कार्यक्रम गर्दै आएका छन्।

प्रकाशित : माघ १८, २०७५ १९:३२
पूरा पढ्नुहोस्
प्रतिक्रिया
पठाउनुहोस्