ओलीको टिप्पणी- 'नेकपा होइन, चस्मा खुइलिएको'

पार्टी कार्यालय धुम्बाराहीमा शनिबार एक कार्यक्रमबीच कांग्रेस नेता तीर्थराज भुसाललाई पार्टी प्रवेश गराएपछि ओलीले नबुझ्नेले सिध्द्धिन लागेको टिप्पणी गरेको बताए । ‘केहीले भनेका छन्, नेकपा खुइलियो रे’, ओलीले सांकेतिक रुपमा भने, ‘चस्मामा फोहोर लागेको छ अनि आज मौसम सफा रहेन भन्न सुहाउँछ । चस्मा सफा गर्न आग्रह गर्न चाहन्छु म ।’

नेकपा देश, जनताको निम्ति दृढता, सक्रियताका साथ अगाडि बढ्ने उनको भनाइ थियो । देश विकास र समृद्धिका लागि निष्ठापूर्वक अघि बढ्न उनले पार्टीपंक्तिलाई आग्रह गरे । भने, ‘नेकपाको अरु अभिष्टा छैन, देश र जनताका लागि काम गरौं । जनताका लागि सुशासन ल्याउँ, विकासमा जाउँ ।’

आफूले हरेक दिन कदम अगाडि भनेझैं सरकारले सुक्खाबन्दरगाह शिलान्यासलगायत हरेक दिन नयाँ गरिरहेको प्रधानमन्त्रीले बताए । ‘हामी विकासको बाटोमा अगाडि बढ्छौं । हरेक दिन नयाँ–नयाँ काम गर्ने सरकार र पार्टीको संकल्प हो ।’

संविधानले व्यवस्था गरेबमोजिम संघ, प्रदेश, स्थानीय तह व्यवस्थापन र कानुन संशोधन, निर्माणमा लागेकोले यसअघि सोचेजत्ति विकास गति नदेखिएको सत्य भन्दै अब विकासले ‘असाधारण गति’ लिने प्रधानमन्त्रीको दाबी थियो । उनले देशलाई सुशासन र विकासमा लैजान आफ्नो साधान, स्रोत, शक्ति, सामथ्र्य त्यता लगाउने स्पष्ट पारे । उनले सरकारको कामकारबाही र पार्टी एकताको कामलाई सँगसँगै लैजाने बताए ।