नेविसंघमा तदर्थ समिति बनाउन दबाब

कान्तिपुर संवाददाता

काठमाडौँ — नैनसिंह महर नेतृत्वको केन्द्रीय कार्यसमिति तत्काल विघटन गरी तदर्थ समिति बनाउन नेविसंघका नेता तथा कार्यकर्ताले बिहीबार कांग्रेस शीर्ष नेताहरूलाई दबाब दिएका छन् ।

यो कार्यसमितिले संघको महाधिवेशन गराउन र आसन्न स्ववियु निर्वाचन हाँक्न नसक्ने उनीहरूको निष्कर्ष छ ।

जुलुससहित गएका नेता–कार्यकर्ताले पार्टी सभापति शेरबहादुर देउवा र वरिष्ठ नेता रामचन्द्र पौडेलसहितका नेतालाई भेटेर यस्तो दबाब दिएका हुन् । दबाब दिनेमा पौडेलपक्षीय बढी छन् ।

नेविसंघ काठमाडौं जिल्ला कार्यसमिति अध्यक्ष मनोज वैद्यको संयोजनमा गएको टोलीले तत्काल महर नेतृत्वको कार्यसमिति विघटन नगरे नेताहरूकै विरोधमा उत्रने चेतावनी दियो । उनीहरू मोटरसाइकल र्‍यालीसहित देउवा निवास बूढानीलकण्ठ र पौडेल निवास बोहराटार गएका हुन् ।

पार्टीले बुधबार महर नेतृत्वको कार्यसमितिलाई कामचलाउ हैसियतमा सीमित बनाएको थियो । भदौ २ गते नै म्याद सकिए पनि कार्यसमितिलाई महाधिवेशन गराउन दुई पटकमा ५ महिनाको थप समय दिइएको थियो । पटकपटक म्याद थप्दा पनि महाधिवेशन गराउन नसकेपछि पार्टी केन्द्रीय कार्यसमितिले तत्काल कामचलाउ हैसियतमा राख्ने निर्णय लिएको हो । तदर्थ समिति बनाउने या यही कार्यसमितिलाई महाधिवेशन गराउन अझै समय दिने भन्नेबारे पार्टीको आगामी १० गते हुने केन्द्रीय कार्यसमिति बैठकले निर्णय लिनेछ ।

पौडेलले विद्यार्थीका मागबारे पूर्वमहामन्त्री प्रकाशमान सिंह र केन्द्रीय सदस्य अर्जुनरसिंह केसीलाई सँगै राखेर छलफल गरेका थिए । पौडेलले पनि तदर्थ समिति गठन गर्नभन्दा अहिलेकै कार्यसमितिबाट महाधिवेशन गराउन चाहेका थिए । आफ्नै समूहको ठूलो पंक्तिको विरोध पछि उनी तदर्थ समिति गठन गर्ने पक्षमा पुगेका हुन् ।

प्रकाशित : माघ ४, २०७५ ०७:२४
प्रतिक्रिया
पठाउनुहोस्

स्ववियु चुनावमा जुटे विद्यार्थी

कान्तिपुर संवाददाता

काठमाडौँ — स्वतन्त्र विद्यार्थी युनियन (स्ववियु) को चुनावका निम्ति विद्यार्थी संगठनहरू तयारीमा जुटेका छन् । त्रिभुवन विश्वविद्यालयले मातहत सबै कलेजलाई फागुन १४ गते स्ववियु चुनाव गराउन परिपत्र गरेको थियो । त्रिवि नियमावलीमा हरेक दुई वर्षमा स्ववियु निर्वाचन गराउने व्यवस्था छ । 

नेकपानिकट अनेरास्ववियु र अखिल (क्रान्तिकारी) संयुक्त उम्मेदवारी दिने तयारीमा छन् । कांग्रेसनिकट नेपाल विद्यार्थी संघ केन्द्रीय कार्यसमितिको महाधिवेशन गराउने चटारोबीच स्ववियु चुनावमा निर्विकल्प ढंगले प्रस्तुत हुने तयारीमा छ । अन्य साना पार्टीनिकट विद्यार्थी संगठन पनि तयारीमा लागेका छन् ।

अखिल (क्रान्तिकारी) का अध्यक्ष रञ्जित तामाङले अनेरास्ववियु, क्रान्तिकारी र नेविसंघको संयुक्त मागअनुसार त्रिविले चुनाव गराउन लागेको बताए । ‘हामी तोकिएकै मितिमा चुनाव हुनुपर्छ भन्ने अडानमा छौं,’ उनले भने, ‘सबै संगठन मिश्रित प्रणालीअनुसार चुनाव गराउने पक्षमा छौं ।’ त्रिविले उम्मेदवार हुने उमेरहद २८ वर्ष तोकेको छ ।

‘पार्टी एकीकरण भए पनि तत्कालीन एमाले र माओवादी केन्द्रनिकट दुई विद्यार्थी संगठनबीच एकता हुन बाँकी छ,’ तामाङले भने, ‘संगठनको एकता र निर्वाचनमा सँगसँगै जान्छौं ।’ नेकपाले भ्रातृसंगठन मोर्चा प्रमुख गोकर्ण विष्टको संयोजकत्वमा कार्यदल गठन गरेको छ भने विद्यार्थी संगठन एकीकरणका निम्ति विद्यार्थी फाँट प्रमुख रवीन्द्र अधिकारीलाई जिम्मेवारी दिएको छ । कार्यदल दुई विद्यार्थी संगठनलाई एकीकृत गरी अखिल नेपाल राष्ट्रियस्वतन्त्र विद्यार्थी युनियन (अनेरास्ववियु) नामकरण गर्ने टुंगोमा पुगेको छ ।

दुई संगठन एकीकरणसँगै महाधिवेशनका निम्ति संयोजक र सहसंयोजकलगायत नेतृत्वको जिम्मेवारी कुन पक्षले कति पाउने भन्नेबारे विवाद रहेको अनेरास्ववियुका एक नेताले बताए । तत्कालीन एमालेनिकट अनेरास्ववियुकी अध्यक्ष नवीना लामा संघीय संसद्मा समानुपातिक सांसद छिन् ।

तत्कालीन माओवादी केन्द्रनिकट क्रान्तिकारीका अध्यक्ष तामाङ नेतृत्व आफूले पाउनुपर्ने पक्षमा लागेको स्रोतले जनाएको छ । ‘विधानको मस्यौदा टुंगो लागिसकेको छ,’ त्रिविका सबै क्याम्पसमा आफ्नोसंगठनलाई स्ववियु निर्वाचनका निम्ति तत्पर रहन अनौपचारिक सर्कुलर जारी गरेको उल्लेख गर्दै उनले भने, ‘स्ववियु निर्वाचनअघि एकता हुन नसके संयुक्त निर्वाचन परिचालन समिति बनाएर एउटै उम्मेदवार घोषणा गर्छौं ।’

नेविसंघ अध्यक्ष नैनसिंह महरले २०३६ सालदेखि स्ववियुलाई संस्थागत बनाउने काममा आफ्नो संगठनले अगुवाइ गरेको बताए । ‘स्ववियु संस्थागत गर्ने काममा नेविसंघको रगतको साइनो छ,’ त्रिविले नियमित तालिकालाई पालना गर्ने उल्लेख गर्दै उनले भने, ‘देशभरिका क्याम्पसमा आआफ्नो तयारीमा जुट्न साथीहरूलाई भनेका छौं । नेविसंघको केन्द्रीय महाधिवेशन तयारीमा जुटदै गर्दा स्ववियु चुनाव जुनसुकै हालतमा सम्पन्न गराउने पक्षमा छौं ।’

यतिखेर त्रिविका अधिकांश क्याम्पसमा जाडो बिदा छ । माघ १० गतेदेखि बिदा सकिन्छ । नयाँ शक्ति विद्यार्थी युनियन त्रिवि इकाई अध्यक्ष बलबहादुर रम्तेलले क्याम्पस खुलेपछि तयारी तीव्र हुने बताए । ‘क्याम्पस खुलेपछि स्ववियु निर्वाचनको व्यापक तयारी हुनेछ,’ उनले भने ।

दुई वर्षअघिको स्ववियु निर्वाचन धेरै क्याम्पसमा हुन सकेको थिएन । त्रिवि विद्यार्थी कल्याण तथा खेलकुद निर्देशनालयले देशभरिका क्याम्पस प्रमुखलाई स्ववियु निर्वाचनको तयारी गर्न निर्देशन जारी गरेको छ । ‘२०७३ फागुन १८ गते भएको स्ववियु निर्वाचनबाट निर्वाचित पदाधिकारी, सदस्यको दुईवर्षे कार्यकाल समाप्त हुने भएकाले २०७५ फागुनमा हुने स्ववियु निर्वाचनको तयारी गराउन अनुरोध छ,’ पत्रमा उल्लेख छ ।

प्रकाशित : माघ ४, २०७५ ०७:२३
पूरा पढ्नुहोस्
प्रतिक्रिया
पठाउनुहोस्